உலக மரண தண்டனை எதிர்ப்பு தினம்!

ஆண்டுதோறும் அக்டோபர் 10 ஆம் நாள் உலக மரண தண்டனை எதிர்ப்பு நாள் (World Day Against the Death Penalty) கடைப்பிடிக்கப்படுகிறது. மரண தண்டனையை ஒழிப்பதற்கான உலகளாவிய இயக்கத்தை வலுப்படுத்துவதும், மரண தண்டனையின் மனித உரிமை மீறல் தன்மையை எடுத்துரைப்பதும் இதன் முதன்மைக் குறிக்கோள்களாகும்.

மரண தண்டனை எதிர்ப்பு நாளின் தோற்றம்

2002 ஆம் ஆண்டு மே 13 அன்று ரோம் நகரில் கூடிய ‘மரண தண்டனைக்கு எதிரான உலகக் கூட்டமைப்பு’ (World Coalition Against the Death Penalty) என்ற அரசு சார்பற்ற அமைப்புகளின் கூட்டத்தில் ஒரு முக்கியத் தீர்மானம் நிறைவேற்றப்பட்டது. அதில், மரண தண்டனையை ரத்து செய்யவும், அதற்கெதிரான இயக்கத்தை வளர்க்கவும் உறுதி பூணப்பட்டது.

இதன் தொடர்ச்சியாக, 2003 ஆம் ஆண்டு அக்டோபர் 10 முதல், ஒவ்வொரு ஆண்டும் அக்டோபர் 10 ஆம் நாளை உலக மரண தண்டனை எதிர்ப்பு நாளாகக் கடைப்பிடிப்பது என்று இந்தக் கூட்டமைப்பு அறிவித்தது.

மரண தண்டனை என்றால் என்ன?

மரண தண்டனை என்பது, ஒரு அதிகார நிறுவனம் தனது சட்ட நடவடிக்கைகளூடாக மனிதர் ஒருவரின் உயிர் வாழ்வைப் பறிக்கும் தண்டனை ஆகும்.

இது, மனிதர் இழைக்கும் குற்றம் அல்லது தவறு அவரின் உடல் சார்ந்த செயல்பாடாகப் புரிந்துகொள்ளப்பட்ட தொன்மைக்காலத் தண்டனை முறைகளில் ஒன்றாகும். திருட்டைச் செய்த மனிதரின் கை துண்டிக்கப்படுதல் போன்ற தொன்மைக்காலத் தண்டனை முறைகளுக்கும் மரண தண்டனைக்கும் இடையிலான கோட்பாட்டு அடிப்படை ஒன்றேயாகும்.

மரண தண்டனை நிறைவேற்றப்பட்ட முறைகள்

வரலாற்றில் மரண தண்டனை நிறைவேற்றப்பட்ட முறைகள் நாட்டுக்கு நாடும், காலத்துக்குக் காலமும் வேறுபட்டு வந்துள்ளன. அவற்றில் சில:

• தலையை வாளினால் துண்டித்தல்
• தூக்கில் இடுதல் (Hanging)
• கழுவில் ஏற்றுதல்
• கல்லால் எறிந்து கொல்லுதல்
• கம்பத்தில் கட்டி வைத்துச் சுடுதல் அல்லது துப்பாக்கியால் சுடுதல் (Firing Squad)
• மின்னதிர்ச்சி கொடுத்தல் (Electric Chair)
• நஞ்சூட்டுதல் (Lethal Injection)

மரண தண்டனைக்குரிய குற்றங்கள்

மிகப் பழைய காலம் முதலே கொலை போன்ற கடுமையான குற்றங்களுக்கு மரண தண்டனை விதிக்கப்பட்டு வந்துள்ளது. இது தவிர, மரண தண்டனைக்குரிய குற்றங்களாகக் கருதப்பட்டவை:

• தேசத்துரோகம்
• அரசுக்கு அல்லது அரசனுக்கு எதிரான சதி செய்தல்
• அரசு சார்பான சமயங்களுக்கு எதிரான குற்றங்கள் (சில சமூகங்களில்)
• பாலியல் குற்றங்கள் (சில சமூகங்களில்)
• தற்காலத்தில், சில நாடுகளில் போதை மருந்துகளைக் கடத்துதல் போன்றவையும் மரண தண்டனைக்கு உரிய குற்றங்களாக ஆக்கப்பட்டுள்ளன.

உலகளாவிய நிலைப்பாடு

மரண தண்டனை நவீன நீதிமுறைகளின் அடிப்படைக் கோட்பாடுகளுக்கு எதிரானது என்ற கருத்து வலுப்பெற்ற பின்னர், பல நாடுகள் இதனை ஒழித்துவிட்டன. பெரும்பாலான ஐரோப்பிய நாடுகளில் இப்போது மரண தண்டனை விதிக்கப்படுவது இல்லை.

ஐக்கிய நாடுகள் சபையின் (ஐ.நா) உறுப்பு நாடுகளும், ஐ.நா பார்வையாளர் தகுதியுடைய நாடுகளுமான 195 நாடுகளில், சர்வதேச மன்னிப்பு சபையின் (Amnesty International) கருத்துப்படி:

• 100 நாடுகள் (51%) மரண தண்டனையை முற்றாக ஒழித்துவிட்டன.
• 7 நாடுகள் (4%) விதிவிலக்கான சூழ்நிலைகளில் (போர் நேரம் போன்ற) மட்டுமே மரண தண்டனையை விரும்புகின்றன.
• 48 நாடுகள் (25%) சாதாரணக் குற்றங்களுக்காக மரண தண்டனைப் பயன்பாட்டை அனுமதிக்கின்றன.
• 40 நாடுகள் (20%) சட்ட நடைமுறையில் மரண தண்டனையைப் பராமரிக்கின்றன.

மரண தண்டனைக்கு எதிரான உலகக் கூட்டமைப்பு

மரண தண்டனைக்கு எதிரான உலகக் கூட்டமைப்பு (World Coalition Against the Death Penalty) என்பது, மரண தண்டனைக்கு எதிராகக் குரல் கொடுக்கும் அரசு சார்பற்ற அமைப்புகள், வழக்குரைஞர் கழகங்கள், தொழிற்சங்கங்கள் மற்றும் உள்ளூராட்சி அமைப்புகள் போன்றவைகளின் கூட்டமைப்பாகும். இதன் முக்கிய நோக்கங்கள்:

• மரண தண்டனைக்கு எதிரான இயக்கத்தை உலகளாவிய அளவில் வளர்த்தெடுத்தல்.
• பன்னாட்டு அமைப்புக்கள் மற்றும் அரசுகளின் ஆதரவைத் திரட்டல்.
• மரண தண்டனைக்கு எதிராகப் பன்னாட்டு நிகழ்வுகளை ஏற்பாடு செய்தல்.
• தேசிய மற்றும் பிராந்தியக் கூட்டுறவை வலுப்படுத்துதல்.

மரண தண்டனை என்பது, மனித உயிரை எடுக்கும் தண்டனையாக மட்டுமின்றி, மனித உரிமைகளுக்கு எதிரானது என்ற நிலைப்பாட்டை உலகிற்கு உணர்த்துவதே உலக மரண தண்டனை எதிர்ப்பு நாளின் முக்கியச் செயல்பாடாகும்.

வாத்தீ அகஸ்தீஸ்வரன்