‘ஹாட் ஸ்பாட் 2 மச் ‘படத்தின் வெற்றி விழாத் துளிகள்!

விக்னேஷ் கார்த்திக் இயக்கத்தில் அஸ்வின் குமார், பிரியா பவானி சங்கர் என ஒரு பெரும் நட்சத்திரப் பட்டாளமே நடித்து ஜனவரி 23 அன்று வெளியான ‘ஹாட் ஸ்பாட் 2 மச்’ (Hot Spot 2 Much) திரைப்படம், வசூல் மற்றும் விமர்சன ரீதியாகப் பெரும் வெற்றி பெற்றுள்ளது. இந்த மகிழ்ச்சியைப் பகிர்ந்து கொள்ளும் விதமாகப் படக்குழுவினர் சென்னையில் பிரம்மாண்ட வெற்றி விழாவை ஒருங்கிணைத்தனர்.

அவ்விழாவில் படக்குழுவினர் பகிர்ந்த சுவாரஸ்யமான தகவல்கள் இதோ:

உழைப்பால் உயர்ந்த அஸ்வின் குமார்!

ஒளிப்பதிவாளர் ஜோசப் பால் பேசுகையில், அஸ்வின் குமாரின் அர்ப்பணிப்பைப் பாராட்டித் தள்ளினார். “முதலில் தயக்கம் இருந்தது, ஆனால் அஸ்வினின் உழைப்பு பிரமிக்க வைத்தது. காலை 7 மணி படப்பிடிப்பு என்றால், அவர் 5:30 மணிக்கே தயாராக இருப்பார். அவரின் இந்த ஒழுக்கம் படத்தின் தரத்தை உயர்த்தியது,” என்றார். மேலும், தயாரிப்பாளர் பாலாமணி மார்பன் மற்றும் விநியோகஸ்தர் செந்தில் ஆகியோரின் பங்களிப்பிற்கும் அவர் நன்றி தெரிவித்தார்.

சமூகப் பொறுப்பும்… துணிச்சலான கதாபாத்திரங்களும்!

படத்தின் நாயகிகள் தங்கள் அனுபவங்களைப் பகிர்ந்து கொண்டனர்:

• பிரிகிடா சகா: “இந்தக் கதையில் நான் ஒரு லெஸ்பியன் என்று பேசும் வசனம் வரும்போது முதலில் தயங்கினேன். ஆனால், உணர்வுகள் என்பது பொதுவானது. பெற்றோர்கள் இதைப்புரிந்து கொள்ள வேண்டும் என்ற சமூகச் செய்தியை இப்படம் பேசுகிறது,” என நெகிழ்ச்சியுடன் தெரிவித்தார்.

• பவானி ஸ்ரீ: “நல்ல கன்டென்ட் இருந்தால் ரசிகர்கள் கொண்டாடுவார்கள் என்பதற்கு இப்படம் ஒரு சாட்சி. திருச்சி தமிழகத்தின் இரண்டாவது தலைநகராக மாற்றப்படும் என முதல்வர் சொன்னது போலவே, இந்தப் படத்தின் வெற்றிக் செய்தியும் மகிழ்ச்சி அளிக்கிறது,” என்றார்.

• சஞ்சனா திவாரி: தனது கதாபாத்திரத்திற்கு ரசிகர்கள் அளித்த வரவேற்பு எதிர்பாராத ஒன்று எனவும், இது தனக்குப் பெரும் நம்பிக்கையைத் தந்துள்ளதாகவும் குறிப்பிட்டார்.

அஸ்வின் குமாரின் நெகிழ்ச்சி!

நடிகர் அஸ்வின் குமார் பேசுகையில், “இயக்குநர் விக்னேஷ் கார்த்திக்கை எனது நண்பராகவும், வழிகாட்டியாகவும் பார்க்கிறேன். அவர் என் மீது வைத்த நம்பிக்கையே இந்த வெற்றி. தயாரிப்பாளர் பேசிய சம்பளத்தை முழுமையாக வழங்கிவிட்டார், இது ஒரு நடிகராக எனக்கு நெகிழ்ச்சியைத் தருகிறது,” என்றார்.

இயக்குநர் விக்னேஷ் கார்த்திக்கின் பதிலடி!

இயக்குநர் விக்னேஷ் கார்த்திக் மேடையில் சில விமர்சனங்களுக்குக் காட்டமான பதில்களை அளித்தார்:

• வசூல் சாதனை: படத்தின் முதல் பாகத்தின் மொத்த வசூலை விட, இரண்டாம் பாகம் வெளியான நான்கு நாட்களிலேயே இரண்டு மடங்கு வசூலித்துள்ளது. 200-க்கும் மேற்பட்ட திரையரங்குகளில் படம் வெற்றிகரமாக ஓடிக்கொண்டிருக்கிறது.

• ரசிகர்கள் மோதல்: “நாங்கள் குறிப்பிட்ட சில நட்சத்திரங்களின் ரசிகர்களை மட்டும் விமர்சிக்கவில்லை. இணையத்தில் நடக்கும் தேவையற்ற மோதல்களைப் பொதுவாகவே சுட்டிக்காட்டியுள்ளோம்,” என விளக்கமளித்தார்.

• சூடோ ஃபெமினிஸ்ட்டுகள்: “துண்டு வீடியோக்களை மட்டும் பார்த்துவிட்டு விமர்சிக்கும் ‘சூடோ ஃபெமினிஸ்ட்டுகள்’ படத்தைப் முழுமையாகப் பார்க்க வேண்டும். ஒரு படைப்பாளனாகச் சமூகப் பொறுப்புடன் தான் இந்தப் படத்தை உருவாக்கியுள்ளேன். எனக்குப் படைப்புச் சுதந்திரம் உண்டு,” எனத் துணிச்சலாகப் பேசினார்.

தயாரிப்பாளர் பாலாமணி மார்பன் பேசுகையில், படம் வெளியான இரண்டாவது நாளே திரையரங்குகள் நிரம்பி வழிந்ததாகவும், சென்னை, கோவை போன்ற இடங்களில் 90% மேலான வரவேற்பு இருப்பதாகவும் பெருமிதத்துடன் தெரிவித்தார்.