உங்கள் படுக்கை விரிப்பில் ஒளிந்திருக்கும் ‘சைலன்ட்’ கில்லர்!

“படுக்கையில் அமர்ந்து சாப்பிட்டால் கெட்ட கனவுகள் வரும்” என்று நம் பெரியவர்கள் சொன்னதைக் கேட்டிருப்போம். ஆனால், அதன் பின்னால் இருக்கும் உண்மை ‘கனவு’ சார்ந்தது அல்ல; ‘கிருமிகள்’ சார்ந்தது. நம் கண்களுக்குத் தெரியாத கோடிக்கணக்கான நுண்கிருமிகளும், பூஞ்சைகளும் நாம் உறங்கும் படுக்கையிலேயே ஒளிந்திருக்கின்றன என்பதுதான் அதிர்ச்சிகரமான உண்மை. ஆரோக்கியமான உறக்கத்திற்கு மெத்தை எவ்வளவு முக்கியமோ, அதைவிட முக்கியம் அந்த மெத்தையின் தூய்மை.

1. கண்களுக்குத் தெரியாத அழுக்கு: ஒரு நுண்ணுயிரி உலகம்!

பல நாட்களாக மாற்றப்படாத படுக்கை விரிப்புகள் பார்ப்பதற்கு சுத்தமாகத் தோன்றலாம். ஆனால், அதில் நமது உடலில் இருந்து உதிரும் இறந்த செல்கள் (Dead Skin Cells), வேர்வை மற்றும் காற்றில் இருக்கும் நுண்ணிய தூசுகள் படிந்திருக்கும். இவை ‘டஸ்ட் மைட்ஸ்’ (Dust Mites) எனப்படும் கண்ணுக்குத் தெரியாத பூச்சிகள் வளர ஏதுவான சூழலை உருவாக்குகின்றன. இதுவே அலர்ஜி மற்றும் ஆஸ்துமா போன்ற சுவாசப் பிரச்சினைகளுக்குத் தொடக்கப் புள்ளியாக அமைகிறது.

2. ஆய்வுகள் சொல்லும் அதிரடித் தகவல்!

படுக்கை விரிப்புகள் மற்றும் தலையணைகள் குறித்து மேலைநாடுகளில் நடத்தப்பட்ட ஆய்வுகள் சில கசப்பான உண்மைகளை வெளிச்சம் போட்டுக் காட்டுகின்றன:

• தொற்று பரவும் அபாயம்: ‘சாலிட் லினன்ஸ்’ (Solid Linens) எனப்படும் படுக்கைத் துணிகள் வழியாகப் பல்வேறு நோய்த்தொற்றுகள் மனிதர்களுக்குப் பரவ வாய்ப்புள்ளதாக ஆய்வுகள் தெரிவிக்கின்றன.

• தலையணைகளில் பூஞ்சை: ஐரோப்பிய ஒவ்வாமை மற்றும் மருத்துவ நோய் எதிர்ப்பு இதழ் (European Journal of Allergy and Clinical Immunology) வெளியிட்டுள்ள ஆய்வின்படி, தலையணைகள் பூஞ்சைகளின் (Fungi) இருப்பிடமாக உள்ளன. 

• பழைய தலையணைகள்: 1.5 ஆண்டுகள் முதல் 20 ஆண்டுகள் வரை பயன்படுத்தப்பட்ட தலையணைகளைச் சோதனை செய்ததில், அவை பழையதாக ஆக பூஞ்சைகளின் வளர்ச்சி பன்மடங்கு அதிகரிப்பது கண்டறியப்பட்டுள்ளது. குறிப்பாகச் செயற்கை இழை (Synthetic) மற்றும் இறகுகளால் ஆன தலையணைகளில் இந்த பாதிப்பு அதிகம்.

3. படுக்கையில் சாப்பிடுவது ஏன் ஆபத்து?

படுக்கையில் அமர்ந்து சாப்பிடும்போது சிந்தும் சிறு உணவுத் துகள்கள், பாக்டீரியாக்களுக்கு விருந்தாகின்றன. இது தொற்றுநோய்களை உருவாக்குவதுடன், உறக்கத்தின் போது ஒருவித அசௌகரியத்தையும் ஏற்படுத்தும். இது நேரடியாக உங்கள் மனநலத்தையும், ஆழ்ந்த உறக்கத்தையும் பாதிக்கிறது.

ஆரோக்கியத்தைப் பாதுகாக்க சில எளிய வழிமுறைகள்:

• வாரம் ஒருமுறை: படுக்கை விரிப்புகள் மற்றும் உறைகளை வாரம் ஒருமுறையாவது வெந்நீரில் துவைப்பது அவசியம்.

• தலையணைகளை மாற்றவும்: 2 ஆண்டுகளுக்கு ஒருமுறை பழைய தலையணைகளை மாற்றி புதியவற்றை வாங்குவது சிறந்தது.

• வெயில் அவசியம்: மெத்தை மற்றும் தலையணைகளை அவ்வப்போது வெயிலில் உலர்த்துவதன் மூலம் பூஞ்சை மற்றும் பாக்டீரியாக்களை அழிக்க முடியும்.

நினைவில் கொள்க: நீங்கள் ஒரு நாளைக்கு 7 முதல் 8 மணி நேரம் செலவிடும் இடம் உங்கள் படுக்கை. அது சுத்தமாக இல்லையென்றால், நீங்கள் நோய்களை விலைக்கு வாங்குகிறீர்கள் என்று அர்த்தம்!

தனுஜா