கதை உள்ள கமர்சியல் படம் ‘வடம்’:இசை வெளியீட்டு விழாவில் விமல் நெகிழ்ச்சி!

மாசாணி பிக்சர்ஸ் தயாரிப்பில், இயக்குநர் கேந்திரன். வி இயக்கத்தில், விமல் – நட்டி நட்ராஜ் இணைந்திருக்கும் ‘வடம்’ திரைப்படத்தின் இசை வெளியீட்டு விழா சென்னையில் கோலாகலமாக நடைபெற்றது. டி. இமான் இசையமைத்துள்ள இந்தப் படம், கிராமிய வீர விளையாட்டான ‘வடமஞ்சு விரட்டு’ பின்னணியில் உருவாகியுள்ளது.

எனக்கு நல்ல மனசுள்ள ஹீரோவா இருந்தா போதும்!

விழாவில் பேசிய நாயகன் விமல், “எனக்கு மாஸ் ஹீரோ பிம்பம் எல்லாம் வேண்டாம், நல்ல மனசுள்ள ஹீரோவாக இருந்தால் போதும். நம்மை நம்பிப் பணம் போடும் தயாரிப்பாளருக்கு லாபம் பெற்றுத் தருவதே என் இலக்கு. இந்தப் படத்தில் என்னுடன் நடித்த ‘பாண்டி முனி’ என்ற காளைக்குத் தான் முதல் நன்றி சொல்ல வேண்டும். இது வெறும் கமர்சியல் படம் மட்டுமல்ல, வலுவான கதை கொண்ட படம்,” என யதார்த்தமாகப் பேசினார்.

தயாரிப்பாளரின் மனிதாபிமானம்

படப்பிடிப்பின் போது நடந்த ஒரு நெகிழ்ச்சியான சம்பவத்தை விமல் பகிர்ந்துகொண்டார். நடிகர் ரோபோ சங்கர் மறைந்தபோது, சுமார் 15 லட்சம் ரூபாய் செலவில் 1000 துணை நடிகர்களுடன் படப்பிடிப்பு நடந்து கொண்டிருந்தது. விமலால் நேரில் செல்ல முடியாத சூழலில், தயாரிப்பாளர் ராஜசேகர் அங்கேயே ரோபோ சங்கருக்கு அஞ்சலி செலுத்தி, 500 புடவைகள் தானம் மற்றும் 2000 மரக்கன்றுகள் நட்டு மனிதாபிமானத்தை வெளிப்படுத்தியதை விமல் நன்றியுடன் நினைவு கூர்ந்தார்.

படக்குழுவினரின் பகிர்வுகள்:

• தயாரிப்பாளர் ராஜசேகர்: “கிராமத்தில் பிறந்து வளர்ந்தவன் நான். மாட்டிற்கும் நமக்கும் 18 ஆண்டுகால பந்தம் உண்டு. நந்தீஸ்வரராக நாம் வணங்கும் மாட்டைப் பற்றிப் படம் எடுப்பதைப் பாக்கியமாகக் கருதுகிறேன்.”

• இசையமைப்பாளர் டி. இமான்: “இன்றைய சூழலில் பெண்களுக்கு முக்கியத்துவம் தரும் பாடல்கள் குறைந்துவிட்டன. ஆனால் இதில் நாயகிக்கு ஒரு சிறந்த ‘சோலோ’ பாடலை இயக்குநர் அமைத்துள்ளார். விமலின் இயல்பான குணம் எனக்குப் பிடிக்கும்.”

• நட்டி நட்ராஜ்: “இந்தத் திரைக்கதை கலைத்துப் போடப்பட்ட சீட்டுக்கட்டு போலச் சுவாரசியமானது. ஏரும் எருதும் தெய்வம் என்பதை இந்தப் படம் அழுத்தமாகப் பேசுகிறது.”

• இயக்குநர் கேந்திரன்: “இமான் சார் இசையமைக்கச் சம்மதித்த போதே படம் ஹிட் எனத் தெரிந்துவிட்டது. மார்ச் 6-ம் தேதி திரையில் இந்தப் படம் ஜொலிக்கும்.”

‘வடம்’ திரைப்படம் மார்ச் மாதம் 6-ம் தேதி உலகம் முழுவதும் திரையரங்குகளில் வெளியாகிறது. இதில் முனீஸ்காந்த், பால சரவணன், சனஸ்கா ஸ்ரீ உள்ளிட்ட பல நட்சத்திரங்கள் நடித்துள்ளனர்.