சுற்றுச்சூழல் காக்கும் எளிய புரட்சி: உலக பேப்பர் பை நாள்!

நமது அன்றாட வாழ்வில் நாம் அறியாமலேயே செய்யும் சில மாற்றங்கள், பூமியின் எதிர்காலத்தையே மாற்றியமைக்கும் வல்லமை கொண்டவை. அப்படிப்பட்ட ஒரு எளிய, ஆனால் மிக முக்கியமான மாற்றுதான் பேப்பர் பைகளின் பயன்பாடு. நெகிழி (பிளாஸ்டிக்) மாசினால் உலகம் தத்தளித்துக் கொண்டிருக்கும் இந்த வேளையில், அதற்கு மிகச்சிறந்த தீர்வாக விளங்கும் பேப்பர் பைகளின் முக்கியத்துவத்தை உணர்த்தவே ஆண்டுதோறும் ஜூலை 12-ஆம் தேதி ‘உலக பேப்பர் பை நாள்’ (World Paper Bag Day) கொண்டாடப்படுகிறது.

வரலாற்றுப் பின்னணி: பேப்பர் பையின் பிறப்பு

பேப்பர் பைகளின் வரலாறு நாம் நினைப்பதை விடவும் பழமையானது. 1852-ஆம் ஆண்டு, பிரான்சிஸ் வோல் (Francis Wolle) என்ற அமெரிக்கர் முதன்முதலில் பேப்பர் பைகளைத் தயாரிப்பதற்கான இயந்திரத்தைக் கண்டுபிடித்து அதற்கு காப்புரிமை பெற்றார்.

இதன் தொடர்ச்சியாக, 1871-ஆம் ஆண்டு மார்கரெட் நைட் (Margaret Knight) என்ற பெண்மணி, பைகளின் அடிப்பகுதி தட்டையாக இருக்கும்படி (Flat-bottomed bags) தயாரிக்கும் புதிய இயந்திரத்தை வடிவமைத்தார். நாம் இன்று கடைகளில் பரவலாகப் பயன்படுத்தும் மளிகைப் பைகளின் தந்தை இவர்தான். பின்னர், 1912-ஆம் ஆண்டு வால்டர் டுபீனர் (Walter Deubener) என்பவர் பேப்பர் பைகளில் கயிறுகளை இணைத்து, எளிதாகக் கைகளில் தூக்கிச் செல்லும் வடிவத்தைக் கொண்டு வந்தார். இந்த வரலாற்றுப் பரிணாம வளர்ச்சிதான் இன்று உலகளாவிய ஒரு சுற்றுச்சூழல் இயக்கமாக மாறியுள்ளது.

நெகிழிக்கு மாற்றாக பேப்பர் பை ஏன் அவசியம்?

பிளாஸ்டிக் பைகள் மட்குவதற்கு 500 முதல் 1000 ஆண்டுகள் வரை ஆகும் என்று சுற்றுச்சூழல் ஆய்வுகள் கூறுகின்றன. அவை மட்கும்போதும் நச்சுத்தன்மை வாய்ந்த ‘மைக்ரோ பிளாஸ்டிக்’ துகள்களாக மாறி மண், நீர் மற்றும் நாம் உண்ணும் உணவுச் சங்கிலி வரை கலந்து விடுகின்றன.

இதற்கு நேர்மாறாக, பேப்பர் பைகள் முற்றிலும் இயற்கையான மரக்கூழில் இருந்து தயாரிக்கப்படுகின்றன. இவை பயன்பாட்டிற்குப் பிறகு வெறும் 4 முதல் 6 வாரங்களுக்குள் மண்ணோடு மண்ணாக மட்கி விடுகின்றன. இதனால் மண்ணின் வளமோ, நிலத்தடி நீரோ பாதிக்கப்படுவதில்லை. விலங்கினங்கள் தவறுதலாக இவற்றை உட்கொண்டாலும் உயிருக்கு ஆபத்து ஏற்படுவதில்லை.

மறுசுழற்சி மற்றும் பொருளாதார நன்மைகள்

பேப்பர் பைகளின் மிக முக்கிய சிறப்பம்சம், அவற்றை எளிதாக மறுசுழற்சி (Recycle) செய்ய முடியும் என்பதாகும். ஒருமுறை பயன்படுத்திய பேப்பர் பைகளை மீண்டும் புதிய காகிதப் பொருட்களாக மாற்ற முடியும்.

மேலும், தற்காலத்தில் பேப்பர் பைகள் வெறும் பயன்பாட்டுப் பொருளாக மட்டுமல்லாமல், வணிக நிறுவனங்களின் பிராண்டிங் (Branding) கருவியாகவும் மாறியுள்ளன. துணிக்கடைகள், பெரு வணிக வளாகங்கள், உணவகங்கள் எனப் பல இடங்களிலும் நிறுவனத்தின் லோகோ அச்சிடப்பட்ட பேப்பர் பைகள் அவற்றின் தரத்தையும் சுற்றுச்சூழல் மீதான அக்கறையையும் வாடிக்கையாளர்களுக்கு உணர்த்துகின்றன. இது பேப்பர் பை தயாரிப்புத் தொழிலை ஒரு லாபகரமான சுயதொழிலாகவும் மாற்றியுள்ளது. பல சிறு குறு தொழில்களுக்கும், மகளிர் சுயஉதவிக் குழுக்களுக்கும் இது நல்ல வாழ்வாதாரத்தை வழங்குகிறது.

நாம் செய்ய வேண்டிய எளிய மாற்றங்கள்

உலக பேப்பர் பை நாளைக் கொண்டாடுவதன் உண்மையான நோக்கம், அதை நம் அன்றாடப் பழக்கமாக மாற்றுவதில்தான் உள்ளது.

• கடைகளுக்குச் செல்லும்போது வீட்டிலிருந்தே பேப்பர் பைகளையோ அல்லது துணிப் பைகளையோ எடுத்துச் செல்ல பழக வேண்டும்.

• வணிகர்கள் தங்கள் வாடிக்கையாளர்களுக்குப் பிளாஸ்டிக் பைகளைத் தவிர்த்து, பேப்பர் பைகளை வழங்க முன்வர வேண்டும்.

• பேப்பர் பைகள் நனைந்து கிழிந்துவிடாமல் கவனமாகக் கையாண்டால், அவற்றை மீண்டும் மீண்டும் (Reuse) பயன்படுத்தலாம்.

• பயன்படுத்த முடியாத நிலையை அடையும்போது, அதை குப்பையில் எறியாமல் மறுசுழற்சிக்கு அனுப்ப வேண்டும்.

பூமியைப் பாதுகாப்பது என்பது ஏதோ ஒரு நாட்டின் அரசாங்கமோ அல்லது உலக அமைப்புகளோ மட்டும் செய்ய வேண்டிய கடமையல்ல. தனிமனிதனாக நாம் பிளாஸ்டிக்கை மறுத்து, பேப்பர் பைகளைத் தேர்ந்தெடுக்கும் ஒவ்வொரு முறையும் இந்த பூமியின் ஆயுளைக் கொஞ்சம் கூட்டுகிறோம். ‘பிளாஸ்டிக் இல்லாத எதிர்காலம்’ என்ற இலக்கை நோக்கி நாம் எடுத்து வைக்கும் ஒவ்வொரு சிறிய அடியும், அடுத்த தலைமுறைக்கு நாம் தரும் பாதுகாப்பான வாழ்விடத்திற்கான அச்சாரமாகும்.

நிலவளம் ரெங்கராஜன்