சட்டமும் நீதியும் -வெப் சீரிஸ் விமர்சனம்!

அறிவியல் வளர்ச்சியால் உலகமே உள்ளங்கையில் அடங்கிவிட்ட இக்காலத்தில், சமூகத்தின் அடிமட்ட மனிதர்களுக்கு நீதி கிடைப்பதில் இருக்கும் சவால்களைப் பலர் உணர்வதில்லை. அப்படிப்பட்ட சிக்கலான நீதித்துறைக்குள், தன் தனிப்பட்ட தயக்கங்களை உடைத்துக்கொண்டு, நியாயத்துக்காகப் போராடும் ஒரு நோட்டரி வழக்கறிஞரின் கதையை, பரபரப்பான த்ரில்லராகப் படமாக்கியிருக்கிறது ZEE5 தளத்தில் வெளியாகியுள்ள ‘சட்டமும் நீதியும்’ வெப் சீரிஸ்.

கோழை வழக்கறிஞரின் சட்டப் போராட்டம்

சட்டம் படித்திருந்தாலும், நீதிமன்றத்திற்குள் சென்று வாதாடத் தயக்கம் காட்டும் நோட்டரி வழக்கறிஞர் சுந்தரமூர்த்தி (சரவணன்) தான் இந்தக் கதையின் நாயகன். வீட்டில் மரியாதை இல்லை, சக வழக்கறிஞர்களோ கேலி செய்கிறார்கள். இத்தகைய சூழ்நிலையில், இளம் வழக்கறிஞர் அம்ரிதா அவருக்கு உதவியாளராகச் சேர்கிறார். இந்தக் கதை, ஒரு சாதாரண நிகழ்வில் இருந்து வதிப்படைகிறது. நீதிமன்ற வாசலிலேயே, தன் மகளுக்கு நீதி கேட்டு ஒரு வயதானவர் தீக்குளித்து இறக்கும் காட்சி, சுந்தரமூர்த்தியை அதிர்ச்சியில் உறைய வைக்கிறது. இது அவரை ஒரு பொதுநல வழக்கு தொடரத் தூண்டுகிறது.

எதிர்பாராத திருப்பங்களும், பரபரக்கும் நீதிமன்றக் காட்சிகளும்

சுந்தரமூர்த்தி தொடர்ந்த வழக்கில், தீக்குளித்தவர் மனநலம் பாதிக்கப்பட்டவர் என அரசு வழக்கறிஞர் வாதிட்டு வழக்கை தள்ளுபடி செய்யக் கோருகிறார். ஆனால், சுந்தரமூர்த்தி முன்வைக்கும் சில முக்கிய சட்ட அம்சங்கள் நீதிபதியால் ஏற்றுக்கொள்ளப்பட, விசாரணை சூடு பிடிக்கிறது. இங்கேதான் கதை எதிர்பாராத திருப்பங்களைச் சந்திக்கிறது. ஆதாரங்கள் இல்லாத ஒரு பொதுநல வழக்கு, நீதிபதியால் ஆட்கொணர்வு (Habeas Corpus) வழக்காக மாற்றப்படும்போது, காட்சிகள் பரபரப்பாகி, பார்வையாளர்களை இருக்கையின் நுனிக்கே கொண்டு வருகின்றன.

இந்த அத்தியாயங்களில், சரவணன் ஒரு புதிய பரிமாணத்தில் வெளிப்படுகிறார். தான் தொடர்ந்த வழக்கில் இருக்கும் பல ஓட்டைகளை அறிந்து அவர் அதிர்வது, பார்வையாளர்களுக்கும் ஒருவித திகிலைத் தருகிறது. அரசு வழக்கறிஞரின் கேள்விக்கு பதிலளிக்க முடியாமல், சரவணன் மயங்கி விழும் காட்சி, அவரது இயலாமையையும், போராட்டத்தையும் எதார்த்தமாகப் பதிவு செய்து மனதில் இடம்பிடிக்கிறது. முகத்தில் பயம் தெரிந்தாலும், வாதாடும்போது சரவணன் வெளிப்படுத்தும் கம்பீரமான குரல், அவரது உறுதியை வெளிப்படுத்தி வலு சேர்க்கிறது.

வலுவான துணை கதாபாத்திரங்களும், தொழில்நுட்பப் பக்கபலமும்

ஜூனியர் வழக்கறிஞர் அம்ரிதா, சரியான துப்பறியும் வேலைகள் செய்து சரவணனுக்குத் துணையாக நிற்பது, அவர் பொருத்தமான ஒரு உதவியாளர் என்பதை நம்ப வைக்கிறது. இவர்களின் கூட்டணியில், நீதிமன்ற வாதக் காட்சிகளும், அடையாளம் தெரியாத ஒரு பெண்ணுக்காக சரவணன் வாதாடும் காட்சிகளும் விறுவிறுப்பாக நகர்கின்றன.

இயக்குநர் பாலாஜி செல்வராஜ், இந்த வெப் சீரிஸ் எபிசோட்களை ஒரு த்ரில்லர் கதைபோல இயக்கி, “அடுத்து என்ன நடக்கப் போகிறது?” என்ற எதிர்பார்ப்பை எகிற வைக்கிறார். எழுத்தாளர் சூர்ய பிரதாப். எஸ்., விறுவிறுப்பு குறையாமல் கதையை எழுதியிருப்பது பாராட்டுக்குரியது. விபின் பாஸ்கரின் இசையும், ஒளிப்பதிவாளர் எஸ். கோகுல கிருஷ்ணனின் கேமராவும், கதையோடு ஒன்றிப் பயணித்து, பார்வையாளர்களின் கவனத்தைச் சிதறவிடாமல் காக்கின்றன.

நீதித்துறைக்கு ஒரு பாடம்?

மொத்தத்தில், ‘சட்டமும் நீதியும்’ வெப் சீரிஸ், நீதிமன்றத்திற்குள் சென்று வாதாடப் பயப்படும் வழக்கறிஞர்களுக்கு ஒரு புதுத் தைரியத்தைத் தரும். ஒரு சமூகப் பிரச்சினை, எப்படி ஒரு தனிநபரின் பயத்தைப் போக்கி, நீதிப் போராட்டத்திற்கான களமாக மாறுகிறது என்பதை, விறுவிறுப்பான திரைக்கதையுடன் சட்டமும் நீதியும் அற்புதமாகப் பதிவு செய்திருக்கிறது.