ரோகித் சர்மா டெஸ்ட் கிரிக்கெட்டிலிருந்து ஓய்வு!

இந்திய டெஸ்ட் கிரிக்கெட் அணியின் கேப்டன் ரோகித் சர்மா, இன்று (மே 7, 2025) டெஸ்ட் கிரிக்கெட்டிலிருந்து உடனடியாக ஓய்வு பெறுவதாக அறிவித்துள்ளார். தனது இன்ஸ்டாகிராம் பக்கத்தில் அவர் இந்த அறிவிப்பை வெளியிட்டுள்ளார்.

அவர் தனது பதிவில் கூறியிருப்பதாவது:

“அனைவருக்கும் வணக்கம், நான் டெஸ்ட் கிரிக்கெட்டிலிருந்து ஓய்வு பெறுகிறேன் என்பதை உங்களுடன் பகிர்ந்து கொள்ள விரும்புகிறேன். வெள்ளை உடையில் எனது நாட்டிற்காக விளையாடியது எனக்குப் பெருமையானது. இத்தனை ஆண்டுகளாக நீங்கள் அளித்த அன்புக்கும் ஆதரவுக்கும் நன்றி. நான் ஒருநாள் போட்டிகளில் இந்தியாவை தொடர்ந்து பிரதிநிதித்துவப்படுத்துவேன்.”

38 வயதான ரோகித் சர்மா, தனது டெஸ்ட் கிரிக்கெட் வாழ்க்கையின் இரண்டாவது பாதியில் மிகச் சிறந்த பேட்ஸ்மேனாக விளங்கினார். அவர் 67 டெஸ்ட் போட்டிகளில் விளையாடி 40.57 சராசரியுடன் 4301 ரன்கள் குவித்துள்ளார். இதில் 12 சதங்களும், 18 அரை சதங்களும் அடங்கும். அவர் அதிகபட்சமாக 212 ரன்கள் எடுத்தார்.

விராட் கோலியிடமிருந்து கேப்டன் பதவியை 2022 இல் ஏற்ற பிறகு, ரோகித் சர்மா 24 டெஸ்ட் போட்டிகளில் இந்திய அணியை வழிநடத்தியுள்ளார். இதில் 12 வெற்றிகளும், 9 தோல்விகளும் அடங்கும். அவரது தலைமையில், இந்தியா உலக டெஸ்ட் சாம்பியன்ஷிப் இறுதிப் போட்டிக்கு முன்னேறியது குறிப்பிடத்தக்கது.

இந்த அறிவிப்பு வருவதற்கு சில மணி நேரங்களுக்கு முன்பு, இங்கிலாந்துக்கு எதிரான டெஸ்ட் தொடருக்கான இந்திய அணியின் கேப்டன் பதவியிலிருந்து ரோகித் சர்மா நீக்கப்படலாம் என்று செய்திகள் வெளியானது குறிப்பிடத்தக்கது. சமீபத்திய டெஸ்ட் போட்டிகளில் அவரது மோசமான ஆட்டமே இதற்குக் காரணம் என்று கூறப்பட்டது. 2024 ஆம் ஆண்டில் அவர் விளையாடிய 8 டெஸ்ட் போட்டிகளில் 15 இன்னிங்ஸ்களில் வெறும் 10.93 சராசரியை மட்டுமே வைத்திருந்தார்.

ரோகித் சர்மா 2013 ஆம் ஆண்டு மேற்கிந்திய தீவுகளுக்கு எதிராக கொல்கத்தாவில் தனது டெஸ்ட் கிரிக்கெட் வாழ்க்கையைத் தொடங்கினார். அறிமுக போட்டியிலேயே அவர் 177 ரன்கள் குவித்தது குறிப்பிடத்தக்கது.

அவர் டெஸ்ட் கிரிக்கெட்டிலிருந்து ஓய்வு பெற்றாலும், ஒருநாள் போட்டிகளில் இந்திய அணிக்காக தொடர்ந்து விளையாடுவார் என்று அறிவித்துள்ளார். ஏற்கனவே அவர் டி20 போட்டிகளிலிருந்தும் கடந்த ஆண்டு ஓய்வு பெற்றது குறிப்பிடத்தக்கது.

ரோகித் சர்மாவின் இந்த திடீர் முடிவு இந்திய கிரிக்கெட் வட்டாரத்தில் அதிர்ச்சியை ஏற்படுத்தியுள்ளது. இங்கிலாந்துக்கு எதிரான டெஸ்ட் தொடருக்கான புதிய கேப்டன் யார் நியமிக்கப்படுவார் என்ற எதிர்பார்ப்பு தற்போது அதிகரித்துள்ளது. ஜஸ்பிரித் பும்ரா, கே.எல். ராகுல், ஷுப்மன் கில் மற்றும் ரிஷப் பந்த் ஆகியோர் கேப்டன் பதவிக்கான போட்டியில் இருக்கலாம் என்று கருதப்படுகிறது.