ஏர் இந்தியா:மகாராஜாவிற்கு அக்னிப் பரீட்சை! மீண்டு வருமா டாடாவின் கனவு?

டாடா குழுமம் ஏர் இந்தியாவைக் கைப்பற்றியபோது, இந்திய விமானப் போக்குவரத்துத் துறையில் ஒரு புதிய விடியல் பிறக்கும் என்று ஒட்டுமொத்த தேசமும் எதிர்பார்த்தது. ஆனால், இரண்டு ஆண்டுகள் கடந்த நிலையில், அந்த எதிர்பார்ப்பு இப்போது ஒரு மிகப்பெரிய கேள்விக் குறியாக மாறியிருக்கிறது. பெரும் நஷ்டம், கோர விபத்து, தலைமை மாற்றங்கள் என ஏர் இந்தியா தற்போது ஒரு மிக நெருக்கடியான ‘டர்ன்-அரவுண்ட்’ (Turnaround) கட்டத்தில் தவித்துக் கொண்டிருக்கிறது.

நிதி நெருக்கடியும் பிரம்மாண்ட நஷ்டமும்

ஏர் இந்தியாவின் வரவு செலவு கணக்குகள் தற்போது கவலை அளிக்கும் வகையில் உள்ளன. 2025-26 நிதியாண்டில் மட்டும் அந்த நிறுவனம் சுமார் 2.4 பில்லியன் டாலர் (சுமார் ₹22,000 கோடி) நஷ்டத்தைச் சந்தித்துள்ளது. பழைய விமானங்களை நவீனப்படுத்துதல், புதிய விமானங்களுக்கான முன்பதிவு மற்றும் நிர்வாகச் சீர்திருத்தங்கள் எனப் பல கோடி முதலீடு செய்யப்பட்டும், எதிர்பார்த்த வருவாய் இன்னும் எட்டாக்கனியாகவே உள்ளது.

பாதுகாப்பு குறித்த அச்சங்கள்

நிறுவனத்தின் நற்பெயருக்கு ஏற்பட்ட மிகப்பெரிய அடி, கடந்த 2025 ஜூன் 12 அன்று அகமதாபாத்தில் நிகழ்ந்த போயிங் 787 ரக விமான விபத்து. இதில் 240-க்கும் மேற்பட்ட உயிர்கள் பலியானது சர்வதேச அளவில் அதிர்ச்சியை ஏற்படுத்தியது. இதனைத் தொடர்ந்து நடத்தப்பட்ட தணிக்கையில் (Audit), பாதுகாப்பு தொடர்பான 50-க்கும் மேற்பட்ட குறைபாடுகள் கண்டறியப்பட்டுள்ளன. பயணிகளின் பாதுகாப்பு குறித்த இந்தத் தரவு, நிறுவனத்தின் நம்பகத்தன்மையைப் பெரிதும் பாதித்துள்ளது.

தலைமைத்துவ இடைவெளி

கப்பல் புயலில் சிக்கியிருக்கும் வேளையில், அதன் மாலுமி விலகுவது போன்ற சூழல் ஏர் இந்தியாவிற்கு ஏற்பட்டுள்ளது. நிறுவனத்தின் சிஇஓ-வாக இருந்த கேம்ப்பெல் வில்சன் (Campbell Wilson) தனது பதவியிலிருந்து விலகுவதாக அறிவித்திருப்பது நிர்வாக ரீதியாகப் பெரும் பின்னடைவை ஏற்படுத்தியுள்ளது. புதிய தலைமை அமையும் வரை திட்டமிடப்பட்ட மாற்றங்களைச் செயல்படுத்துவதில் தேக்கநிலை ஏற்பட வாய்ப்புள்ளது.

புவிசார் அரசியல் மற்றும் எரிபொருள் சுமை

ஏர் இந்தியாவிற்குச் சொந்தப் பிரச்சினைகள் ஒருபுறம் இருக்க, உலகளாவிய சூழலும் கை கொடுக்கவில்லை:

• வான்வெளி சிக்கல்: பாகிஸ்தான் தனது வான்வெளியை மூடியதால், மேற்கத்திய நாடுகளுக்குச் செல்லும் விமானங்கள் நீண்ட தூரம் சுற்றிச் செல்ல வேண்டியுள்ளது.

• போர் பதற்றம்: மத்திய கிழக்கில் நிலவும் போர்ச் சூழல் காரணமாக விமான எரிபொருள் விலை விண்ணைத் தொட்டுள்ளது. இது ஏற்கனவே நஷ்டத்தில் இருக்கும் நிறுவனத்திற்கு மேலும் சுமையை ஏற்றியுள்ளது.

எதிர்கால நம்பிக்கை: நிதி உதவியும் பிடிவாதமும்

இந்த இக்கட்டான சூழலிலிருந்து மீள, டாடா குழுமம் மற்றும் அதன் பங்குதாரரான சிங்கப்பூர் ஏர்லைன்ஸ் ஆகியோரிடம் கூடுதல் நிதி உதவி கோரி ஏர் இந்தியா பேச்சுவார்த்தை நடத்தி வருகிறது. டாடா குழுமத்தின் பிடிவாதமான முயற்சியும், பாதுகாப்புத் தரத்தை உலகத் தரத்திற்கு உயர்த்துவதும் மட்டுமே ‘மகாராஜா’வை மீண்டும் அரியணையில் அமர்த்தும்.

நிர்வாகத் திறமைக்கும், செலவு மேலாண்மைக்கும் இது வெறும் பின்னடைவு அல்ல; டாடா குழுமத்திற்கு விடப்பட்ட ஒரு மிகப்பெரிய சவால்

ரமாபிரபா