தமிழக அமைச்சரவையின் இலாகாக்கள் ஒதுக்கீடு:- முழு விபரம்

தமிழக முதலமைச்சராகத் தமிழக வெற்றிக் கழகத்தின் (தவெக) தலைவர் சி. ஜோசப் விஜய் பதவியேற்றதைத் தொடர்ந்து, அவருடன் இலாகாக்கள் இல்லாத அமைச்சர்களாகப் பதவியேற்ற 10 அமைச்சர்களுக்கான அதிகாரப்பூர்வத் துறைகள் ஐந்து நாள்களுக்குப் பிறகு தற்போது அறிவிக்கப்பட்டுள்ளன. புதிய அமைச்சரவையில் முதலமைச்சர் விஜய் வசம் மிக முக்கியமான துறைகள் ஒதுக்கப்பட்டுள்ளன. நிர்வாகத் திறன், கிராமப்புற வளர்ச்சி, நிதி மற்றும் உள்கட்டமைப்பு ஆகியவற்றுக்கு முக்கியத்துவம் அளிக்கும் வகையில் இந்த இலாகாக்கள் பகிர்ந்தளிக்கப்பட்டுள்ளன.

புதிதாக அறிவிக்கப்பட்டுள்ள அமைச்சர்கள் மற்றும் அவர்களுக்கான துறைகளின் முழு விவரம்:

1. சி. ஜோசப் விஜய் – முதலமைச்சர்

தமிழகத்தின் முதலமைச்சராகப் பொறுப்பேற்றுள்ள சி. ஜோசப் விஜய், மாநிலத்தின் சட்டம் ஒழுங்கு மற்றும் முக்கிய நிர்வாகத் துறைகளைத் தன் வசம் வைத்துள்ளார்.

• துறைகள்: பொது நிர்வாகம், இந்திய ஆட்சிப் பணி (IAS), இந்தியக் காவல் பணி (IPS), இந்திய வனப் பணி (IFS), மாவட்ட வருவாய் அலுவலர்கள், காவல்துறை, உள்துறை.

• கூடுதல் பொறுப்புகள்: சிறப்புத் திட்டச் செயலாக்கம், மகளிர் நலன், இளைஞர் நலன், குழந்தைகள், முதியவர்கள் மற்றும் மாற்றுத்திறனாளிகள் நலன், நகராட்சி நிர்வாகம், நகர்ப்புற மற்றும் குடிநீர் வழங்கல்.

2. என். ஆனந்த் – ஊரக வளர்ச்சி மற்றும் நீர்வளத்துறை அமைச்சர்

கிராமப்புறக் கட்டமைப்பு மற்றும் நீர் மேலாண்மைக்கான முக்கியப் பொறுப்புகள் இவருக்கு வழங்கப்பட்டுள்ளன.

• துறைகள்: ஊரக வளர்ச்சி, பஞ்சாயத்துகள் மற்றும் ஊராட்சி ஒன்றியங்கள், வறுமை ஒழிப்புத் திட்டங்கள், கிராமப்புறக் கடன்கள், பாசனம் மற்றும் சிறுபாசனம் உள்ளிட்ட பாசனத் திட்டங்கள்.

3. ஆதவ் அர்ஜுனா – பொதுப்பணி மற்றும் விளையாட்டு மேம்பாட்டுத்துறை அமைச்சர்

மாநிலத்தின் உள்கட்டமைப்பு மற்றும் விளையாட்டுத் துறையை மேம்படுத்தும் பொறுப்பு இவருக்கு ஒதுக்கப்பட்டுள்ளது.

• துறைகள்: பொதுப்பணி (கட்டடங்கள், நெடுஞ்சாலைகள், துறைமுகங்கள்) மற்றும் விளையாட்டு மேம்பாடு.

4. டாக்டர் கே.ஜி. அருண்ராஜ் – மக்கள் நல்வாழ்வு, மருத்துவக் கல்வி மற்றும் குடும்ப நலத்துறை அமைச்சர்

சுகாதாரத்துறையை வலுப்படுத்தும் நோக்கில் மருத்துவப் பின்புலம் கொண்ட இவருக்கு இத்துறை ஒதுக்கப்பட்டுள்ளது.

• துறைகள்: சுகாதாரம், மருத்துவக் கல்வி மற்றும் குடும்ப நலன்.

5. கே.ஏ. செங்கோட்டையன் – நிதித்துறை அமைச்சர்

மாநிலத்தின் பொருளாதார நிலையை நிர்வகிக்கும் மிக முக்கியப் பொறுப்பு இவருக்கு வழங்கப்பட்டுள்ளது.

• துறைகள்: நிதி, ஓய்வூதியம் மற்றும் ஓய்வூதியப் படிகள்.

6. பி. வெங்கடரமணன் – உணவு மற்றும் நுகர்வோர் பாதுகாப்புத்துறை அமைச்சர்

பொது விநியோகத் திட்டம் மற்றும் நுகர்வோர் நலன் காக்கும் பொறுப்பு இவருக்கு அளிக்கப்பட்டுள்ளது.

• துறைகள்: உணவு மற்றும் குடிமைப் பொருள் வழங்கல், நுகர்வோர் பாதுகாப்பு மற்றும் விலைக்கட்டுப்பாடு.

7. ஆர். நிர்மல்குமார் – ஆற்றல் மற்றும் சட்டத்துறை அமைச்சர்

சட்டத்துறை மற்றும் மின்சார வாரியத்தை உள்ளடக்கிய முக்கியப் பொறுப்புகள் இவருக்கு வழங்கப்பட்டுள்ளன.

• துறைகள்: மின்சாரம் மற்றும் மரபுசாரா எரிசக்தி மேம்பாடு, சட்டம், நீதிமன்றங்கள், சிறைச்சாலைகள் மற்றும் ஊழல் தடுப்பு.

• கூடுதல் பொறுப்புகள்: சட்டமன்றம், ஆளுநர், தேர்தல்கள் மற்றும் பாஸ்போர்ட்.

8. ராஜ்மோகன் – பள்ளி கல்வி, தமிழ் வளர்ச்சி, செய்தி மற்றும் விளம்பரத்துறை அமைச்சர்

கல்வி, பண்பாடு மற்றும் ஊடகத் தொடர்புகளை ஒருங்கிணைக்கும் விரிவான துறைகள் இவருக்கு ஒதுக்கப்பட்டுள்ளன.

• துறைகள்: பள்ளிக்கல்வி, தொல்லியல் துறை, தமிழ் ஆட்சி மொழி மற்றும் தமிழ்ப் பண்பாடு.

• கூடுதல் பொறுப்புகள்: செய்தி மற்றும் விளம்பரம், திரைப்படத் தொழில்நுட்பம் மற்றும் திரைப்படச் சட்டம், செய்தித்தாள் கட்டுப்பாடு, எழுதுபொருள் மற்றும் அச்சுத்துறை, அரசு அச்சகம்.

9. டாக்டர் டி.கே. பிரபு – இயற்கை வளத்துறை அமைச்சர்

மாநிலத்தின் இயற்கை வளங்களைப் பாதுகாத்து முறைப்படுத்தும் பொறுப்பு இவருக்கு வழங்கப்பட்டுள்ளது.

• துறைகள்: கனிமங்கள் மற்றும் சுரங்கங்கள்.

10. செல்வி எஸ். கீர்த்தனா – தொழில்துறை அமைச்சர்

புதிய முதலீடுகளை ஈர்த்து, வேலைவாய்ப்புகளை உருவாக்கும் முக்கியப் பொறுப்பு அமைச்சரவையின் இளம் முகமான இவருக்கு ஒதுக்கப்பட்டுள்ளது.

• துறைகள்: தொழில்துறை, முதலீட்டு ஊக்குவிப்பு.