செஞ்சிலுவை தினம்: போர்க்களத்தில் உதித்த மனிதாபிமானம்!

ஆண்டுதோறும் மே 8-ஆம் தேதி, மனிதாபிமானத்தின் அடையாளமாகத் திகழும் ‘உலக செஞ்சிலுவை மற்றும் செம்பிறை தினம்’ கொண்டாடப்படுகிறது. இந்த அமைப்பு உருவாவதற்கு மிக முக்கியக் காரணமாக இருந்த ஹென்றி டூனாண்ட் அவர்களின் பிறந்தநாளே இந்தத் தினமாக அனுசரிக்கப்படுகிறது. இன்று உலகம் முழுவதும் மருத்துவ உதவி, இரத்த தானம், பேரிடர் நிவாரணம் என நீளும் இந்தச் சேவையின் பின்னணியில் ஒரு மிகப்பெரிய ரத்த சரித்திரம் ஒளிந்துள்ளது.

அமைப்பு உருவாவதற்கு முன் இருந்த அவல நிலை 19-ஆம் நூற்றாண்டின் நடுப்பகுதி வரை, போர்க்களங்களில் காயமடையும் வீரர்களுக்குச் சிகிச்சை அளிக்க முறையான சர்வதேச அமைப்புகள் ஏதும் இல்லை. போரில் காயமடைந்து மண்ணில் விழுந்து கிடக்கும் வீரர்கள், எவ்வித மருத்துவ உதவியும் இன்றி பல நாட்கள் துடிதுடித்து உயிரிழக்கும் நிலையே நீடித்தது. இராணுவ மருத்துவக் குழுக்கள் இருந்தாலும், அவை அந்தந்த நாட்டு வீரர்களுக்கு மட்டுமே முன்னுரிமை அளித்தன. எதிரி நாட்டு வீரர் என்றால் அவர் சாவிற்குத் தள்ளப்படும் கொடூரமான சூழலே நிலவியது.

சோல்பரினோ போர்: மாற்றத்திற்கான விதை 1859-ஆம் ஆண்டு இத்தாலியில் நடந்த ‘சோல்பரினோ’ (Solferino) போர் தான் இந்த அமைப்பின் பிறப்பிற்கு வித்திட்டது. அந்தப் போர்க்களத்தைக் கடந்து சென்ற வணிகர் ஹென்றி டூனாண்ட், அங்கு சுமார் 40,000 வீரர்கள் எவ்வித உதவியும் இன்றி ரத்த வெள்ளத்தில் கிடப்பதைக் கண்டு அதிர்ச்சியடைந்தார். நாட்டு எல்லைகளைப் பார்க்காமல், அங்கிருந்த உள்ளூர் மக்களைத் திரட்டி “அனைவரும் சகோதரர்களே” (Tutti Fratelli) என்ற முழக்கத்துடன் காயமடைந்த வீரர்களுக்குச் சிகிச்சையளித்தார். இந்த அனுபவமே ‘சர்வதேச செஞ்சிலுவை சங்கத்தின்’ (ICRC) உருவாக்கத்திற்கு அடிப்படையாக அமைந்தது. இதன் விளைவாக, அமைதிக்கான முதல் நோபல் பரிசையும் அவர் வென்றார்.

மனிதாபிமானச் சேவையின் பயன்கள் இந்த அமைப்பு உருவான பிறகு, போர்க்காலங்களில் நடுநிலையான மருத்துவச் சேவை என்பது உலகளாவிய விதியாக மாறியது. ஜெனீவா ஒப்பந்தங்கள் மூலம் போர்க் கைதிகளின் உரிமைகள் பாதுகாக்கப்பட்டன. இயற்கை பேரழிவுகள், நிலநடுக்கம், வெள்ளம் போன்ற காலங்களில் தன்னார்வலர்கள் உயிரைப் பணயம் வைத்து மீட்புப் பணிகளில் ஈடுபடுகின்றனர். குறிப்பாக, இந்தியா போன்ற நாடுகளில் இரத்த தான முகாம்களை நடத்துவதிலும், அவசர காலங்களில் மருந்துப் பொருட்களை விநியோகிப்பதிலும் இச்சங்கங்கள் முதுகெலும்பாகச் செயல்படுகின்றன.

2026-ஆம் ஆண்டின் கருப்பொருள்: “மனிதநேயத்தை உயிர்ப்புடன் வைத்திருத்தல்” (Keeping Humanity Alive) கடந்த சில ஆண்டுகளாக உலகெங்கும் அதிகரித்து வரும் போர்ச் சூழல்கள் மற்றும் இயற்கை சீற்றங்களைக் கருத்தில் கொண்டு, 2026-ஆம் ஆண்டிற்கான கருப்பொருளாக “மனிதநேயத்தை உயிர்ப்புடன் வைத்திருத்தல்” என்பது தேர்ந்தெடுக்கப்பட்டுள்ளது. எந்தச் சூழலிலும் மனிதநேயம் தோற்றுப் போய்விடக் கூடாது என்பதையும், தன்னார்வலர்களின் தன்னலமற்ற சேவையை உலகிற்குப் பறைசாற்றுவதையுமே இவ்வாண்டு நோக்கமாகக் கொண்டுள்ளது.

நாம் செய்ய வேண்டியது என்ன?

இந்த உன்னதமான தினத்தில் நாம் வெறும் வாழ்த்துகளை மட்டும் பகிராமல், ஆக்கப்பூர்வமான செயல்பாடுகளில் இறங்க வேண்டும். தகுதியுள்ள ஒவ்வொருவரும் இரத்த தானம் செய்வதை ஒரு கடமையாகக் கொள்ள வேண்டும். பேரிடர் காலங்களில் உதவும் தன்னார்வத் தொண்டராக நம்மை இணைத்துக் கொள்வதும், ஏழை எளியோரின் மருத்துவச் சிகிச்சைக்கு நிதி உதவி வழங்குவதும் இந்தத் தினத்தின் உண்மையான வெற்றியாகும். மனிதநேயம் என்பது வெறும் சொல் அல்ல; அது ஒரு செயல் என்பதை உணர்ந்து செயல்படுவோம்.

வாத்தீ அகஸ்தீஸ்வரன்