வரலாற்றின் ஆறாத வடு: சர்வதேச இனப்படுகொலை நினைவு நாள்!

“மனிதாபிமானம் மரணித்த நாட்கள்” என்று வரலாற்றால் வர்ணிக்கப்படும் இரண்டாம் உலகப் போரின் ஒரு பகுதிதான் ‘ஹோலோகாஸ்ட்’ (Holocaust) எனப்படும் இனப்படுகொலை. அதிகார மதம் பிடித்த ஒரு கூட்டம், சுமார் 60 லட்சம் அப்பாவி உயிர்களைத் திட்டமிட்டு அழித்த கொடூரத்தை நினைவுகூரும் நாளாக சர்வதேச இனப்படுகொலை நினைவு தினம் Holocaust Remembrance Day  என்ற பெயரில்  ஜனவரி 27 அனுசரிக்கப்படுகிறது. இந்த நாள்,  வெறுப்பு அரசியலின் விளைவு எவ்வளவு பயங்கரமானது என்பதை உலகுக்கு உணர்த்தும் ஒரு எச்சரிக்கை மணியாகும்.

1. நாஜிக்களின் நச்சுத் திட்டம்

இரண்டாம் உலகப் போர் நடைபெற்ற 1941 முதல் 1945 வரையிலான காலப்பகுதியில், அடோல்ஃப் ஹிட்லர் தலைமையிலான நாஜிப் படைகள் ‘இனத் தூய்மை’ என்ற போர்வையில் யூதர்களைக் குறிவைத்தன.

• ஐரோப்பா முழுவதும் இருந்த யூதர்கள், ரோமானிய ஜிப்சிகள், ஊனமுற்றோர் மற்றும் அரசியல் எதிரிகள் வேட்டையாடப்பட்டனர்.

• அவர்கள் அனைவரும் தரம் பிரிக்கப்பட்டு, கால்நடைகளை ஏற்றிச் செல்லும் ரயில்களில் அடைக்கப்பட்டு சித்திரவதை முகாம்களுக்குக் கொண்டு செல்லப்பட்டனர்.

2. அவுஷ்விட்ஸ்: மரணத்தின் நுழைவாயில்

போலந்தில் அமைக்கப்பட்டிருந்த ‘அவுஷ்விட்ஸ்-பிர்க்கெனாவ்’ (Auschwitz-Birkenau) என்ற முகாம், உலகிலேயே மிகக் கொடூரமான கொலைக்களமாக இருந்தது.

• இங்கு கொண்டு வரப்பட்டவர்களில் முதியவர்கள், குழந்தைகள் மற்றும் பலவீனமானவர்கள் உடனடியாகத் தனிமைப்படுத்தப்பட்டனர்.

• பின்னர், குளிக்கச் செல்வதாகக் கூறி ‘கேஸ் சேம்பர்’ (Gas Chambers) எனப்படும் விஷவாயு அறைகளுக்குள் தள்ளப்பட்டு கொடூரமாகக் கொல்லப்பட்டனர்.

• இந்த ஒரே முகாமில் மட்டும் சுமார் 11 லட்சம் பேர் கொல்லப்பட்டதாக வரலாறு கூறுகிறது.

3. விடுதலையின் விடியல்: ஜனவரி 27, 1945

இரண்டாம் உலகப் போரின் இறுதியில் நாஜிப்படைகள் பின்னடைவைச் சந்தித்தன. 1945-ஆம் ஆண்டு ஜனவரி 27-ஆம் நாள், சோவியத் யூனியனின் செம்படைகள் (Red Army) போலந்திற்குள் நுழைந்தன.

• அவுஷ்விட்ஸ் முகாமின் கதவுகளை உடைத்து உள்ளே சென்றபோது, அங்கே உயிருக்குப் போராடிக்கொண்டிருந்த சுமார் 7,600 கைதிகள் மீட்கப்பட்டனர்.

• அந்த விடுதலையின் நாளையே, 2005-ஆம் ஆண்டில் ஐக்கிய நாடுகள் சபை ‘சர்வதேச இனப்படுகொலை நினைவு நாளாக’ (International Holocaust Remembrance Day) அறிவித்தது.

4. நாம் கற்க வேண்டிய பாடம்

இந்த நினைவு நாள் என்பது வெறும் அஞ்சலி செலுத்துவதற்கான நாள் மட்டுமல்ல.

• ஒரு குறிப்பிட்ட இனத்தின் மீதோ அல்லது மதத்தின் மீதோ வளர்க்கப்படும் வெறுப்பு, ஒட்டுமொத்த மனித குலத்திற்கே எப்படிப்பட்ட பேரழிவைத் தரும் என்பதற்கான சாட்சியம் இது.

• “மீண்டும் ஒருமுறை இது நிகழக் கூடாது” (Never Again) என்பதே இந்த நாளின் அடிப்படை நோக்கமாகும்.

குறிப்பு:

இன்று நாம் அனுபவிக்கும் அமைதி, லட்சக்கணக்கான மக்களின் ரத்தத்தாலும் கண்ணீராலும் ஆனது என்பதை நினைவில் கொள்வோம்.

நிலவம் ரெங்கராஜன்