மீடியாக்களை முந்தும் AI சாட்பாட்கள்: இதழியல் துறையின் புதிய சவால்!

செய்திகளைத் தயாரிப்பதற்கும், அவற்றை மக்களிடம் கொண்டு சேர்ப்பதற்கும் செய்தி நிறுவனங்கள் செயற்கை நுண்ணறிவு (AI) தொழில்நுட்பத்தை எப்படிப் பயன்படுத்துகின்றன என்பது பற்றிய விவாதங்கள் உலகளவில் தொடர்ந்து நடந்து வருகின்றன. அதே வேளையில், வாசகர்களும் பொதுமக்களும் தங்களுக்குத் தேவையான செய்திகளை நேரடியாகப் பெறுவதற்கும், அவற்றை எளிமையாகப் புரிந்துகொள்வதற்கும் சாட்பாட்களை (Chatbots) நாடத் தொடங்கியுள்ளனர்.

ஆக்ஸ்போர்டு பல்கலைக்கழகத்தின் ராய்ட்டர்ஸ் இதழியல் ஆய்வு நிறுவனம் வெளியிட்டுள்ள ‘டிஜிட்டல் செய்தி அறிக்கை 2026′ (Digital News Report 2026), செய்தி நுகர்வில் ஜெனரேட்டிவ் AI சாட்பாட்களின் (Generative AI Chatbots) அசுர வளர்ச்சி மற்றும் அதன் பின்னணியில் உள்ள முக்கியத் தரவுகளைப் போட்டுடைத்துள்ளது.

சாட்பாட்கள் வழியே செய்தி பார்ப்பவர்கள் யார்?

செய்திகளைப் பெறுவதற்காக வாரம் ஒருமுறையாவது ChatGPT, Google Gemini போன்ற AI சாட்பாட்களைப் பயன்படுத்துபவர்களின் எண்ணிக்கை உலகளவில் கடந்த ஆண்டை விட 7%-லிருந்து 10%-ஆக உயர்ந்துள்ளது. குறிப்பாக, செய்தி விநியோகம் டிஜிட்டல் தளங்களை அதிகம் சார்ந்துள்ள ஆசியா, ஆப்பிரிக்கா மற்றும் லத்தீன் அமெரிக்க நாடுகளில் இந்த வளர்ச்சி மிக வேகமாகக் காணப்படுகிறது.

• இளைஞர்களின் ஆதிக்கம்: தொழில்நுட்ப மாற்றங்களை உடனுக்குடன் ஏற்றுக்கொள்ளும் 18-24 வயதுடைய இளைஞர்கள் தான் (17%) செய்தித் தேவைக்காக சாட்பாட்களை அதிக அளவில் பயன்படுத்துகின்றனர். இது முதியவர்களின் (5%) பயன்பாட்டை விட மூன்று மடங்கு அதிகம்.

• தீவிர செய்தி வாசகர்கள்: ஏற்கனவே செய்திகளைத் தீவிரமாகப் பின்தொடரும் ‘செய்தி வெறியர்கள்’ (News Lovers) தான் (18%) சாதாரண வாசகர்களை (7%) விட சாட்பாட்களை அதிகம் பயன்படுத்துகின்றனர்.

நம்பகத்தன்மை: பயன்பாட்டைத் தீர்மானிக்கும் முக்கியக் காரணி

பொதுவாகவே உலகளவில் ஊடகங்கள் மீதான ஒட்டுமொத்தப் பொதுமக்களின் நம்பிக்கை 37% என்ற குறைந்த அளவிலேயே உள்ளது. இதில், AI சாட்பாட்கள் வழங்கும் செய்திகளை நம்புவதாகக் கூறுபவர்கள் வெறும் 20% மட்டுமே.

ஆனால், சாட்பாட்களைத் தொடர்ந்து பயன்படுத்துபவர்களிடம் ஆய்வு செய்தபோது, அவர்களில் 44% பேர் சாட்பாட்களின் செய்திப் பதில்களை முழுமையாக நம்புவதாகத் தெரிவித்துள்ளனர். சமூக ஊடகங்களோடு ஒப்பிடுகையில், மக்கள் சாட்பாட்களை மிகவும் திட்டமிட்டு, தங்களுக்கான தேவையின் அடிப்படையில் பயன்படுத்துவதால், “நம்பிக்கை” என்பது இங்கு முதன்மைப் பங்கு வகிக்கிறது.

மக்கள் ஏன் AI சாட்பாட்களை நோக்கி நகர்கிறார்கள்?

செய்திகளைப் படிக்கப் பயனர்கள் சாட்பாட்களைப் பயன்படுத்துவதற்குப் பல்வேறு காரணங்களையும், உந்துதல்களையும் இந்த அறிக்கை பட்டியலிடுகிறது:

1. கூடுதல் கேள்விகள் எழுப்புதல் (Interrogation): ஒரு செய்தியைப் படித்த பிறகு, அதுகுறித்த கூடுதல் விவரங்களை அறியச் சாட்பாட்களிடம் பின்தொடர் கேள்விகளை (Follow-up questions) எழுப்புவதாக 42% பயனர்கள் கூறியுள்ளனர். பிரேசில் போன்ற நாடுகளில் இந்த முறை முதன்மையாக உள்ளது.

2. வேகம் மற்றும் எளிமை (Efficiency & Simplification): மற்ற வழிகளை விட சாட்பாட்கள் மூலம் செய்திகளை விரைவாகப் பெற முடிவதாக 39% பேரும், சிக்கலான மற்றும் நீளமான செய்திகளைச் சுருக்கமாக (Summarisation) மாற்ற 36% பேரும் இதைப் பயன்படுத்துகின்றனர். ஜெர்மனி, ஜப்பான் போன்ற நாடுகளில் செய்திகளை எளிமையாகப் புரிந்துகொள்ளவே சாட்பாட்கள் பெரிதும் உதவுகின்றன.

3. செய்தி ஆதாரங்களை மதிப்பிடுதல் (Evaluation): பத்திரிகை சுதந்திரம் குறைவாக உள்ள ஹாங்காங், துருக்கி போன்ற நாடுகளிலும், ஊடகங்கள் மீதான நம்பிக்கை குறைவாக இருக்கும் ஹங்கேரி, ருமேனியா போன்ற நாடுகளிலும், ஒரு செய்தியின் நம்பகத்தன்மையையும் அதன் மூல ஆதாரத்தையும் சோதித்துப் பார்க்க 33% மக்கள் சாட்பாட்களைப் பயன்படுத்துகின்றனர்.

4. மொழிபெயர்ப்பு (Translation): உலகளாவிய செய்திகளைத் தங்களுக்குப் பிடித்தமான மொழியில் உடனுக்குடன் மொழிபெயர்த்துப் படிக்க 33% வாசகர்கள் சாட்பாட்களைப் பயன்படுத்துகின்றனர்.

ஊடக நிறுவனங்களுக்கு இது உணர்த்தும் செய்தி என்ன?

பொதுமக்கள் தங்களின் செய்தித் தேவைகளுக்காக சாட்பாட்களிடம் நேரடியாகக் கேள்விகள் கேட்கத் தொடங்கியிருப்பது பாரம்பரிய செய்தி நிறுவனங்களுக்கு ஒரு புதிய சவாலை ஏற்படுத்தியுள்ளது.

செய்திகளை வெறும் தகவலாகத் தருவதோடு நிறுத்திக் கொள்ளாமல், வாசகர்களின் சந்தேகங்களைத் தீர்க்கும் வகையிலான ஆழமான பகுப்பாய்வு மற்றும் நம்பகத்தன்மை வாய்ந்த செய்திகளை வழங்க வேண்டிய கட்டாயத்திற்கு ஊடகங்கள் தள்ளப்பட்டுள்ளன. தொழில்நுட்ப வளர்ச்சிக்கு ஏற்ப செய்தி நிறுவனங்களும் தங்களை மாற்றியமைத்துக் கொண்டால் மட்டுமே டிஜிட்டல் யுகத்தில் தங்களின் வாசகர் வட்டத்தைத் தக்க வைத்துக் கொள்ள முடியும் என்பதை இந்த அறிக்கை தெளிவுபடுத்துகிறது.