புதிய ‘கௌரவ’ பந்தயம்: குழந்தை எழுத்தாளர் எனும் பிம்பமும் பெற்றோரின் பிடிவாதமும்!

ஒவ்வொரு பெற்றோருக்கும் தங்கள் குழந்தையினால் பெருமை அடைவதை விரும்பும் போக்கு காலம் காலமாய் இருந்து வருகிறது. ஒரு காலத்தில் தங்கள் குழந்தைகள் விளையாட்டில் ‘பிளாக் பெல்ட்’ வாங்குவதையும், இசைப் போட்டிகளில் பதக்கம் வெல்வதையும் கௌரவமாகக் கருதிய இந்தியப் பெற்றோர்கள், இன்று ஒரு புதிய பந்தயத்தில் குதித்துள்ளனர். அது, தங்கள் குழந்தைகளை ‘புத்தக ஆசிரியர்’ (Author) என்ற நிலைக்கு உயர்த்துவதாகும். இன்று இந்தியா முழுவதும் ‘குழந்தை எழுத்தாளர்கள்’ பெருகி வருவது ஒரு பெரும் அலையாக மாறியுள்ளது. குழந்தைகளின் தனித்திறமை, பெற்றோரின் ஆர்வம் மற்றும் செயற்கை நுண்ணறிவின் (AI) உதவி என இவை அனைத்தும் இணைந்து இந்தப் புதிய கலாச்சாரத்தை உருவாக்கியுள்ளன.

பெற்றோரின் உந்துதல்: கௌரவப் போர்

மற்ற குழந்தைகளை விடத் தன் குழந்தை ஒரு படி மேலே இருக்க வேண்டும் என்ற எண்ணம், குழந்தைகளைச் சிறுவயதிலேயே எழுதத் தூண்டுகிறது. ஒரு காலத்தில் இசை, நடனம் அல்லது கராத்தேயில் சான்றிதழ் பெறுவதைப் பெற்றோர்கள் பெருமையாகக் கருதினர். ஆனால், இன்று அவை சாதாரணமானவை ஆகிவிட்டன. “என் குழந்தை ஒரு புத்தகத்தின் ஆசிரியர்” என்று சமூக வலைதளங்களிலும், உறவினர்கள் மத்தியிலும் சொல்வது ஒரு தனித்துவமான கௌரவத்தைத் தருவதாகப் பெற்றோர்கள் நம்புகிறார்கள். இது குழந்தைகளின் திறமையை விட, பெற்றோரின் சமூக அந்தஸ்தை உயர்த்தும் ஒரு கருவியாகப் பார்க்கப்படுகிறது.

ரெஸ்யூம் பில்டிங் (Resume Building)

எதிர்காலத்தில் வெளிநாட்டுப் பல்கலைக்கழகங்களில் உயர்கல்வி கற்கச் செல்லும்போது, “ஆசிரியர்” என்ற தகுதி ஒரு கூடுதல் மதிப்பைத் தரும் எனப் பெற்றோர்கள் கணக்கு போடுகிறார்கள். இதனால், குழந்தைப் பருவத்தின் இயல்பான விளையாட்டுகளை விட, அவர்களின் சுயவிவரக் குறிப்பை (Resume) மெருகேற்றுவதிலேயே பெற்றோர்கள் அதிக கவனம் செலுத்துகிறார்கள். மற்றொரு குழந்தை புத்தகம் வெளியிட்ட செய்தியை முகநூலில் பார்க்கும்போது உருவாகும் ஒருவித உளவியல் அழுத்தம், பெற்றோர்களுக்கிடையிலான ஒரு நிழல் யுத்தமாகவே தொடர்கிறது.

பெற்றோருக்கான எச்சரிக்கை: இது யாருடைய கனவு?

குழந்தைகளின் கற்பனைத் திறனை வளர்ப்பது வரவேற்கத்தக்கது என்றாலும், இதில் சில ஆபத்துகளும் உள்ளன.

• சுயதிறன் சிதைவு: பல நேரங்களில் குழந்தையின் மழலை மாறாத கதைகளை விட, சந்தையில் விற்கக்கூடிய ஒரு படைப்பாக மாற்ற பெற்றோர்கள் மேற்கொள்ளும் அதிகப்படியான தலையீடு, குழந்தைகளின் இயல்பான படைப்பாற்றலைச் சிதைத்து விடுகின்றன.

• AI-யின் நிழல்: செயற்கை நுண்ணறிவின் உதவியுடன் புத்தகங்களை உருவாக்கும்போது, குழந்தையின் நிஜமான உழைப்பு அங்கே கேள்விக்குறியாகிறது. இது குழந்தைக்கு “சுலபமாக எதையும் சாதித்துவிடலாம்” என்ற தவறான எண்ணத்தை விதைக்கும்.

• மன அழுத்தம்: விளையாட வேண்டிய வயதில் ஒரு இலக்கை நோக்கி அவர்களை ஓட வைப்பது, அவர்களுக்குத் தேவையற்ற மன அழுத்தத்தை உருவாக்கும்.

மொத்தத்தில்

திறமையுள்ள குழந்தைகளை அடையாளம் கண்டு ஊக்குவிப்பதில் தவறில்லை. ஆனால், அந்த ஊக்குவிப்பு என்பது குழந்தைகளின் சுய விருப்பத்திலிருந்து பிறக்க வேண்டுமே தவிர, பெற்றோரின் கௌரவப் பந்தயத்திற்காக இருக்கக் கூடாது. பிஞ்சுக் கைகள் பேனா பிடிப்பது அழகுதான், அது அவர்களுக்குச் சுமையாக மாறாமல் இருப்பதே அந்தப் படைப்பிற்கும், குழந்தைக்கும் செய்யும் உண்மையான மரியாதை.

தனுஜா