🌍 உலக சதுப்பு நில தினம்: பூமியின் சிறுநீரகங்கம் நமது எதிர்காலமும்

காடுகளைப் பூமியின் ‘இதயம்’ என்று வர்ணித்தால், சதுப்பு நிலங்களை அதன் ‘ஈரல்’ (Liver) என்று தாராளமாகச் சொல்லலாம். ஒரு நாட்டின் ஆரோக்கியமான சூழலியலுக்குக் காடுகள் எவ்வளவு முக்கியமோ, அந்த அளவிற்குச் சதுப்பு நிலங்கள் எனப்படும் ஈர நிலங்களும் (Wetlands) இன்றியமையாதவை. இன்று -பிப்ரவரி 2 உலக சதுப்பு நில தினம் (world wetlands day) கடைபிடிக்கப்படுவதையொட்டி, அவற்றின் மகத்துவத்தை விரிவாகக் காண்போமா?.

📍 ஈரநிலங்கள் என்றால் என்ன?

கடலுக்கும் நிலப்பகுதிக்கும் இடையே ஆழம் குறைந்த, ஆண்டு முழுவதும் நீர் தேங்கியிருக்கும் நிலப்பரப்புகளைச் சதுப்பு நிலங்கள் என்கிறோம். இதில் ஆறுகள், ஏரிகள், குளங்கள், நெல்வயல்கள், பவளத் திட்டுகள், கழிமுகங்கள் மற்றும் அலையாத்திக் காடுகள் (Mangroves) உள்ளிட்ட பல வகைகள் அடங்கும்.

📜 ராம்சர் உடன்படிக்கை (Ramsar Convention)

1971-ம் ஆண்டு பிப்ரவரி 2-ம் தேதி, ஈரான் நாட்டின் ராம்சர் நகரில் ஈரநிலங்களின் அழிவைத் தடுத்து அவற்றைப் பாதுகாப்பது குறித்த சர்வதேச ஆலோசனைக் கூட்டம் நடைபெற்றது. அதன் நினைவாகவே ஒவ்வொரு ஆண்டும் பிப்ரவரி 2-ம் தேதி ‘உலக ஈரநில நாள்’ கொண்டாடப்படுகிறது.

• 161 நாடுகள் உறுப்பினர்களாக உள்ள இந்த அமைப்பில் இந்தியாவும் ஒரு முக்கிய உறுப்பினர்.

• உலகளவில் சுமார் 1,950 சிறப்பான சதுப்பு நிலங்கள் பட்டியலிடப்பட்டுள்ளன. இதில் இந்தியாவில் 25 இடங்கள் உள்ளன (குறிப்பாக தமிழ்நாட்டில் கோடியக்கரை மற்றும் பழவேற்காடு ஆகியவை இப்பட்டியலில் இடம்பெற்றுள்ளன).

🛡️ சதுப்பு நிலங்களின் அசாத்திய பணிகள்

சதுப்பு நிலங்கள் வெறும் ‘வீணான நிலங்கள்’ அல்ல; அவை ஒட்டுமொத்த உயிர்ச்சங்கிலியின் பாதுகாப்பு கவசம்:

1. பேரழிவுத் தடுப்பு: சுனாமி போன்ற ஆழிப்பேரலைகளின் சீற்றத்தைத் தடுப்பதில் அலையாத்திக் காடுகள் ஆற்றிய பணி மகத்தானது. கடற்கரையோரங்களில் கொட்டப்படும் கான்கிரீட் கற்களை விட இவை ஆயிரம் மடங்கு வலிமையானவை.

2. நீர் சுத்திகரிப்பு: இவை நீரை வடிகட்டி நன்னீராக மாற்றும் இயற்கைச் சுத்திகரிப்பு நிலையங்களாகச் செயல்படுகின்றன. நிலத்தடி நீர்மட்டத்தை உயர்த்த இவை மிக அவசியம்.

3. கார்பன் சேமிப்பு: சுற்றுச்சூழல் மாசை ஏற்படுத்தும் கார்பனைச் சேமித்து வைத்து, புவி வெப்பமடைவதைக் குறைக்க உதவுகின்றன.

4. பல்லுயிர் பெருக்கம்: நத்தைகள், சேறு நண்டு, சிங்கி இறால், பால் இறால், நீர்ப்பல்லி மற்றும் பல்வேறு அரிய வகை பறவை இனங்களுக்கு இவை வாழ்விடமாகத் திகழ்கின்றன.

⚠️ சந்திக்கும் சவால்கள் மற்றும் அழிவு

துரதிர்ஷ்டவசமாக, ‘எதற்கும் உதவாத நிலம்’ என்ற நமது அலட்சியத்தால் சதுப்பு நிலங்கள் பெரும் ஆபத்தில் உள்ளன:

• ஆக்கிரமிப்புகள்: பெருகி வரும் நகர்மயமாக்கல், ரியல் எஸ்டேட், தொழிற்சாலைகள் மற்றும் சுற்றுலாத்தலங்கள் அமைப்பால் இவை அழிக்கப்படுகின்றன.

• மாசுபாடு: பிளாஸ்டிக் கழிவுகள் மற்றும் நச்சுக்கழிவுகள் நிலத்தையும் நீரையும் பாழாக்குகின்றன.

• பொருளாதார மதிப்பு: தமிழகத்தில் உள்ள சதுப்பு நிலங்களின் தற்போதைய பொருளாதார மதிப்பு சுமார் ₹4,500 கோடி ஆகும். எதிர்காலத்தில் இது ₹18,000 கோடியாக உயரும் என வல்லுநர்கள் கணித்துள்ளனர். இருப்பினும், இதன் மதிப்பு தெரியாமல் நாம் இவற்றை அழித்து வருகிறோம்.

💡 இந்த ஆண்டின் மையக்கருத்து

ஆண்டுதோறும் ஒரு விழிப்புணர்வு வாசகத்தை ராம்சர் அமைப்பு வெளியிடும். அந்த வகையில் 2026ஆம் ஆண்டுக்கான கருப்பொருள் (Theme): “Wetlands and traditional knowledge: Celebrating cultural heritage” தமிழில்: “சதுப்பு நிலங்கள் மற்றும் பாரம்பரிய அறிவு: கலாச்சார பாரம்பரியத்தை கொண்டாடுதல்” இந்த ஆண்டு கருப்பொருள், சதுப்பு நிலங்கள் (wetlands) மற்றும் அவற்றுடன் தொடர்புடைய பாரம்பரிய அறிவு முறைகள், கலாச்சார பழக்கங்கள், மரபுகள் ஆகியவற்றுக்கு இடையேயான ஆழமான தொடர்புகளை வலியுறுத்துகிறது. பூர்வீக மக்கள் மற்றும் உள்ளூர் சமூகங்கள் நூற்றாண்டுகளாக சதுப்பு நிலங்களை பாதுகாத்து, நிலையான முறையில் பயன்படுத்தி வந்த பாரம்பரிய அறிவை கொண்டாடுவதும், அவற்றை நவீன பாதுகாப்பு முயற்சிகளுடன் இணைப்பதும் இதன் முக்கிய நோக்கமாகும்.

📝 கடமை

ஒரு சின்ன சிறகடிப்பு புயலையே கிளப்பும் என்கிறது ‘கேயாஸ் தியரி’ (Chaos Theory). நாம் செய்யும் சிறு சூழலியல் தவறுகளும் நமது சந்ததியைப் பாதிக்கும். சதுப்பு நிலங்களைச் சேதப்படுத்தாமல் பாதுகாப்பது நம் ஒவ்வொருவரின் கடமையாகும். ஏனெனில், நம் எதிர்காலப் பாதுகாப்பும் பூமியின் ஆரோக்கியமும் இந்த ஈரநிலங்களில்தான் புதைந்துள்ளன.

ரமாபிரபா