மகளிர் மசோதா வீழ்ந்ததன் பின்னணியில் ‘மோடி டீமின்’ சறுக்கல்?

நாடாளுமன்றத்தில் மகளிர் இட ஒதுக்கீடு மசோதா தோல்வியடைந்தது என்பது வெறும் தொழில்நுட்ப ரீதியிலான சறுக்கல் அல்ல; அது ஆளும் தரப்பு விரித்த அரசியல் வலை பின்னடைவைச் சந்தித்த நிகழ்வாகவே பார்க்கப்படுகிறது. பெண்களுக்கான அதிகாரம் என்ற போர்வையில், அதன் பின்னணியில் ஒளிந்திருந்த சில ‘நிபந்தனைகள்’ மற்றும் ‘உள்நோக்கங்களை’ எதிர்க்கட்சிகள் முன்கூட்டியே மோப்பம் பிடித்ததே இந்த வரலாற்றுத் தோல்விக்குக் காரணம்.

அதிகாரப் பகிர்வா? அரசியல் தந்திரமா?

“33 சதவீத ஒதுக்கீடு” என்ற கவர்ச்சிகரமான தலைப்புடன் கொண்டு வரப்பட்ட இந்த மசோதாவில், மோடி தலைமையிலான அரசு வைத்திருந்த சில ‘செக்’ பாயிண்டுகள் தான் விவாதப் பொருளாகின. குறிப்பாக:

1. மக்கள் தொகை கணக்கெடுப்பு நிபந்தனை: மசோதா நிறைவேறினாலும், அது மக்கள் தொகை கணக்கெடுப்பு மற்றும் தொகுதி மறுவரையறைக்குப் பிறகுதான் அமலுக்கு வரும் என்ற நிபந்தனை, பெண்களுக்கான அதிகாரத்தை இன்னும் ஒரு தசாப்த காலத்திற்கு தள்ளிப் போடும் தந்திரமாகவே பார்க்கப்பட்டது.

2. உள் ஒதுக்கீடு புறக்கணிப்பு: OBC மற்றும் சிறுபான்மையினப் பெண்களுக்கான உள் ஒதுக்கீட்டைச் சேர்க்க மறுத்தது, சமூக நீதியைச் சிதைக்கும் முயற்சியாக எதிர்க்கட்சிகளால் கடுமையாக விமர்சிக்கப்பட்டது.

வாக்கெடுப்பில் எதிரொலித்த ‘உள்நோக்கம்’

அரசியலமைப்பு திருத்தத்திற்குத் தேவையான 361 வாக்குகளைப் பெற முடியாமல் போனதற்கு, ஆளும் கூட்டணியின் ‘உள்நோக்கம்’ குறித்த சந்தேகம் வலுப்பெற்றதே முக்கியக் காரணம். 278 பேர் ஆதரவு அளித்தாலும், 211 பேர் மசோதாவை எதிர்த்து வாக்களித்ததன் மூலம், “இந்த மசோதா பெண்களுக்கு அதிகாரம் அளிப்பதற்காக அல்ல; தேர்தலுக்கான வெறும் விளம்பரம் (Photo-op)” என்ற பிம்பம் உறுதிப்படுத்தப்பட்டது.

சபாநாயகர் ஓம் பிர்லா தோல்வியை அறிவித்தபோது, அவையில் நிலவிய நிசப்தம் ஆளும் தரப்பின் அரசியல் கணக்குகள் தடம் புரண்டதை உணர்த்தியது.

அமைச்சர் ரிஜிஜுவின் அதிருப்தியும் நிதர்சனமும்

நாடாளுமன்ற விவகாரத்துறை அமைச்சர் கிரண் ரிஜிஜு, இது ‘துரதிர்ஷ்டவசமானது’ என்று கூறினாலும், உண்மையில் ஒரு முழுமையான, சமத்துவமான மசோதாவைக் கொண்டு வராமல், நிபந்தனைகளுடன் கூடிய மசோதாவைக் கொண்டு வந்து தோல்வியைத் தழுவியது மோடி குழுவின் திட்டமிடல் தோல்வி என்றே அரசியல் விமர்சகர்கள் கருதுகின்றனர்.

இனி என்ன? – மக்களின் கேள்வி

மக்களவையில் பெண்களின் குரலை ஒடுக்க நினைக்கும் மறைமுக அரசியல் முடிவுக்கு வந்து, நேர்மையான முறையில் உள் ஒதுக்கீடு மற்றும் உடனடி அமலாக்கத்துடன் கூடிய மசோதாவை அரசு முன்வைக்குமா? அல்லது இந்தத் தோல்வியைக் காட்டி மீண்டும் அரசியல் லாபம் தேடுமா? என்பதே இப்போதுள்ள மில்லியன் டாலர் கேள்வி.

நிம்மி