ஜூலி கே. பிரவுன்:ஜெப்ரி எப்ஸ்டீன் வழக்கின் திசையை மாற்றிய புலனாய்வு இதழாளர்!

ஜூலி கே. பிரவுன் — ஒரு ஊடகவியலாளரின் விடாமுயற்சி எப்படிப்பட்ட அதிகார மையங்களையும் அசைத்துப் பார்க்கும் என்பதற்கு இவர் ஒரு சிறந்த உதாரணம். அமெரிக்காவின் பெரும் செல்வந்தரும், செல்வாக்கு மிக்கவருமான ஜெப்ரி எப்ஸ்டீன் மீதான பாலியல் குற்றச்சாட்டுகளை உலகம் மறக்கத் தொடங்கிய நேரத்தில், அந்த வழக்கை மீண்டும் உயிர்ப்பித்து நீதியின் முன் நிறுத்தியவர் இவர்தான்.

அதிகாரம், பணம், அரசியல் செல்வாக்கு என அசைக்க முடியாத ஒரு பிம்பமாக இருந்த ஜெப்ரி எப்ஸ்டீன், சிறுமிகளைப் பாலியல் தொழிலில் ஈடுபடுத்திய கொடூரமான உண்மைகளை உலகிற்கு உரக்கச் சொன்னவர் மியாமி ஹெரால்டு (Miami Herald) பத்திரிகையின் புலனாய்வு இதழாளர் ஜூலி கே. பிரவுன்.

மறக்கப்பட்ட வழக்கும் ஜூலியின் தேடலும்

2008-ஆம் ஆண்டு ஜெப்ரி எப்ஸ்டீன் மீது சுமத்தப்பட்ட பாலியல் புகார்கள், ஒரு ரகசிய உடன்படிக்கை மூலம் மிகச் சாதாரணமான தண்டனையோடு முடித்து வைக்கப்பட்டது. பல ஆண்டுகள் கடந்துவிட்ட நிலையில், பாதிக்கப்பட்ட பெண்களுக்கு நீதி கிடைக்கவில்லை என்பதை உணர்ந்த ஜூலி, இந்த வழக்கை மீண்டும் கையில் எடுத்தார். பலரும் இதனை ‘முடிந்துபோன கதை’ என்று ஒதுக்கியபோதும், அவர் விடாமல் பாதிக்கப்பட்ட பெண்களைத் தேடிச் சென்று பேசினார்.

பெர்வெர்ஷன் ஆஃப் ஜஸ்டிஸ் (Perversion of Justice)

ஜூலி மேற்கொண்ட ஓராண்டு காலத் தீவிரப் புலனாய்வின் விளைவாக “Perversion of Justice” என்ற தொடர் கட்டுரை வெளியானது. இதில் எப்ஸ்டீனின் குற்றங்கள் மட்டுமல்லாமல், அந்த ரகசிய உடன்படிக்கைக்குப் பின்னால் இருந்த அரசியல் அதிகாரிகளின் தலையீடுகளையும் அவர் வெளிச்சத்திற்குக் கொண்டு வந்தார். சுமார் 80-க்கும் மேற்பட்ட பாதிக்கப்பட்ட பெண்களை நேரில் சந்தித்து அவர்களின் வாக்குமூலங்களைத் திரட்டினார். இக்கட்டுரை வெளியான பிறகுதான், எப்ஸ்டீன் மீண்டும் கைது செய்யப்பட்டார்.

ஒரு பத்திரிகையாளரின் சவால்கள்

ஒரு பெரும் கோடீஸ்வரருக்கு எதிராக ஆதாரங்களைத் திரட்டுவது சாதாரணமான காரியம் அல்ல. ஜூலிக்கு ஏகப்பட்ட மிரட்டல்களும், சட்ட ரீதியான நெருக்கடிகளும் வந்தன. ஆனால், “பாதிக்கப்பட்ட பெண்களுக்கு இழைக்கப்பட்ட அநீதிக்குத் தீர்வு கிடைக்க வேண்டும்” என்ற அவரது உறுதி, அவரைப் பின்வாங்க விடவில்லை.

உலகளாவிய அங்கீகாரம்

ஜூலியின் இந்தப் பணி இதழியல் துறையில் ஒரு மைல்கல்லாகக் கருதப்படுகிறது. அவரது புலனாய்வுக்காக அவருக்கு ‘ஜார்ஜ் போல்க் விருது’ (George Polk Award) உள்ளிட்ட பல உயரிய விருதுகள் வழங்கப்பட்டன. எப்ஸ்டீன் வழக்கில் அவரது பங்கு குறித்து “Perversion of Justice: Selling Out Women and Children” என்ற புத்தகத்தையும் அவர் எழுதியுள்ளார்.

இன்று ஜெப்ரி எப்ஸ்டீன் வழக்கு உலகம் முழுவதும் பேசப்படுகிறது என்றால், அதற்குப் பின்னால் ஒரு பெண் பத்திரிகையாளரின் அயராத உழைப்பும், உண்மையை வெளிக்கொண்டு வரவேண்டும் என்ற நேர்மையும் மட்டுமே காரணமாக இருக்கிறது.

தனுஜா