எழுபதைத் தாண்டிய செயற்கை நுண்ணறிவு:ஒரு வரலாற்றுப் பயணம்!

இன்றைய உலகின் மிகப்பெரிய தொழில்நுட்பப் புரட்சியாகக் கருதப்படும் செயற்கை நுண்ணறிவு (AI), ஏதோ நேற்றோ அல்லது இன்றோ சட்டென்று முளைத்த தொழில் நுட்பம் அல்ல. 1955 ஆம் ஆண்டு ஆகஸ்ட் 31 ஆம் தேதி சமர்ப்பிக்கப்பட்ட ஒரு வரலாற்றுச் சிறப்புமிக்க முன்மொழிவுக் கோப்பின் மூலம்தான் “செயற்கை நுண்ணறிவு” என்ற சொல்லே உலகிற்கு அறிமுகப்படுத்தப்பட்டது. ஜான் மெக்கார்தி (Dartmouth College), மார்வின் மின்ஸ்கி (Harvard University), நதானியேல் ரோசெஸ்டர் (IBM), கிளாட் ஷான்னன் (Bell Laboratories) ஆகிய நான்கு தொலைநோக்குப் பார்வை கொண்ட ஆய்வாளர்கள் இணைந்து தயாரித்த அந்த அறிக்கையே இந்தத் துறையின் அதிகாரப்பூர்வ தொடக்கப் புள்ளியாக அமைந்தது.

டார்ட்மவுத் மாநாடும் அந்த வரலாற்று தருணமும்

1956 ஆம் ஆண்டு கோடைகாலத்தில் டார்ட்மவுத் கல்லூரியில் நடைபெற்ற இரண்டு மாத ஆய்வரங்கிற்காகவே இந்த திட்டம் முன்வைக்கப்பட்டது. “கற்றல் அல்லது நுண்ணறிவின் பிற அம்சங்களை ஒரு இயந்திரம் துல்லியமாக விவரிக்கும் வகையில் உருவாக்க முடிந்தால், மனிதனைப் போலவே சிந்திக்கும் இயந்திரத்தை நாம் தயாரிக்க முடியும்” என்ற உறுதியான நம்பிக்கையுடன் அவர்கள் செயல்படத் தொடங்கினர். கம்ப்யூட்டர்களுக்கு மொழியைப் புரிய வைப்பது, கருத்துக்களை உருவாக்குவது, மனிதர்களுக்கான சிக்கல்களைத் தீர்ப்பது என அத்தனைக்கும் அங்குதான் முதன்முதலில் அறிவியல் வடிவம் கொடுக்கப்பட்டது.

வீழ்ச்சிகளும் மீட்சியும் நிறைந்த பாதை

ஆரம்பகட்ட உற்சாகத்தைத் தொடர்ந்து, 1970 மற்றும் 1980களில் இந்தத் துறை கடும் பின்னடைவைச் சந்தித்தது. எதிர்பார்ப்புகளுக்கு ஏற்ப தொழில் நுட்ப வளர்ச்சி இல்லாததால் நிதி உதவியும் ஆய்வுகளும் குறைந்தன. இது வரலாற்றில் “ஏஐ பனிக்காலம்” (AI Winter) என்று அழைக்கப்படுகிறது. ஆனால், கணிப்பொறிகளின் செயலாக்கத் திறன் (Processing Power) அதிகரித்ததும், இணையத்தின் வருகையால் பெருமளவிலான தகவல்கள் (Big Data) திரட்டப்பட்டதும் ஏஐ-க்கு புதிய உயிர் கொடுத்தன.

ஆய்வகத்தைக் கடந்த அன்றாடப் பயன்பாடு

இன்று எழுபது ஆண்டுகளைக் கடந்திருக்கும் இந்த தொழில்நுட்பம், வெறும் ஆய்வக அறிக்கை என்ற நிலையிலிருந்து மாறி நமது அன்றாட வாழ்வின் இன்றியமையாத அங்கமாகிவிட்டது. மனித மூளையின் நரம்பு மண்டலத்தை அடிப்படையாகக் கொண்டு உருவாக்கப்பட்ட “ஆழ்ந்த கற்றல்” (Deep Learning) மற்றும் “செயற்கை நரம்பியல் வலைப்பின்னல்கள்” (Neural Networks) ஆகியவை சாட்க்ளாஸ் (Generative AI) முதல் மருத்துவக் கண்டுபிடிப்புகள் வரை புதிய கதவுகளைத் திறந்துள்ளன.

1955 இல் நான்கு பேராசிரியர்கள் இணைந்து தயாரித்த அந்தச் சிறிய முன்மொழிவுக் காகிதம், இன்றைக்கு மனித சமூகத்தின் எதிர்காலத்தையே தீர்மானிக்கும் மிகப்பெரிய சக்தியாக உருவெடுத்து நிற்கிறது. எழுபதாண்டு கால இந்த நீண்ட பயணத்தின் தொடக்கத்தில் விதைக்கப்பட்ட எண்ணங்களே, இன்றைய அதிநவீன டிஜிட்டல் உலகின் அடித்தளமாக விளங்குகின்றன.

ஈஸ்வர் பிரசாத்