32°C
விளம்பரம்
Advertisement

46 ஆண்டுகளுக்குப் பிறகு புதிய பரிமாணத்தில் ‘சங்கராபரணம்’!

admin சேலம் Published: November 15, 2026 3 நிமிட வாசிப்பு Running News
எழுத்து அளவு:

செய்தியைக் கேட்க
தமிழ் குரல் / AI Voice



இந்தியத் திரையுலக வரலாற்றில் காலத்தால் அழியாத இசைக் காவியமாகப் போற்றப்படும் ‘சங்கராபரணம்’ திரைப்படம், 46 ஆண்டுகளுக்குப் பிறகு அதிநவீன தொழில்நுட்பத்தில் மெருகூட்டப்பட்டு உலகெங்கும் உள்ள திரையரங்குகளில் இம்மாதம் மீண்டும் வெளியாகிறது. பீப்பிள்’ஸ் பிலிம் அகாடமி மற்றும் சேனல் ஃபைவ் நிறுவனங்கள் இணைந்து, இத்திரைப்படத்தைத் தமிழ் மற்றும் மலையாள மொழிகளில் மேம்படுத்தப்பட்ட 4கே அல்ட்ரா ஹெச்.டி (4K Ultra HD) காட்சித் தரம் மற்றும் 7.1 சரவுண்ட் ஒலி அமைப்புடன் புதுப்பொலிவுடன் வெளியிடுகின்றனர். இத்திரைப்படத்தின் புதிய டிஜிட்டல் பதிப்பை ஸ்ரீலால் தேவராஜ் மிகுந்த கலைநேர்த்தியுடன் உருவாக்கியுள்ளார்.

கலாபூர்ணா கே. விஸ்வநாத்தின் உன்னதப் படைப்பு

1980-ஆம் ஆண்டு பிப்ரவரி 2-ஆம் தேதி, இயக்குநர் சிகரம் கே. விஸ்வநாத் இயக்கத்தில் வெளியான ‘சங்கராபரணம்’, வெறும் திரைப்படமாக மட்டுமல்லாமல் இந்தியப் பாரம்பரியக் கலைகளின் மறுமலர்ச்சிக்கு வித்திட்ட ஒரு பண்பாட்டு ஆவணமாகத் திகழ்ந்தது. மேற்கத்திய இசையின் தாக்கம் மேலோங்கத் தொடங்கியிருந்த காலகட்டத்தில், கர்நாடக சங்கீதத்தின் மேன்மையையும், ஒரு கலைஞனின் ஆன்மிகத் தேடலையும், குரு-சிஷ்ய பாரம்பரியத்தின் புனிதத்தையும், மனித உறவுகளின் ஆழத்தையும் மிக உணர்வுபூர்வமாகப் பதிவு செய்தது இப்படம்.

பூர்ணோதயா மூவி கிரியேஷன்ஸ் சார்பில் ஏடிட நாகேஸ்வர ராவ் தயாரித்த இப்படத்தில், ‘சங்கர சாஸ்திரி’ எனும் முதன்மைப் பாத்திரத்தில் ஜே.வி. சோமயாஜுலு வாழ்ந்து காட்டியிருப்பார். அவருடன் மஞ்சு பார்கவி, ராஜ்யலட்சுமி, துளசி, சந்திரமோகன், அல்லு ராமலிங்கய்யா உள்ளிட்ட பலர் தங்களின் அபாரமான நடிப்பால் கதாபாத்திரங்களுக்கு உயிர் கொடுத்திருப்பர். பல தசாப்தங்களைக் கடந்தும் இசை ரசிகர்களின் மனங்களில் நீங்கா இடம்பிடித்துள்ள இத்திரைப்படம், இன்றும் ஒரு மகத்தான திரையனுபவமாகத் திகழ்கிறது.

கே.வி. மகாதேவன் – எஸ்.பி.பி உருவாக்கிய இசை மாயாஜாலம்

‘சங்கராபரணம்’ திரைப்படத்தின் ஆன்மாவாகத் திகழ்வது ‘திரையிசைத் திலகம்’ கே.வி. மகாதேவனின் இணையற்ற இசையும், ‘பாடும் நிலா’ எஸ்.பி. பாலசுப்பிரமணியத்தின் மயக்கும் குரலும்தான். பாரம்பரிய கர்நாடக இசைப் பயிற்சி முறைப்படி இசையைக் கற்றிராத எஸ்.பி.பி., இப்படத்தின் பாடல்களைப் பாடிய விதம் ஒட்டுமொத்த இசை உலகையும் வியப்பில் ஆழ்த்தியது.

குறிப்பாக, ‘சங்கரா நாதசரீராபரா…’ பாடல் இந்தியத் திரையிசை வரலாற்றில் என்றும் போற்றப்படும் ஓர் இசைச் சிகரமாக விளங்குகிறது. அதுமட்டுமின்றி, ‘ஓங்கார நாதானு’, ‘ப்ரோசேவாரெவருரா’, ‘மானச சஞ்சரரே’, ‘சாமஜவரகமனா’, ‘தொரகுனா இடுவண்டி சேவா’ போன்ற பாடல்கள் தலைமுறைகள் பல கடந்தும் ரசிகர்களை மெய்மறக்கச் செய்து, இசை ரசிகர்களின் இதயங்களில் இன்றளவும் ஒலித்துக்கொண்டிருக்கின்றன. இப்படத்திற்காக கே.வி. மகாதேவன், எஸ்.பி. பாலசுப்பிரமணியம் மற்றும் பின்னணிப் பாடகி வாணி ஜெயராம் ஆகிய மூவருக்கும் தேசிய விருதுகள் கிடைத்தது இப்படத்தின் இசை வலிமைக்குச் சான்றாகும்.

தேசிய விருதுகளும் சர்வதேச அங்கீகாரமும்

இந்திய இசையின் பாரம்பரியத்தையும், அதன் உன்னதமான பண்பாட்டு விழுமியங்களையும் உலகறியச் செய்த இத்திரைப்படம், தேசிய மற்றும் சர்வதேச அளவில் பல்வேறு சிறப்புகளைப் பெற்றுள்ளது. 1980-ஆம் ஆண்டுக்கான சிறந்த பொழுதுபோக்குத் திரைப்படத்திற்கான தேசிய விருதை (ஸ்வர்ண கமல்) வென்ற ‘சங்கராபரணம்’, அன்றைய குடியரசுத் தலைவர் நீலம் சஞ்சீவ ரெட்டியிடம் இருந்து தங்கப் பதக்கத்தையும் பெற்றது.

மேலும், குடியரசுத் தலைவர் மாளிகையில் சிறப்புத் திரையிடல் செய்யப்பட்ட பெருமையையும் இத்திரைப்படம் பெற்றுள்ளது. ஆந்திரப் பிரதேச அரசின் ‘நந்தி’ விருதுகளை அள்ளிக் குவித்ததோடு, பிரான்ஸ் நாட்டின் ‘பெசன்சோன்’ (Besançon) திரைப்பட விழாவில் பரிசு வென்ற முதல் இந்தியத் திரைப்படம் என்ற வரலாற்றுச் சாதனையையும் ‘சங்கராபரணம்’ படைத்தது குறிப்பிடத்தக்கது.

புதிய தலைமுறைக்கான அரிய திரையனுபவம்

தற்போது 4கே அல்ட்ரா ஹெச்.டி மற்றும் 7.1 சரவுண்ட் ஒலித் தொழில்நுட்பத்தில் மெருகேற்றப்பட்டுள்ள ‘சங்கராபரணம்’, ரசிகர்களுக்கு முற்றிலும் புதிய, பிரம்மாண்டமான திரையனுபவத்தை வழங்கவுள்ளது. குறிப்பாக, எஸ்.பி. பாலசுப்பிரமணியத்தின் என்றும் இனிமை குறையாத தெய்வீகக் குரலையும், பாலு மகேந்திராவின் ஒளிப்பதிவில் மிளிர்ந்த காட்சிகளையும் நவீன ஒலி-ஒளி அமைப்பில் பெரிய திரையில் கேட்டு ரசிப்பது இசை ரசிகர்களுக்கு மறக்க முடியாத விருந்தாக அமையும்.

ஆக மொத்தம் இத்திரைப்படத்தின் மறுவெளியீடு, ஏற்கெனவே இப்படத்தைப் பார்த்து ரசித்த மூத்த தலைமுறை ரசிகர்களுக்குத் தங்களின் இனிய பழைய நினைவுகளை மீண்டும் திரையில் கொண்டாடும் வாய்ப்பாக அமையும். அதேவேளையில், இன்றைய இளம் தலைமுறையினருக்கும் இந்தியத் திரையிசையின் உன்னதமான படைப்புகளில் ஒன்றான ‘சங்கராபரணம்’ திரைப்படத்தின் பெருமையையும், அதன் காலத்தால் அழியாத இசை மாயாஜாலத்தையும் பெரிய திரையில் அனுபவிக்கும் அரிய வாய்ப்பை வழங்கும் என்பதில் ஐயமில்லை.

admin
சேலம்

செய்தியாளர் குழு. உடனுக்குடன் உண்மைச் செய்திகளை வழங்கும் முன்னணி செய்தியாளர்.

உடனடி செய்திகள்