யுடியூபர்களுக்கு அங்கீகாரம்; பிராண்டுகளுக்கு நெருக்கடி: புதிய மசோதாத் தகவல்!
மாற்றங்கள் எப்போதுமே சத்தமில்லாமல் தொடங்கும், ஆனால் அதன் தாக்கம் நிலநடுக்கத்தைப் போல ஒட்டுமொத்தத் துறையையும் உலுக்கிவிடும். இந்திய நாடாளுமன்றத்தின் மாநிலங்களவையில் (Rajya Sabha) தற்போது நிறைவேற்றப்பட்டுள்ள ‘தேசிய படைப்பாற்றல் பொருளாதார மசோதா 2026’ (National Creator Economy Bill) அத்தகைய ஒரு வரலாற்றுத் திருப்பம்.
இது வெறும் சட்ட அங்கீகாரம் மட்டுமல்ல; இந்தியாவின் டிஜிட்டல் பொருளாதாரத்தின் திசையையே மாற்றப்போகும் ஒரு ‘கேம் சேஞ்சர்’.
1990-களின் சினிமா தருணம்!
1990-களுக்கு முன்பு இந்தியத் திரைத்துறை ஒருவித இருண்ட நிழல் உலகப் பணத்தில் (Shadow Money) இயங்கிக் கொண்டிருந்தது. எப்போது அரசு அதற்கு ‘தொழில்துறை’ (Industry Status) அந்தஸ்தை வழங்கியதோ, அதன்பின்னர் தான் கார்ப்பரேட் முதலீடுகளும், வெளிப்படையான வர்த்தகமும் உள்ளே வந்தன. அது இந்திய சினிமாவை உலகத் தரத்திற்கு உயர்த்தியது.
இன்று அதே போன்ற ஒரு தருணத்தை இந்தியாவின் ‘கிரியேட்டர் எகானமி’ (Creator Economy) எட்டியுள்ளது. இனி யூடியூபர்களும், இன்ஃப்ளூயன்ஸர்களும் வெறும் ‘வீடியோ போடுபவர்கள்’ அல்ல; அவர்கள் சட்டப்பூர்வமான ‘தொழில்முறை வல்லுநர்கள்’ (Legally Recognized Professionals).
அடுத்த 12 மாதங்களில் மாறப்போகும் 4 முக்கிய விஷயங்கள்:
-
நிர்ணயிக்கப்பட்ட ஊதியம் (Professional Rates): சட்ட அங்கீகாரம் கிடைத்தவுடன், படைப்பாளர்களின் ஊதிய விகிதங்கள் உயரும். இனி “பார்டர்” (Barter) முறையிலோ அல்லது மிகக்குறைந்த ஊதியத்திலோ அவர்களைப் பணியமர்த்துவது கடினம். முறையான பேச்சுவார்த்தைகள் மற்றும் ஒப்பந்தங்கள் கட்டாயமாகும்.
-
90 நாள் காத்திருப்பிற்கு முற்றுப்புள்ளி: நிறுவனங்கள் தங்களுக்கு வேலை செய்த கிரியேட்டர்களுக்கு 90 நாட்கள் கழித்து பணம் கொடுக்கும் கலாச்சாரம் இனி செல்லுபடியாகாது. காலதாமதமான பணம் செலுத்துதல் என்பது இனி ஒரு ‘Compliance’ சிக்கலாக மாறும். இதற்காக ‘IIGC Protect’ போன்ற அமைப்புகள் மூலம் சட்டப்பூர்வ நடவடிக்கைகள் எடுக்கப்படும்.
-
அங்கீகரிக்கப்பட்ட அடையாளம்: இந்தியாவின் 92 சதவீத கிரியேட்டர்களுக்கு இதுவரை ஒரு முறையான ‘Brand Brief’ கூடக் கிடைத்தது கிடையாது. இனி அவர்களுக்குச் சட்டப்பூர்வமான அடையாளம் கிடைத்துள்ளதால், பெரிய நிறுவனங்கள் அவர்களை நேரடியாகவும், வெளிப்படையாகவும் அணுக முடியும்.
-
வாட்ஸ்அப் மார்க்கெட்டிங்கின் வீழ்ச்சி: இன்னும் பல பிராண்டுகள் வாட்ஸ்அப் குழுக்கள் மூலம் அரைகுறையாகத் தங்களது கேம்பைன்களை (Campaigns) நடத்திக் கொண்டிருக்கின்றன. முறையான உள்கட்டமைப்பு (Infrastructure) இல்லாமல் செயல்படும் இந்த நிறுவனங்கள், இனிவரும் தொழில்முறைச் சூழலில் தாக்குப்பிடிக்க முடியாது.
படைப்பாளர் நல நிதி மற்றும் ‘ஆரஞ்சு எகானமி’
மத்திய பட்ஜெட்டில் அறிவிக்கப்பட்ட ₹250 கோடி நிதி ஒதுக்கீடு மற்றும் 15,000 பள்ளிகளில் அமையவுள்ள ‘கிரியேட்டர் லேப்கள்’ (Creator Labs), இந்தியாவின் ‘ஆரஞ்சு எகானமி’யை (Orange Economy) அடுத்த கட்டத்திற்குக் கொண்டு செல்லும். படைப்பாளர்களுக்கான ‘Creator Welfare Fund’ மூலம் அவர்களுக்கான சமூகப் பாதுகாப்பு மற்றும் காப்பீட்டு வசதிகளும் இனி உறுதி செய்யப்படும்.
ஆந்தையார் பார்வை:
இந்த மசோதா ஒருபுறம் கொண்டாட்டத்தைக் கொடுத்தாலும், மறுபுறம் ‘கடுமையான கட்டுப்பாடுகள்’ (Over Regulation) பற்றிய அச்சத்தையும் விதைத்துள்ளது. ஏஐ (AI) உள்ளடக்கங்களைக் லேபிளிடுவது முதல், வரி விதிமுறைகள் வரை பல சவால்கள் காத்திருக்கின்றன.
இருப்பினும், கடந்த மூன்று ஆண்டுகளாக இதற்கான உள்கட்டமைப்பை உருவாக்கி வருபவர்களுக்கு இது ஒரு பொற்காலம். ஆனால், இன்னும் பழைய பாணியில் வாட்ஸ்அப்பில் பிசினஸ் தேடுபவர்களுக்கு இது ஒரு எச்சரிக்கை மணி.
