செய்தியைக் கேட்க / Listen to News
இந்திய பொழுதுபோக்கு மற்றும் ஊடகத் துறை (E&M) சர்வதேச அளவிலான வளர்ச்சியை விட இரண்டு மடங்கு வேகத்தில் முன்னேறி வருகிறது. சர்வதேச முன்னணி தணிக்கை மற்றும் ஆலோசனை நிறுவனமான பிடபிள்யூசி (PwC India) வெளியிட்டுள்ள அண்மை அறிக்கையின்படி, இந்தியாவின் ஊடகச் சந்தை 2025 ஆம் ஆண்டில் 25.7 பில்லியன் டாலராக இருந்து, 2030 ஆம் ஆண்டிற்குள் 36.7 பில்லியன் டாலர் (இந்திய மதிப்பில் சுமார் 3.05 லட்சம் கோடி ரூபாய்) என்ற பிரம்மாண்ட நிலையை எட்டும் என்று கணிக்கப்பட்டுள்ளது. இது ஆண்டுக்கு 7.4 சதவீத கூட்டு வளர்ச்சி விகிதமாகும் (CAGR). உலகளாவிய ஊடகத் துறையின் வளர்ச்சி விகிதம் வெறும் 4 சதவீதமாக மட்டுமே இருக்கும் எனக் கணித்துள்ள சூழலில், இந்தியாவின் இந்த இரட்டை இலக்கப் பாய்ச்சல் சர்வதேச கவனத்தை ஈர்த்துள்ளது.
எண்ணிம விளம்பரங்களின் அசுர வளர்ச்சி
கடந்த சில ஆண்டுகளாக ஊடக நிறுவனங்கள் தங்கள் சேவைகளை எத்தனை கோடி மக்களிடம் கொண்டு சேர்ப்பது (Reach and Scale) என்பதில் மட்டுமே கவனம் செலுத்தி வந்தன. ஆனால் தற்போதைய சூழல் மாறி, ஈர்க்கப்பட்ட பயனர்கள் மூலம் எவ்வாறு வருவாயைப் பெருக்குவது (Monetisation and Value Creation) என்பதில் கவனம் திரும்பியுள்ளது. இந்த மாற்றத்திற்கு மிக முக்கிய காரணியாக டிஜிட்டல் விளம்பரங்கள் திகழ்கின்றன. 2025 இல் 7.5 பில்லியன் டாலராக இருக்கும் டிஜிட்டல் விளம்பரச் சந்தை, 13.9 சதவீத வருடாந்திர வளர்ச்சியுடன் 2030 இல் 14.3 பில்லியன் டாலராக உயரும். பாரம்பரிய தொலைக்காட்சி விளம்பரங்களின் வளர்ச்சி வெறும் 1 சதவீதமாக சுருங்கி வரும் வேளையில், டிஜிட்டல் வீடியோ விளம்பரங்கள் 15 சதவீத வளர்ச்சியையும், தேடல் சார்ந்த விளம்பரங்கள் (Search Ads) 14 சதவீத வளர்ச்சியையும் பதிவு செய்து வருகின்றன.
கனெக்டெட் டிவி மற்றும் ஓடிடி சந்தையின் உண்மை நிலை
வீடுகளில் இணைய வசதியுடன் கூடிய கனெக்டெட் டிவி (CTV) பயன்பாடு அதிகரித்து வருகிறது. இருப்பினும், இது பாரம்பரிய கேபிள் அல்லது டிடிஎச் தொலைக்காட்சிகளின் விளம்பர வருவாயைப் பறிக்கவில்லை மாறாக அதற்குத் துணையாகவே உள்ளது என்று பிடபிள்யூசி சுட்டிக்காட்டுகிறது. அதேபோல, ஓடிடி (OTT) தளங்களைப் பொறுத்தவரை விளம்பர அடிப்படையிலான இலவசச் சேவைகளை விட, சந்தா செலுத்திப் பார்க்கும் முறைக்கே (SVOD) இப்போதும் அதிக வருவாய் கிடைக்கிறது. 2025 இல் 2.2 பில்லியன் டாலராக இருக்கும் இந்திய ஓடிடி சந்தை, 2030 இல் 3.6 பில்லியன் டாலராக வளரும் என்று எதிர்பார்க்கப்படுகிறது. இதில் 1.5 பில்லியன் டாலருக்கும் அதிகமான பங்கு பயனர்களின் நேரடி சந்தா மூலமே கிடைக்கிறது என்பது குறிப்பிடத்தக்கது.
செயற்கை நுண்ணறிவும் கேமிங் துறையின் பங்களிப்பும்
ஊடகத் துறையின் உள்ளடக்க உருவாக்கத்தில் மட்டுமன்றி வருவாயைப் பெருக்குவதிலும் செயற்கை நுண்ணறிவின் (AI) பங்கு அதிகரித்துள்ளது. திரைப்படங்கள் மற்றும் தொடர்களில் விர்ச்சுவல் புரொடக்ஷன், பன்மொழி குரல் மாற்றம் (Multilingual Voice Modelling), பயனர்களின் ரசனைக்கு ஏற்ப உள்ளடக்கத்தைப் பரிந்துரைத்தல் போன்றவற்றிற்கு ஏஐ பெருமளவில் பயன்படுகிறது. அதேபோல், ஆன்லைன் கேமிங் மற்றும் ஈ-ஸ்போர்ட்ஸ் துறை 11.3 சதவீத வளர்ச்சியுடன் 2030-க்குள் 2.6 பில்லியன் டாலர் சந்தையாக உருவெடுக்கும்.
பிராந்திய மொழிகளின் புதிய பலம்
உலகளாவிய பல வளர்ந்த நாடுகளில் அச்சு ஊடகங்களும் பாரம்பரிய தொலைக்காட்சிகளும் சரிவைச் சந்தித்து வரும் நிலையில், இந்தியாவில் பத்திரிகைகளும் பாரம்பரிய தொலைக்காட்சிகளும் தொடர்ந்து தங்களின் இருப்பைத் தக்கவைத்து வருகின்றன. இந்திய தொலைக்காட்சித் துறையின் வருவாய் 7.2 பில்லியன் டாலரிலிருந்து 7.5 பில்லியன் டாலராகவும், செய்தித் தாள்களின் வருவாய் 3.0 பில்லியன் டாலரிலிருந்து 3.5 பில்லியன் டாலராகவும் மிதமான வளர்ச்சியைப் பதிவு செய்யும். இதற்கு இந்தியாவின் பிராந்திய மொழிகளில் செய்தி மற்றும் பொழுதுபோக்கு உள்ளடக்கங்களுக்கு இருக்கும் அசைக்க முடியாத ஆதரவே முதன்மை காரணமாகும். கிராமப்புற இணைய ஊடுருவலும், டேட்டா பயன்பாட்டு வளர்ச்சியும் இணைந்து இந்திய ஊடகத் துறையை உலக அரங்கில் புதிய உச்சத்திற்கு எடுத்துச் செல்கின்றன.
பிருத்விராஜ்
