பருப்பு வகைகள்: நம் தட்டில் இருக்கும் ‘ஊட்டச்சத்து’ காப்பகம் – இன்று உலக பருப்பு தினம்!

நம்ம ஊரில் எந்த விசேஷம் என்றாலும், முதலில் வைக்கப்படுவது பருப்புதான். கல்யாண விருந்தாக இருந்தாலும் சரி, வீட்டில் சாதாரண ரசம் சாதமாக இருந்தாலும் சரி, பருப்பு இல்லாமல் அந்தச் சாப்பாடு முழுமை அடையாது. அந்த அளவுக்கு இந்தியர்களின் ரத்தத்தோடு ஊறிய ஒரு உணவுப் பொருள் என்றால் அது பருப்பு மற்றும் பயறு வகைகள்தான். பருப்பு மற்றும் பயறு வகைகளின் முக்கியத்துவத்தை ஐ.நா. அமைப்பு கடந்த 2013ஆம் ஆண்டில் புரிந்து கொண்டதைத் தொடர்ந்து, 2016ஆம் ஆண்டு முழுவதும் பருப்புகளின் ஆண்டாக கொண்டாடப்பட்டது. இதைத் தொடர்ந்து 2019 முதல் பருப்புகளின் தேவை மற்றும் அதன் பயன்பாடு குறித்து உலக அளவில் பிரசாரம் செய்யப்பட்டு இந்த நாள் கொண்டாடப்பட்டு வருகிறது. வருகின்ற 2050ஆம் ஆண்டுக்கு உள்ளாக உலகின் பருப்பு உற்பத்தியை இரட்டிப்பாக இலக்கு நிர்ணயம் செய்யப்பட்டுள்ளது. அந்த வகையில் இன்று பிப்ரவரி 10 – உலக பருப்பு தினம். இதையொட்டி பருப்புகளின் மகத்துவத்தைப் பற்றி கொஞ்சம் விரிவாகப் பார்ப்போமா?

ஐ.நா அங்கீகரித்த பருப்புப் பெருமை!

உண்மையில் பருப்பு மற்றும் பயறு வகைகளின் முக்கியத்துவத்தை உலகம் உணர ஆரம்பித்தது 2013-ஆம் ஆண்டில்தான். அதன் பிறகுதான் 2016-ஆம் ஆண்டைப் ‘பருப்புகளின் ஆண்டு’ என்று ஐக்கிய நாடுகள் அவை கொண்டாடியது. அதன் தொடர்ச்சியாக, ஐக்கிய நாடுகளின் உணவு மற்றும் வேளாண்மை அமைப்பு (FAO), பருப்பு வகைகளின் முக்கியத்துவத்தை உலகெங்கும் கொண்டு செல்ல இந்தத் தினத்தை அறிவித்தது.

அவரையினம், மைசூர் பருப்பு, பட்டாணி, கொண்டைக்கடலை, லூபின்கள் எனப் பல வகைகளை இது உள்ளடக்கியது. இந்த விழிப்புணர்வு எதற்காகத் தெரியுமா? சாதாரண மக்களும் பருப்பின் ஊட்டச்சத்தை உணர்ந்து, ஆரோக்கியமாக வாழ வேண்டும் என்பதற்காகத்தான்.

இந்தியர்களின் அன்றாடத் துணையாக பருப்புகள்!

உலகிலேயே பருப்பு வகைகளின் முக்கியத்துவத்தை அதிகமாக உணர்ந்தவர்கள் இந்தியர்கள்தான் என்று அடித்துச் சொல்லலாம். நம் நாட்டின் புவியியல் மற்றும் உணவுப் பழக்கவழக்கங்கள் அப்படி அமைந்திருக்கின்றன.

• வட இந்தியா: அங்கே தினசரி சப்பாத்திதான் பிரதான உணவு. அதற்குத் தொட்டுக்கொள்ள தால் மசியல் அல்லது பருப்பு வகைகள் இல்லாமல் அவர்கள் உணவு முடிவடையாது.

• தென்னிந்தியா: நமக்குச் சாம்பாரும், காய்கறி கூட்டுகளும்தான் உயிர். இட்லி, தோசை மாவு அரைப்பதற்கு உளுந்தம் பருப்புதான் அடிப்படை. அதுபோக, சுடச்சுடச் சாதத்தில் பருப்புப் பொடியும் நெய்யும் சேர்த்துச் சாப்பிடுவதே ஒரு தனி சுகம்.

அன்றாட உடல் இயக்கத்திற்குத் தேவையான அசாத்திய ஆற்றல் (Energy) இந்தப் பருப்புகள் மூலமாகவே நமக்குக் கிடைக்கிறது.

எங்கே என்ன விளைகிறது? – பருப்புகளின் புவியியல்

இந்தியா முழுவதும் காலநிலைக்கு ஏற்பப் பல்வேறு பருப்பு வகைகள் பயிரிடப்படுகின்றன.

1. துவரம் பருப்பு: இது மகாராஷ்டிரா, கர்நாடகா மற்றும் குஜராத் மாநிலங்களில் அதிக அளவில் பயிரிடப்படுகிறது.

2. உளுத்தம் பருப்பு: பஞ்சாப் மற்றும் உத்தரப் பிரதேச மாநிலங்களில் இது முக்கியமான பயிராகும்.

இவை தவிர ராஜஸ்தான், ஹரியானா, பீகார், மத்தியப் பிரதேசம் போன்ற பகுதிகளிலும் பருப்பு வகைகள் செழித்து வளர்கின்றன. அந்தந்த மாநில மண்ணின் தரம் மற்றும் சுவைக்கேற்ப இந்தப் பருப்புகளின் ருசியும் மாறுபடும்.

ஊட்டச்சத்தின் வாழ்விடம்!

பருப்பு வகைகளைச் வெறும் உணவு என்று சொல்ல முடியாது; அவை ‘ஊட்டச்சத்தின் வாழ்விடம்’.

• சைவ உணவுப்பிரியர்களுக்கு: இறைச்சிக்கு இணையாகத் தாவர அடிப்படையிலான புரதம் (Protein) பருப்புகளில் மட்டுமே கிடைக்கிறது.

• செரிமானம்: இதில் நார்ச்சத்து (Fiber) நிறைந்துள்ளதால், செரிமானக் கோளாறுகள் வராது. குடலைச் சுத்தமாகப் பராமரிக்க உதவும்.

• தாதுக்கள்: பொட்டாசியம், இரும்புச் சத்து, வைட்டமின் பி6 என உடலுக்குத் தேவையான அத்தியாவசிய வைட்டமின்கள் இதில் தாராளமாக உள்ளன.

நோய்களைத் விரட்டும் கவசம்!

பருப்புகளைத் தொடர்ந்து உணவில் சேர்ப்பது மருந்து சாப்பிடுவதற்குச் சமம்.

• நீரிழிவு நோய்: ரத்தச் சர்க்கரை அளவைக் கட்டுப்படுத்துவதில் இது முக்கியப் பங்கு வகிக்கிறது.

• இதய ஆரோக்கியம்: கொலஸ்ட்ரால் அளவைக் குறைத்து, ரத்த அழுத்தத்தைச் சீராக வைப்பதன் மூலம் இதயத்தைப் பாதுகாக்கிறது.

• எடை மேலாண்மை: உடல் எடையைக் குறைக்க விரும்புபவர்கள் பருப்பு வகைகளைச் சாப்பிட்டால், வயிறு நிறைந்த உணர்வைத் தரும். இது தேவையற்ற உணவுகளைத் தவிர்த்து எடையைக் குறைக்க உதவும்.

மொத்தத்தில் நம் பாரம்பரிய உணவான பருப்புகளை வெறும் ‘சைடு டிஷ்’ ஆகப் பார்க்காமல், ஆரோக்கியத்தின் அஸ்திவாரமாகப் பார்த்து உணவில் சேர்த்துக் கொள்வோம்!

நிலவளம் ரெங்கராஜன்