‘ஆவரேஜ்’ ஆசாமியா நீங்கள்? உஷார்… இது ஓடிக்கொண்டிருக்கும் உலகம்!

“கொடுத்த வேலையைச் செஞ்சோமா, சம்பளத்தை வாங்கினோமான்னு இருக்கணும்ப்பா…” – இந்த எட்டாம் காலத்து உபதேசம் இனி செல்லுபடியாகாது. ஒரு காலத்தில் நடுத்தரத் திறமை (Average skills) என்பது ஒரு பாதுகாப்பான கவசமாக இருந்தது. ஆனால், இன்றைய போட்டி நிறைந்த உலகில் ‘ஆவரேஜ்’ என்பது பாதுகாப்பான இடம் அல்ல; அது ஒரு தேக்க நிலை. சராசரியாக இருப்பதை உதறிவிட்டு, சிகரம் நோக்கி நகர வேண்டிய கட்டாயத்தில் நாம் இருக்கிறோம். ஏன்? எப்படி?

தேங்கி நிற்கும் குட்டை ஆகாதீர்கள்!

ஓடும் நதிதான் எப்போதும் சுத்தமாக இருக்கும். “எனக்குத் தெரிந்த வேலையே போதும்” என்று ஒரு வட்டத்திற்குள் முடங்கிவிடுவது, உங்களை நீங்களே அழித்துக் கொள்வதற்குச் சமம். இன்று தொழில்நுட்பம் அசுர வேகத்தில் வளர்கிறது. நேற்று நீங்கள் கற்ற ஒரு வித்தை, இன்று காலாவதியாகியிருக்கலாம். தன்னைத் தானே புதுப்பித்துக் கொள்ளாத எவரும், காலப்போக்கில் காணாமல் போய்விடுவார்கள்.

ஏஐ (AI) எனும் சவால்!

இன்று சாதாரண வேலைகளைச் செய்ய எந்திர மனிதர்களும், செயற்கை நுண்ணறிவுத் தொழில்நுட்பங்களும் தயாராகிவிட்டன. ஒரு எந்திரம் செய்யும் வேலையை விடச் சிறப்பாக அல்லது வித்தியாசமாக நீங்கள் எதைச் செய்கிறீர்கள்? எந்திரத்திடம் இல்லாத ‘படைப்பாற்றல்’ மற்றும் ‘உணர்வுப்பூர்வமான அணுகுமுறை’ உங்களிடம் இருக்கிறதா? சராசரிக்கும் மேலான உழைப்பும், அறிவும் இருந்தால் மட்டுமே நீங்கள் அசைக்க முடியாத சக்தியாக மாற முடியும்.

மதிப்பை உருவாக்குங்கள் (Create Value)

நீங்கள் செய்யும் வேலை வெறும் ‘கடமைக்காக’ இருக்கக் கூடாது. நீங்கள் அந்த இடத்தில் இருப்பதால் அந்த நிறுவனத்திற்கோ அல்லது சமூகத்திற்கோ என்ன கூடுதல் லாபம்? உங்கள் கைவண்ணம் அந்த வேலையில் எப்படித் தெரிகிறது? என்பதை யோசியுங்கள். கூட்டத்தில் ஒருவராக இருப்பதை விட, கூட்டத்தை வழிநடத்துபவராக மாறுவதே உண்மையான வெற்றி.

சராசரியைத் தாண்ட 3 மந்திரங்கள்:

• தொடர் தாகம்: அறிவுத் தாகம் எப்போதும் இருக்கட்டும். உங்கள் துறை சார்ந்த புதிய விஷயங்களை அன்றாடம் கற்றுக்கொண்டே இருங்கள்.

• ஆயத்த நிலை: வாய்ப்புகள் கதவைத் தட்டும் வரை காத்திருக்காதீர்கள். வாய்ப்பு வரும்போது அதைப் பயன்படுத்திக் கொள்ளும் அளவுக்குத் தயாராக இருங்கள்.

• துணிச்சல்: புதிய முயற்சிகளைச் செய்யத் தயங்காதீர்கள். தோல்வி அடைந்தாலும் அது உங்களுக்கு ஒரு பாடத்தைத் தரும். ஆனால் ‘ஆவரேஜ்’ ஆக இருப்பது எந்த மாற்றத்தையும் தராது.

கடிகார முட்கள் யாருக்காகவும் காத்திருப்பதில்லை. இந்த நிமிடம் முதல் உங்கள் அகராதியிலிருந்து ‘சராசரி’ என்கிற சொல்லை நீக்கிவிடுங்கள். நீங்கள் ஒரு சாதனையாளராக மாற வேண்டிய தருணம் இதுதான்!

வாத்தீ அகஸ்தீஸ்வரன்