1950 ஜனவரி 26: இந்தியக் குடியரசு உதயமான அந்த வரலாற்றுத் தருணம்!

இந்திய வரலாற்றின் பொன்னெழுத்துக்களால் பொறிக்கப்பட வேண்டிய நாள் 1950, ஜனவரி 26. அடிமைத்தளையிலிருந்து விடுபட்ட ஒரு தேசம், தனக்கான சட்டவிதிகளையும், தன்னாட்சியையும் அதிகாரப்பூர்வமாகப் பிரகடனப்படுத்திய நாள் அது. பிரிட்டிஷ் டொமினியன் அந்தஸ்திலிருந்து விலகி, ஒரு இறையாண்மை கொண்ட ஜனநாயகக் குடியரசாக இந்தியா உருமாறிய அந்தத் தருணம், ஒவ்வொரு இந்தியனின் இதயத்திலும் நீங்காத இடம்பிடித்த ஒன்று. இன்று நாம் கொண்டாடும் குடியரசு தினத்தின் ஆதிப்புள்ளியைச் சற்று பின்னோக்கிப் பார்ப்போமா?.

சரியாக 10:18 மணி… பிரகடனப்படுத்தப்பட்ட குடியரசு!

1950, ஜனவரி 26, வியாழக்கிழமை காலை சரியாக 10:18 மணிக்கு புதுதில்லியில் உள்ள அரசு மாளிகையின் (இன்றைய குடியரசுத் தலைவர் மாளிகை) தர்பார் ஹாலில் அந்த வரலாற்று நிகழ்வு அரங்கேறியது. அப்போதைய கவர்னர் ஜெனரல் சி.ராஜகோபாலாச்சாரி (ராஜாஜி), இந்தியா ஒரு குடியரசு நாடாக மலர்ந்ததற்கான அதிகாரப்பூர்வ பிரகடனத்தை வாசித்தார்.

சிறிது நேரத்திலேயே, டாக்டர் ராஜேந்திர பிரசாத் இந்தியாவின் முதல் குடியரசுத் தலைவராகப் பதவியேற்றுக்கொண்டார். ஜவஹர்லால் நேரு புதிய அரசியலமைப்பு ஒழுங்கின் கீழ் பிரதமராகத் தனது பணியைத் தொடர்ந்தார்.

அரசியலமைப்பு: மக்களின் விருப்பமே அதிகாரம்

பதவியேற்புக்குப் பின் உரையாற்றிய ராஜேந்திர பிரசாத், “நமது தேசிய வாழ்வின் புதிய கட்டத்தில் நுழைகிறோம்” என்று குறிப்பிட்டார். இனி அதிகாரம் என்பது அரசியலமைப்புச் சட்டத்திடம் இருந்தும், மக்களிடமிருந்தும் மட்டுமே பிறக்கும் என்பதை அவர் உறுதிபடத் தெரிவித்தார். “மக்களின் விருப்பத்தை வெளிப்படுத்தும் ஒரு கருவியாகவே இந்த அரசியலமைப்புச் சட்டம் இருக்கும்” என்று அவர் உணர்த்தினார்.

ஏன் ஜனவரி 26? ஆகஸ்ட் 15, 1947 விடுதலை வழங்கிய நாள் என்றாலும், ஜனவரி 26 தேர்ந்தெடுக்கப்பட்டதற்கு ஒரு முக்கிய காரணம் உண்டு. 1930-ல் இந்திய தேசிய காங்கிரஸ் ‘பூர்ண ஸ்வராஜ்’ (முழு சுதந்திரம்) தீர்மானத்தை இதே தேதியில்தான் அறிவித்தது. அந்த 20-வது ஆண்டு நிறைவை நினைவுகூரும் வகையிலேயே ஜனவரி 26 நமது குடியரசு தினமானது.

காட்சியளித்த கம்பீரம்: முதல் குடியரசு ஊர்வலம்

பதவியேற்பு முடிந்ததும், குடியரசுத் தலைவர் ராஜேந்திர பிரசாத் ஆறு ஆஸ்திரேலிய குதிரைகள் பூட்டப்பட்ட, 35 ஆண்டுகள் பழமையான அரச வண்டியில் (State Coach) பவனியாகப் புறப்பட்டார். அரசு மாளிகையிலிருந்து இர்வின் ஸ்டேடியம் (இன்றைய மேஜர் தியான் சந்த் தேசிய மைதானம்) வரையிலான 8 கி.மீ தூரம் மக்கள் வெள்ளத்தில் மிதந்தது. சாலைகள், பால்கனிகள், மொட்டை மாடிகள், மரக்கிளைகள் என எங்கும் மனித தலைகளே தெரிந்தன. இந்தியாவின் முதல் குடிமகனைப் பார்க்க மக்கள் திரண்டு நின்றனர்.

சர்வதேச ஒற்றுமையும், 31 குண்டு முழக்கங்களும்

இர்வின் ஸ்டேடியத்தில் நடந்த விழாவில் இந்தோனேசிய அதிபர் சுகர்னோ சிறப்பு விருந்தினராகக் கலந்துகொண்டார். இது காலனி ஆதிக்கத்திலிருந்து விடுபட்ட ஆசிய நாடுகளுக்கு இடையே இந்தியா காட்டிய ஒற்றுமையின் அடையாளம்.

• 31 குண்டுகள் முழங்க, தேசியக் கொடியை ராஜேந்திர பிரசாத் ஏற்றி வைத்தார்.

• முப்படைகளின் அணிவகுப்பு நடைபெற்றது. இன்றைய இயந்திரமயமாக்கப்பட்ட பிரம்மாண்ட அணிவகுப்புகளைப் போலன்றி, அன்று காலாட்படை மற்றும் குதிரைப்படை வீரர்களின் அணிவகுப்பு எளிமையாகவும் கம்பீரமாகவும் அமைந்தது.

அரசியலமைப்பின் ஆன்மா

டாக்டர் பி.ஆர். அம்பேத்கர் தலைமையிலான வரைவுக்குழு உருவாக்கிய இந்த அரசியலமைப்பு, இந்தியாவை இறையாண்மை, சமதர்மம், மதச்சார்பற்ற ஜனநாயகக் குடியரசாக நிறுவியது. ஜாதி, மத, பாலினப் பாகுபாடின்றி, எழுத்தறிவு இல்லாதவர்களுக்கும் சேர்த்து ‘அனைவருக்கும் வாக்குரிமை’ வழங்கியதன் மூலம் 30 கோடி மக்களுக்கு ஜனநாயகத்தில் பங்கு அளித்தது அந்த உன்னதச் சட்டம்.

ஒளிர்விக்கப்பட்ட புதுதில்லி

மாலை வேளையில் புதுதில்லி மாநகரம் மின்னொளியால் ஜொலித்தது. அரசு அலுவலகங்கள் அனைத்தும் விளக்குகளால் அலங்கரிக்கப்பட்டன. இரவு நேரத்திலும் மக்கள் கூட்டம் குறையவில்லை. தேசம் தனது முதல் குடியரசு தினக் கொண்டாட்டத்தில் திளைத்துக் கிடந்தது.

“ஜனநாயகம் என்பது மக்கள் தங்களைத்தாங்களே ஆளும் திறனைப் பொறுத்தது” என்ற ராஜேந்திர பிரசாத்தின் வார்த்தைகள் இன்றும் பொருந்தும். 1950-ல் விதைக்கப்பட்ட அந்த ஜனநாயக விதை, இன்று ஆலமரமாக வளர்ந்து நிற்கிறது. அந்த முதல் விடியலை நம்மால் எப்படி மறக்க முடியும்?

நிலவளம் ரெங்கராஜன்