எளிமையின் சிகரம்…மக்கள் போராளி தோழர் நல்லகண்ணு ஐயாவுக்கு வீரவணக்கம்!

தமிழக அரசியலில் ‘தூய்மை’ என்ற சொல்லுக்கு உருவம் கொடுத்தால் அது ஐயா நல்லகண்ணுவாகத்தான் இருக்கும். ஒரு நூற்றாண்டு கால வரலாற்றைத் தன் தோள்களில் சுமந்தபடி, எளிய மக்களுக்காகத் தன் வாழ்நாள் முழுவதையும் அர்ப்பணித்த அந்த மாபெரும் போராளியின் பயணம் இன்று ஓய்ந்திருக்கிறது.

சிறைவாசம் தந்த சுதந்திரப் போராளி

1925-ல் தூத்துக்குடி மாவட்டம் ஸ்ரீவைகுண்டத்தில் பிறந்த நல்லகண்ணு, வெறும் 15 வயதிலேயே ‘வெள்ளையனே வெளியேறு’ இயக்கத்தில் குதித்தவர். 18 வயதில் கம்யூனிஸ்ட் கட்சியில் இணைந்த அவர், ஒரு பத்திரிகையாளராகவும் தன் போராட்டத்தைத் தொடங்கினார். பதுக்கி வைக்கப்பட்டிருந்த 2000 மூட்டை நெல்லைக் கண்டுபிடித்து அவர் எழுதிய கட்டுரை, அதிகார வர்க்கத்தையே அதிரவைத்தது. அன்றே வீட்டை விட்டு வெளியேறி முழுநேர மக்கள் பணியில் இறங்கியவர், நெல்லைச் சதி வழக்கில் சிக்கி 7 ஆண்டுகள் இருட்டறையில் சிறை தண்டனை அனுபவித்தார். அவர் விடுதலையானபோதுதான் நாடும் சுதந்திரக் காற்றைச் சுவாசிக்கத் தொடங்கியது.

அனைவருக்​கு​மானவர்…

கட்சி​யில் உறுப்​பின​ராகத் தொடங்கி, விவசாயத் தொழிலாளர் சங்கத்​தின் மாநிலப் பொதுச் செயலா​ளராக நீண்ட காலமும்; கட்சி​யின் மாநிலச் செயலா​ளராக நான்கு முறை தேர்வு செய்​யப்​பட்டு 12 ஆண்டு​களும்; கட்சி​யின் தேசிய நிர்​வாகக் குழு உறுப்​பின​ராக​வும், தேசிய கட்டுப்​பாட்டுக் குழுத் (ஒழுங்கு நடவடிக்கைக் குழு) தலைவ​ராக​வும் பணியாற்றிய அனுபவம் மிக்​கவர்.

பணத்தை மதிக்காத பண்பாளர்

இன்றைய காலகட்டத்தில் அதிகாரமும் பணமுமே அரசியலைத் தீர்மானிக்கும் நிலையில், நல்லகண்ணு ஐயா அதற்கு நேர்மாறாக வாழ்ந்தவர். அவரது 80-வது பிறந்தநாளில் கட்சித் தொண்டர்கள் கஷ்டப்பட்டு வசூலித்துக் கொடுத்த ஒரு கோடி ரூபாயை, அதே மேடையிலேயே கட்சிக்கே திருப்பித் தந்து அனைவரையும் நெகிழ வைத்தார். தமிழக அரசு வழங்கிய அம்பேத்கர் விருதுத் தொகையையும் தனக்கென வைத்துக் கொள்ளாமல், கட்சிக்கும் விவசாயச் சங்கத்திற்குமே பிரித்துக் கொடுத்தவர் அவர்.

மண்ணுக்காகவும் மக்களுக்காகவும்…

தாமிரபரணி ஆற்று மணல் கொள்ளைக்கு எதிராகத் தனி மனிதனாக நின்று அவர் நடத்திய சட்டப் போராட்டங்கள் காலத்தால் அழியாதவை. தீண்டாமை ஒழிப்பு, நிலவுடைமை எதிர்ப்பு எனச் சமூக அநீதி எங்கு நடந்தாலும் அந்த இடத்திற்கு முதல் ஆளாக ஓடிச் செல்பவர் அவர். துக்ளக் சோ அவர்களே பாராட்டியது போல, பெயருக்கேற்றவாறு நிஜ வாழ்க்கையிலும் ‘நல்ல கண்ணு’ வாகவே வாழ்ந்து காட்டியவர்.

சிறைக்கொட்டடிகள், தலைமறைவு வாழ்க்கை எனத் தன் வாழ்நாளில் பெரும் பகுதியைத் துன்பங்களுக்கு இடையே கழித்தாலும், ஒருபோதும் அவர் தனது கொள்கையிலிருந்து பின்வாங்கியதில்லை. 100 வயது வரை ஒரு அப்பழுக்கற்ற அரசியல்வாதியாகத் திகழ்ந்த ஐயாவின் மறைவு, தமிழகத்திற்கு ஒரு பேரிழப்பு. அந்த மகத்தான மனிதருக்கு வீரவணக்கம் செலுத்துவோம்!

தென்காசி தேவா