வண்ணங்களின் பேரழகும் சுற்றுச்சூழல் சமநிலையும்: உலக கிளி நாளும் அதன் முக்கியத்துவமும்!

உலகெங்கிலும் உள்ள பறவை இனங்களில் மனிதர்களுக்கு மிகவும் நெருக்கமான, அறிவுக் கூர்மையும் வண்ணமயமான அழகும் கொண்ட ஒரு பறவை உண்டென்றால் அது கிளிதான். ஒவ்வொரு ஆண்டும் மே 31-ம் நாள் “உலக கிளி நாள்” (World Parrot Day) ஆகக் கொண்டாடப்படுகிறது. காடுகளில் கிளிகள் எதிர்கொள்ளும் அச்சுறுத்தல்களைப் போக்கவும், அவற்றின் பாதுகாப்பை உறுதிசெய்யவும் இந்நாளில் உலகளாவிய விழிப்புணர்வு ஏற்படுத்தப்படுகிறது.

காடுகளின் பல்லுயிர்ப் பெருக்கத்திற்கும் சுற்றுச்சூழல் சமநிலைக்கும் கிளிகள் ஆற்றும் பங்கு அளப்பரியது. ஆனால், இன்று அவை எதிர்கொள்ளும் சவால்கள் மனிதகுலத்தின் உடனடி கவனத்தைக் கோருகின்றன.

உலக கிளி நாளின் பின்னணி

உலகளவில் கிளி இனங்களைப் பாதுகாப்பதற்காகவும், காடுகளில் அவை எதிர்கொள்ளும் வேட்டையாடுதல், வாழ்விட இழப்பு போன்ற சவால்களைத் தணிப்பதற்கான நடவடிக்கைகள் குறித்துப் பொதுமக்களிடையே விழிப்புணர்வை ஏற்படுத்தவும் இந்நாள் தோற்றுவிக்கப்பட்டது.

• நிறுவிய அமைப்பு: உலக கிளி அறக்கட்டளை (World Parrot Trust).

• தொடங்கப்பட்ட ஆண்டு: 2004.

2004-ம் ஆண்டு முதன்முதலாகக் கொண்டாடப்பட்ட இந்நாள், கிளிகளின் பூர்வீக வாழ்விடங்களையும் அவை வாழும் இயற்கைச் சூழலையும் பாதுகாப்பதன் அவசியத்தை உலகிற்குத் தொடர்ந்து நினைவூட்டி வருகிறது.

வரலாற்றில் கிளிகள்: கிமு 1000 முதல் நீளும் சான்றுகள்

மனித வரலாற்றிலும் கலாச்சாரத்திலும் கிளிகளுக்கு மிக முக்கிய இடமுண்டு. மனிதர்களின் குரலை அப்படியேப் போலச் செய்து பேசும் தனித்துவமான திறன் கொண்டிருப்பதால், பழங்காலம் தொட்டே இவை மனிதர்களால் வியப்புடன் பார்க்கப்பட்டு வருகின்றன.

கிளிகள் பூமியில் வாழ்ந்ததற்கும், மனிதர்கள் அவற்றை வளர்த்ததற்கும் அல்லது கவனித்ததற்கும் ஆவணப்படுத்தப்பட்ட முதல் எழுத்துப்பூர்வமான சான்று கிமு 1000 ஆம் ஆண்டிலேயேக் கிடைக்கிறது. பண்டைய இலக்கியங்கள், கதைகள் மற்றும் ஓவியங்களில் கிளிகள் தூதுவர்களாகவும், அறிவின் அடையாளமாகவும் சித்தரிக்கப்பட்டுள்ளன.

கிளி இனங்களின் பன்முகத்தன்மையும் ஆயுட்காலமும்

உயிரியல் வகைப்பாட்டின்படி கிளிகள் சித்தாசிடே (Psittacidae) எனும் பறவைக் குடும்பத்தைச் சேர்ந்தவை ஆகும். இவற்றின் உடலமைப்பு, வளைந்த மூக்கு மற்றும் கால்களின் நகங்கள் மரங்களை எளிதாகப் பற்றிக் கொள்ளும் வகையில் அமைந்துள்ளன.

பறவை இனங்களிலேயே மிக நீண்ட ஆயுட்காலம் கொண்டவை கிளிகள் தான். மனிதர்களைப் போலவே ஒரு நீண்ட தலைமுறையைக் கடந்து வாழும் திறன் கொண்ட இந்த உயிரினங்கள், இன்று மனிதர்களின் பேராசையால்தான் அழியும் நிலைக்குத் தள்ளப்பட்டுள்ளன.

கிளிகள் எதிர்கொள்ளும் முதன்மையான அச்சுறுத்தல்கள்

அழகுக்காகவும், பேசும் திறனுக்காகவும் கிளிகள் எப்போதும் ஆபத்தை விலைக்கு வாங்குகின்றன. காடுகளில் சுதந்திரமாகப் பறக்க வேண்டிய கிளிகள் இன்று பின்வரும் காரணங்களால் அழியும் நிலைக்குத் தள்ளப்பட்டுள்ளன:

1. சட்டவிரோதக் கடத்தல் (Illegal Pet Trade): உலகளவில் கள்ளச்சந்தையில் அதிகளவு கடத்தப்படும் பறவை இனம் கிளிகள்தான். அவற்றின் குஞ்சுகள் கூடுகளில் இருந்து திருடப்பட்டு, சிறிய பெட்டிகளில் அடைக்கப்பட்டு சர்வதேச நாடுகளுக்குக் கடத்தப்படுகின்றன. இக்கடத்தலின் போது போதிய நல்வாழ்வு இல்லாமல் 80% பறவைகள் வழியிலேயே இறந்துவிடுகின்றன.

2. காடழிப்பு மற்றும் வாழ்விட இழப்பு (Deforestation): கிளிகள் கூடு கட்டி வாழ்வதற்கும் இனப்பெருக்கம் செய்வதற்கும் முதிர்ந்த பெரிய மரங்கள் தேவை. காடுகள் அழிக்கப்படுவதால் அவற்றின் இயற்கையான வாழிடங்கள் சுருங்கி வருகின்றன.

3. காலநிலை மாற்றம் (Climate Change): உலக வெப்பமயமாதல் காரணமாகக் காடுகளில் ஏற்படும் வறட்சியும், உணவுப் பற்றாக்குறையும் கிளிகளின் இனப்பெருக்கச் சுழற்சியைப் பெருமளவு பாதிக்கின்றன.

சுற்றுச்சூழல் சமநிலையில் கிளிகளின் முக்கியப் பங்கு

கிளிகள் வெறும் அழகான பறவைகள் மட்டுமல்ல, அவை காடுகளின் “விவசாயிகள்” என்று அழைக்கப்படுகின்றன. அவை பழங்கள், கொட்டைகள் மற்றும் விதைகளை உண்ணும்போது, காடுகளின் பல கிலோமீட்டர் சுற்றளவிற்கு விதைகளைப் பரப்புகின்றன (Seed Dispersal).

பல அடர்ந்த காட்டு மரங்களின் விதைக் கவசங்கள் மிகவும் கடினமாக இருக்கும், கிளிகளின் வலுவான மூக்கால் உடைக்கப்பட்டு கடிக்கப்படும் போதுதான் அந்த விதைகள் மண்ணில் விழுந்து முளைக்கும் தன்மையைப் பெறுகின்றன. எனவே, கிளிகள் அழிந்தால் அது மறைமுகமாகக் காடுகளின் அடர்த்தியைக் குறைத்து, ஒட்டுமொத்த சுற்றுச்சூழல் சங்கிலியையும் உடைத்துவிடும்.

அழிந்து வரும் இந்த உன்னதமான உயிரினங்களைப் பாதுகாக்க வேண்டியது ஒவ்வொரு குடிமகனின் கடமையாகும். கிளிகளை வீடுகளில் கூண்டுகளில் அடைத்து வளர்ப்பதைத் தவிர்த்து, அவை காடுகளில் சுதந்திரமாக வாழ்வதற்கான சூழலை உருவாக்க இந்நாளில் நாம் உறுதியேற்க வேண்டும்.

நிலவளம் ரெங்கராஜன்