மண்ணைக் காக்கும் ‘கிடை’ அமர்த்துதல்: ஒரு பாரம்பர்யச் சுழற்சி!

விவசாயம் செழிப்பாக வளர்வதற்கு தொன்றுதொட்டு விவசாயிகளுக்கு உதவி வருபவை மாடுகள் தான். ஏர் உழுதலில் இருந்து, உரத் தயாரிப்பு வரை மாடுகளின் பயன்கள் அளப்பரியது. விவசாயத்திற்கு மாடுகளை பயன்படுத்திய நம் முன்னோர்கள், அவற்றின் சாணம் மற்றும் கோமியத்தின் மூலம் மண்வளத்தையும் அதிகரிக்கச் செய்தனர். புதிதாக தோன்றிய நவீன விவசாயத்தில், இயற்கை உரங்களின் பயன்பாடு குறைந்தே விட்டது. மேலும், செயற்கை உரங்களின் பயன்பாடு உயர்ந்ததால் மண்வளமும் தற்போது குறைந்துள்ளது. அதையடுத்து தமிழகத்தின் கிராமப்புறங்களில் ‘கிடை போடுதல்’ அல்லது ‘பென்னிங்’ (Penning) என்பது மிக முக்கியமான ஒரு விவசாய நடைமுறை. அறுவடை முடிந்த நிலங்களில் ஆட்டு மந்தைகளையோ அல்லது மாட்டு மந்தைகளையோ இரவு நேரத்தில் தங்க வைப்பதே இதன் அடிப்படை.

இது எப்படிச் செயல்படுகிறது?

விவசாயிகள் தங்கள் நிலத்தில் ஆட்டு இடையர்களை அழைத்து வந்து மந்தையைத் தங்க வைப்பார்கள். இரவு முழுவதும் அந்த நிலத்திலேயே தங்கும் கால்நடைகளின் சிறுநீரும், சாணமும் மண்ணில் நேரடியாகக் கலக்கின்றன. இது மற்ற உரங்களை விடவும் மிக வேகமாக மண்ணோடு ஒன்றிணைந்து, மண்ணின் நுண்ணுயிர் பெருக்கத்திற்கு வழிவகுக்கிறது.

கிடை அமர்த்துவதால் கிடைக்கும் நன்மைகள்

• இயற்கை உரம்: ஒரு இரவு முழுவதும் நூற்றுக்கணக்கான ஆடுகள் ஒரு நிலத்தில் தங்கும்போது, அந்த இடமே ஒரு இயற்கை உரத் தொழிற்சாலையாக மாறுகிறது. இதில் தழைசத்து, மணிசத்து மற்றும் சாம்பல் சத்துக்கள் சரிவிகிதத்தில் மண்ணுக்குக் கிடைக்கின்றன.

• மண் தளர்வு: கால்நடைகள் நிலத்தில் நடப்பதாலும், குளம்புகளால் மண்ணைக் கிளறுவதாலும் மண்ணின் காற்றோட்டம் அதிகரிக்கிறது. இது பயிர்களின் வேர் வளர்ச்சிக்கு மிகவும் நல்லது.

• களைக் கட்டுப்பாடு: அறுவடைக்கு பின் நிலத்தில் முளைக்கும் தேவையற்ற புற்கள் மற்றும் களைகளை ஆடுகள் மேய்ந்துவிடுவதால், அடுத்த சாகுபடிக்கு நிலம் சுத்தமாகிறது.

• செலவு குறைவு: மூட்டை மூட்டையாக ரசாயன உரங்களை வாங்கி கொட்டுவதை விட, இந்த நடைமுறை விவசாயிகளுக்குச் சிக்கனமானது. அதே சமயம் கால்நடை வளர்ப்பவர்களுக்கும் இது ஒரு வருமான வாய்ப்பாக அமைகிறது.

சூழலியல் முக்கியத்துவம்

இன்றைய ‘ஈக்கோ இந்தியா’ (Eco India) பார்வையில், இது வெறும் விவசாய முறை மட்டுமல்ல; இது ஒரு வாழ்வியல் சங்கிலி. ஆடுகளுக்கு உணவு, மண்ணுக்கு உரம், மனிதனுக்கு நஞ்சில்லாத உணவு என இந்தச் சங்கிலி இயற்கையோடு இயைந்து செல்கிறது. குறிப்பாகத் தமிழகத்தின் தென் மாவட்டங்களில் இன்றும் இந்த ‘கிடை’ கலாச்சாரம் மண்ணின் ஈரப்பதத்தையும் வளத்தையும் காப்பதில் பெரும் பங்கு வகிக்கிறது.

பழைய முறைகளை நவீன அறிவியலோடு ஒப்பிட்டுப் பார்க்கும்போது, முன்னோர்களின் இந்த ‘கிடை’ நுட்பம் மண்ணை மலடாக்காமல் காக்கும் ஒரு சிறந்த தற்காப்புக் கலை என்பது தெளிவாகிறது.

நிலவளம் ரெங்கராஜன்