🇱🇰 இலங்கை வெள்ளப் பாதிப்பு: தொற்று நோய்த் தடுப்பு நடவடிக்கைகள் குறித்த மருத்துவரின் வழிகாட்டுதல்

டாக்டர். அ. ப. ஃபரூக் அப்துல்லா, பொது நல மருத்துவர், சிவகங்கை அவர்களின் அறிவுரைகள்.

‘திட்வா’ புயலின் தாக்கத்தால் இலங்கையின் பல பகுதிகளில் வெள்ளம், நீர் தேங்குதல் மற்றும் நிலச்சரிவு ஏற்பட்டு மக்களின் இயல்பு வாழ்க்கை பாதிக்கப்பட்டுள்ளது. நூற்றுக்கும் மேற்பட்ட மரணங்களும், பலர் காணாமல் போயிருப்பதும் குறித்துக் காணும் போது மனம் பதறுகிறது.

இலங்கை மக்கள் அனைவரும் இந்தப் பேரிடரில் இருந்து விரைவில் மீண்டு வர மனதாரப் பிரார்த்திப்போம். நம்மால் இயன்ற உதவிகளை நம் அண்டை நாட்டுச் சகோதரர்களுக்குச் செய்வோம்.

இந்நிலையில், பெருவெள்ளங்களின் போதும் அதற்குப் பின்பும், தேங்கி நிற்கும் நீரால் பல நோய்கள் உண்டாக வாய்ப்பு உண்டு. அவற்றைத் தவிர்க்கச் சில முன்னெச்சரிக்கைகள் அவசியம்.

1. பாதுகாப்பான குடிநீரை உறுதி செய்தல்

• காய்ச்சிப் பருகவும்: தண்ணீரை எப்போதும் காய்ச்சி வடிகட்டிப் பருக வேண்டும். குளோரினேற்றம் செய்யப்பட்டு விநியோகிக்கப்பட்டாலும், தண்ணீரை நன்றாகக் காய்ச்ச வேண்டும். குறைந்தபட்சம் ஐந்து நிமிடங்கள் நீர்க்குமிழ்கள் தோன்றுமளவுக்குக் காய்ச்சிப் பருக வேண்டும்.

• மாசடைந்த நீரைச் சுத்திகரிக்கும் எளிய முறை (குளோரினேற்றம்):

  • 1% ஸ்டாக் சொல்யூசன் தயாரித்தல்: 35 கிராம் ப்ளீச்சிங் பவுடரை 1 லிட்டர் நீரில் கலந்தால், 1% ஸ்டாக் சொல்யூசன் கிடைக்கும்.

  • கலக்கும் அளவு:

    • 1 லிட்டர் நீருக்கு: 0.6 மில்லி ஸ்டாக் சொல்யூசன்

    • 10 லிட்டர் நீருக்கு: 6 மில்லி

    • 100 லிட்டர் நீருக்கு: 60 மில்லி

    • 1,000 லிட்டர் நீருக்கு: 600 மில்லி

  • கலந்த பிறகு, அரை மணிநேரம் அப்படியே விட்டு விட்டுப் பயன்படுத்தலாம். குளோரினேற்றம் செய்யப்பட்ட, காய்ச்சிய நீரைப் பருகுவதே பாதுகாப்பானது.

வயிற்றுப்போக்குக்கான அவசர நடவடிக்கை: 

• வயிற்றுப்போக்கு ஏற்பட்டால், உடனடியாக ஓ.ஆர்.எஸ். (ORS) எனும் உப்புக் கரைசல் திரவத்தைப் பருகி வர வேண்டும்.

• தாமதிக்காமல் மருத்துவமனைகளுக்குச் சிகிச்சைக்காகச் செல்ல வேண்டும். சுயமருத்துவம் ஆபத்தானது. முறையான சிகிச்சை விரைவில் கிடைத்தால், நோயில் இருந்து மீண்டு வரும் காலம் குறையும்.

2. பாதப் பாதுகாப்பு மற்றும் ‘ட்ரென்ச் ஃபுட்’ தடுப்பு

• பாதணிகள் அவசியம்: சகதிகளில் வெறும் கால்களை நீண்ட நேரம் வைத்திருப்பதால் சேற்றுப்புண் தோன்றும் வாய்ப்பு உண்டு. இதனால் கால்கள் ஊறிப்போய் “Trench Foot” எனும் (முதல் உலகப்போரில் பதுங்குக் குழிகளில் ஏற்பட்ட) பாதிப்பு வரலாம். கட்டாயம் பாதணி அல்லது ஷூ அணிந்திருப்பது நல்லது.

• நெகிழிப்பை: சகதியில் நடக்க நேரும் போது, நெகிழிப்பையைக் கணுக்கால் வரை நன்றாக இறுக்கமாகக் கட்டிக்கொண்டு நடக்கலாம்.

• நீரிழிவு நோயாளிகளுக்கு எச்சரிக்கை: குறிப்பாக நீரிழிவு நோய் உள்ளவர்கள், இதன் மூலம் அதிகப் பாதிப்புக்கு உள்ளாகலாம். அவர்கள் மிகவும் கவனமாக இருக்க வேண்டும்.

3. காயம் மற்றும் விஷக்கடி முதலுதவி

• காயம் ஏற்பட்டால்: தேங்கிக்கிடக்கும் நீரில் வெறும் கால்களில் நடக்கும் போது, கால்களில் உள்ள கல், முள் குத்தி காயம் ஏற்படலாம். உடனடியாக அருகில் உள்ள அரசு ஆரம்ப சுகாதார நிலையத்தை அணுகி டி.டி (டெட்டானஸ்) தடுப்பூசி போட்டுக்கொள்ள வேண்டும்.

• சேற்றுப் புண் சிகிச்சை: சேற்றுப் புண் ஏற்பட்டால் க்ளோட்ரிமசோல் களிம்பு (Clotrimazole) / விட்ஃபீல்டு களிம்பு (Whitfield’s Ointment) பூசிக் கொள்ளவும்.

• விஷக்கடி: கால்களில் ஏதேனும் கடித்த உணர்வு ஏற்பட்டால் அலட்சியப்படுத்தாமல், உடனடியாக மருத்துவமனைக்குச் செல்ல வேண்டும். பாம்புக்கடியாக இருக்கலாம். கையில் தடி வைத்துக் கொண்டு தரையில் தட்டி அதிர்வுகளை ஏற்படுத்திக் கொண்டே நடப்பது ஊர்வன விலங்குகள் விலகிச் செல்ல உதவும்.

4. காய்ச்சல் மற்றும் கொசுக்கடி தடுப்பு

• கொசு ஒழிப்பு: வீட்டைச் சுற்றிச் சிறிய பாத்திரங்களில், தேங்காய் சிரட்டைகளில், டயர்களில் தண்ணீர் தேங்காமல் பார்த்துக் கொள்ளவும். ஏனெனில் அதில் டெங்கு பரப்பும் ஏடிஸ் கொசு முட்டையிட்டு வளரும்.

• தண்ணீரை மூடி வைக்கவும்: குடங்கள், பாத்திரங்களில் தண்ணீர் சேமித்து வைத்திருந்தால், அவற்றை மூடி போட்டு அல்லது துணி வைத்து வேடு கட்டி வைக்கவும். தண்ணீருக்குள் கொசுப் புழுக்கள் நெளிந்தால், அந்தத் தண்ணீரை உடனே கொட்டிவிட வேண்டும்.

• காய்ச்சல் அறிகுறிகள்: காய்ச்சல், இருமல், சளி, தலைவலி, கண் சிவந்து போதல், செந்நிறப் படை போன்ற அறிகுறிகள் தோன்றினால், தாமதிக்காமல் அருகில் உள்ள ஆரம்ப சுகாதார நிலையத்தை அணுகிச் சிகிச்சை எடுக்க வேண்டும். சுயமருத்துவம் கூடாது.

• தடுப்பு நடவடிக்கைகள்: கொசுக்கடியில் இருந்து தப்பிக்க கொசுவத்திச் சுருள் உபயோகிக்கலாம். முழுக்கை சட்டைகள் மற்றும் கால்களை முழுவதுமாக மறைக்கும் பேண்ட் அணிவது நல்லது.

5. சிறப்பு கவனிப்பு தேவைப்படுவோர்

• குழந்தைகள்: பிறந்து ஒரு வருடத்துக்குள் இருக்கும் குழந்தைகளுக்குக் காய்ச்சல், சளி, இருமல் போன்ற அறிகுறிகள் தோன்றினால், உடனடியாக மருத்துவ சிகிச்சை கிடைக்கச் செய்ய வேண்டும்.

• கர்ப்பிணிகள்: நிறைமாதக் கர்ப்பிணிகள் தங்கள் பிரசவ தேதியை நெருங்கினால், வெள்ளம் வடிந்த பிறகு செல்லலாம் என்று காத்திருக்காமல், முன்கூட்டியே அவர்களை அருகில் உள்ள அரசு மருத்துவமனைகளில் அனுமதித்து கண்காணிக்க வேண்டும். தாமதிப்பது தாய்க்கும் சேய்க்கும் ஆபத்தாக முடியும்.

6. நிவாரணப் பணியாளர்களுக்கான எச்சரிக்கை

• ரேபிஸ் தடுப்பூசி: நாய்கள், பூனை கடித்து விடும் சூழல் ஏற்பட்டால், உடனே ஆரம்ப சுகாதார நிலையத்தை அணுகி ரேபிஸ் தடுப்பூசியை அட்டவணைப்படி முறையாகப் போட்டுக் கொள்ள வேண்டும்.

• எலிக்காய்ச்சல் தடுப்பு: வெள்ள மீட்புப் பணிகளில் ஈடுபடுபவர்கள், எலிக்காய்ச்சலுக்கு (Leptospirosis) முன்கூட்டிய தடுப்பு மாத்திரையான டாக்சிசைக்ளின் 100 மில்லி கிராம் மாத்திரையை, காலை மற்றும் இரவு ஒரு வாரம் உட்கொள்ள வேண்டும். இவை உணவு மூலம் நோய் தொற்று பரவுவதைத் தடுக்கும்.

இந்தப் பெருவெள்ள நிகழ்வைக் கடந்து மீண்டு வர இலங்கையுடன் துணை நிற்போம்.