மராட்டிய அரசியலின் ‘தாதா’ அஜித் பவார் விமான விபத்தில் மறைவு!

மும்பை: மகாராஷ்டிர அரசியலில் பல தசாப்தங்களாக அசைக்க முடியாத சக்தியாக விளங்கிய துணை முதலமைச்சர் அஜித் பவார் (66), இன்று காலை பாராமதி விமான நிலையத்தில் நடந்த கோரமான விமான விபத்தில் காலமானார். இந்தச் செய்தி ஒட்டுமொத்த இந்திய அரசியல் களத்தையும் பேரதிர்ச்சியில் ஆழ்த்தியுள்ளது.

விபத்து நடந்தது எப்படி?

இன்று காலை சுமார் 8.45 மணியளவில் இந்தத் துயரச் சம்பவம் நிகழ்ந்துள்ளது. மும்பையிலிருந்து பாராமதி நோக்கிப் புறப்பட்ட VT SSK ரக சிறிய ரக விமானத்தில் அஜித் பவார் பயணம் செய்தார். அவருடன் அவரது உதவியாளர் ஒருவர், பாதுகாப்பு அதிகாரி மற்றும் இரண்டு விமானிகள் என மொத்தம் 5 பேர் இருந்துள்ளனர். பாராமதி வான்பரப்பில் பறந்து கொண்டிருந்தபோது ஏற்பட்ட தொழில்நுட்பக் கோளாறு காரணமாக, விமானி அவசரமாகத் தரையிறக்க முயன்றுள்ளார். அப்போது கட்டுப்பாட்டை இழந்த விமானம் தரையில் மோதி தீப்பிடித்து சிதறியது. விபத்தின் கோரத்தை விளக்கும் வீடியோக்கள் சமூக வலைதளங்களில் வெளியாகி காண்போரை நிலைகுலையச் செய்துள்ளன.

அஜித் பவார்: ஒரு அரசியல் ஆளுமையின் வரலாறு

மகாராஷ்டிர அரசியலின் ‘கிங் மேக்கர்’ என்று புகழப்படும் சரத் பவாரின் அண்ணன் மகனாகத் தனது அரசியல் பயணத்தைத் தொடங்கியவர் அஜித் பவார். ஆனால், மிக விரைவில் தனது நிர்வாகத் திறமையால் ‘அஜித் தாதா’ என்று மக்களால் அன்போடு அழைக்கப்படும் அளவிற்குத் தனக்கென ஒரு தனி இடத்தைப் பிடித்தார்.

ஆரம்பக்காலம்:

1959-ம் ஆண்டு ஜூலை 22-ல் அகமதுநகரில் பிறந்த அஜித் பவார், கூட்டுறவுத் துறையின் மூலம் பொதுவாழ்வில் நுழைந்தார். 1991-ல் பாராமதி தொகுதியிலிருந்து நாடாளுமன்ற உறுப்பினராகத் தேர்ந்தெடுக்கப்பட்ட அவர், பின்னர் தனது சித்தப்பா சரத் பவாருக்காகப் பதவியைத் துறந்து மாநில அரசியலில் கவனம் செலுத்தினார்.

நிர்வாகத் திறமையும் சாதனைகளும்:

மகாராஷ்டிர சட்டமன்றத்திற்கு 1991 முதல் தொடர்ந்து தேர்ந்தெடுக்கப்பட்டு வரும் இவர், மாநில வரலாற்றிலேயே அதிக முறை (6 முறை) துணை முதலமைச்சராகப் பணியாற்றியவர் என்ற சாதனையைப் படைத்தவர். நிதி, நீர்ப்பாசனம் மற்றும் மின்சாரம் போன்ற கடினமான துறைகளை மிக நுணுக்கமாகக் கையாண்டவர். இவரது நிர்வாகத்தின் கீழ் பாராமதி தொகுதி ஒரு முன்மாதிரித் தொகுதியாக உருமாறியது.

அரசியல் அதிரடிகள்:

அஜித் பவாரின் அரசியல் பாதை சவால்கள் நிறைந்தது. 2019-ல் அதிகாலை வேளையில் பாஜகவுடன் இணைந்து துணை முதல்வராகப் பதவியேற்றது முதல், 2023-ல் தேசியவாத காங்கிரஸ் கட்சியில் ஏற்பட்ட பிளவு வரை, இவர் எடுத்த அதிரடி முடிவுகள் மராட்டிய அரசியலின் திசையையே மாற்றியவை. எதார்த்தமான பேச்சு, எடுத்த காரியத்தை முடிக்கும் வேகம் என அஜித் பவார் ஒரு தனித்துவமான தலைவராகத் திகழ்ந்தார்.

ஈடு செய்ய முடியாத இழப்பு:

விவசாயிகளின் நலன் மற்றும் மாநிலத்தின் உள்கட்டமைப்பு மேம்பாட்டில் அதிக அக்கறை காட்டிய ஒரு தலைவரை மகாராஷ்டிரா இன்று இழந்துள்ளது. அவரது மறைவு தேசியவாத காங்கிரஸ் கட்சிக்கும், மராட்டிய மாநிலத்திற்கும் ஈடு செய்ய முடியாத பேரிழப்பாகும்.

ஆந்தை ரிப்போர்ட்டர் குழுமம் சார்பில், மறைந்த தலைவர் அஜித் பவாருக்கு எமது ஆழந்த இரங்கல்களைத் தெரிவித்துக் கொள்கிறோம்.

வாத்தீ அகஸ்தீஸ்வரன்