திரையரங்குகளில் இளைஞர்களின் பேராதரவோடு வெற்றிகரமாக ஓடிக்கொண்டிருக்கும் ‘வித் லவ்’ (With Love) திரைப்படக் குழுவினர், இன்று தமிழக முதல்வர் மாண்புமிகு மு.க. ஸ்டாலின் அவர்களை நேரில் சந்தித்து வாழ்த்துப் பெற்றனர். சௌந்தர்யா ரஜினிகாந்தின் ‘Zion Films’ மற்றும் ‘MRP Entertainment’ இணைந்து வழங்க, பசிலியான் நாசரேத் மற்றும் மகேஷ் ராஜ் பசிலியான் தயாரிப்பில் உருவான இப்படம் கடந்த பிப்ரவரி 6-ஆம் தேதி வெளியானது. வெளியானது முதல் இன்று வரை அரங்கம் நிறைந்த காட்சிகளாக நடைபோட்டு வரும் நிலையில், இந்த வெற்றியைப் பகிர்ந்து கொள்ளும் விதமாகத் தயாரிப்பாளர்கள் முதல்வரைச் சந்தித்தனர்.
இந்தச் சந்திப்பின் போது, படத்தின் கதைக்களம் மற்றும் மக்களிடையே கிடைத்துள்ள வரவேற்பு குறித்து தயாரிப்பாளர்கள் முதல்வரிடம் விரிவாக உரையாடினர். படக்குழுவினரின் உழைப்பையும், சமகால இளைஞர்களின் உணர்வுகளைப் பிரதிபலிக்கும் விதமாகப் படம் எடுக்கப்பட்டுள்ளதையும் பாராட்டிய முதல்வர் மு.க. ஸ்டாலின், ‘வித் லவ்’ படத்தின் வெற்றிக்குத் தனது மனமார்ந்த வாழ்த்துகளைத் தெரிவித்தார். முதல்வரின் இந்தப் பாராட்டு, திரையுலகில் வளர்ந்து வரும் இளம் கலைஞர்களுக்குப் பெரும் ஊக்கத்தை அளிப்பதாகப் படக்குழுவினர் நெகிழ்ச்சியுடன் தெரிவித்தனர்.
இன்றைய தலைமுறையின் காதல், சிக்கல்கள் மற்றும் உணர்ச்சிகளை மையமாக வைத்து உருவான இப்படத்தில் அனஸ்வரா ராஜன் நாயகியாக நடித்துள்ளார். ‘லவ்வர்’ மற்றும் ‘டூரிஸ்ட் ஃபேமிலி’ ஆகிய படங்களில் இணை இயக்குநராகப் பணியாற்றிய மதன், இப்படத்தின் மூலம் இயக்குநராக அறிமுகமாகி முத்திரை பதித்துள்ளார். ஷான் ரோல்டனின் இதமான இசை மற்றும் ஷ்ரேயாஸ் கிருஷ்ணாவின் நேர்த்தியான ஒளிப்பதிவு எனத் தொழில்நுட்ப ரீதியாகவும் படம் தரமாக அமைந்துள்ளதே, ரசிகர்களையும் விமர்சகர்களையும் ஒரே நேரத்தில் கவர்ந்ததற்குக் காரணமாகப் பார்க்கப்படுகிறது.
பிப்ரவரி 6-ஆம் தேதி உலகமெங்கும் வெளியான ‘வித் லவ்’, தற்போது இரண்டாவது வாரத்திலும் வெற்றிகரமாகத் திரையிடப்பட்டு வருகிறது. படத்தின் வசூல் வேட்டை ஒருபுறம் இருக்க, சமூக வலைதளங்களிலும் இப்படத்தின் காட்சிகள் வைரலாகி வருகின்றன. முதல்வருடனான இந்தச் சந்திப்பு படக்குழுவினருக்கு மேலும் உற்சாகத்தைத் தந்துள்ள நிலையில், வரும் நாட்களில் படத்தின் வரவேற்பு இன்னும் அதிகரிக்கும் என எதிர்பார்க்கப்படுகிறது.
