சிகரெட், குட்காவுக்கு இனி ‘தங்கம்’ ‘வெள்ளி’ விலை: மத்திய அரசின் அதிரடி வரி வேட்டை!

இந்தியாவில் புகையிலை மற்றும் அதன் சார்ந்த தயாரிப்புகளான குட்கா, ஜர்தா மற்றும் மணமூட்டப்பட்ட புகையிலை ஆகியவற்றின் வரி விதிப்பு முறையில் மத்திய அரசு முக்கிய மாற்றங்களைக் கொண்டு வந்துள்ளது. 2026 பிப்ரவரி 1-ம் தேதி முதல் அமலுக்கு வரும் இந்தப் புதிய விதிமுறைகள், உற்பத்தியின் அளவை இயந்திரங்களின் திறனைக் கொண்டு கணக்கிடும் ‘இயந்திரம் சார்ந்த வரி’ (Machine-Based Levy) முறையை அறிமுகப்படுத்துகின்றன.

முக்கிய மாற்றங்கள் மற்றும் வரி விகிதங்கள்

மத்திய கலால் வரித்துறை 31.12.2025 அன்று வெளியிட்டுள்ள 03/2025 மற்றும் 04/2025 ஆகிய அறிவிக்கைகளின்படி, புதிய வரி விகிதங்கள் பிப்ரவரி 1, 2026 முதல் நடைமுறைக்கு வருகின்றன. இந்த விதிகள் பாக்கெட்டுகளில் (Pouches) அடைத்து விற்கப்படும் புகையிலை, குட்கா மற்றும் மணமூட்டப்பட்ட புகையிலை தயாரிப்புகளுக்கு மட்டுமே பொருந்தும். டின்களில் அடைத்து விற்கப்படும் பொருட்களுக்கு அவற்றின் மதிப்பீட்டு விலையின் அடிப்படையில் பழைய முறைப்படியே வரி விதிக்கப்படும்.

இயந்திரத் திறன் அடிப்படையில் வரி நிர்ணயம்

புதிய விதிமுறைகளின்படி, ஒரு தொழிற்சாலையில் உள்ள இயந்திரங்களின் அதிகபட்ச உற்பத்தித் திறன் (Maximum Rated Capacity) மற்றும் அந்தப் பாக்கெட்டுகளின் சில்லறை விற்பனை விலை (RSP) ஆகியவற்றைக் கொண்டு வரி கணக்கிடப்படும். 

• உதாரணமாக, 500 பாக்கெட்டுகள் தயாரிக்கும் திறன் கொண்ட இயந்திரத்தில், 2 ரூபாய் விலையுள்ள பாக்கெட்டுகளைத் தயாரித்தால், ஒரு இயந்திரத்திற்கு மாதத்திற்கு ரூ. 0.83 கோடி வரியாகச் செலுத்த வேண்டும்.

• இதே 500 பாக்கெட்டுகள் திறன் கொண்ட இயந்திரத்தில் 4 ரூபாய் விலையுள்ள பாக்கெட்டுகள் தயாரித்தால், வரித் தொகை ரூ. 1.52 கோடியாக உயரும்.

உற்பத்தியாளர்கள் கவனத்திற்கு: முக்கிய காலக்கெடு

• பதிவு: ஏற்கனவே கலால் வரித்துறையில் பதிவு செய்துள்ள உற்பத்தியாளர்கள் தனியாகப் பதிவு செய்யத் தேவையில்லை.

• உறுதிமொழிப் படிவம்: தற்போது உற்பத்தியில் ஈடுபட்டுள்ளவர்கள் தங்களின் இயந்திரங்கள் மற்றும் உற்பத்தித் திறன் குறித்த விவரங்களை CE DEC-01 என்ற படிவத்தின் மூலம் பிப்ரவரி 7, 2026-க்குள் சமர்ப்பிக்க வேண்டும். இது கட்டாயமான நடைமுறையாகும்.

• தொழில்நுட்பச் சான்றிதழ்: இயந்திரங்களின் வேகம் மற்றும் விவரங்களை உறுதிப்படுத்த பட்டயப் பொறியாளர் (Chartered Engineer) சான்றிதழ் சமர்ப்பிக்கப்பட வேண்டும். 

கண்காணிப்பு மற்றும் விதிமுறைகள்

• CCTV கண்காணிப்பு: புகையிலை பாக்கெட்டுகள் தயாரிக்கும் அனைத்து இடங்களிலும் CCTV கேமராக்கள் பொருத்தப்படுவது கட்டாயம். இதன் பதிவுகளைக் குறைந்தது 24 மாதங்கள் வரை பாதுகாத்து வைத்திருக்க வேண்டும்.

• இயந்திரங்கள் மூடுதல் (Sealing): ஒரு இயந்திரம் 15 நாட்கள் அல்லது அதற்கு மேல் செயல்படாது எனில், மூன்று நாட்களுக்கு முன்பே அதிகாரிகளுக்குத் தகவல் தெரிவித்து இயந்திரத்தை முத்திரை (Seal) வைக்க வேண்டும். அப்படிச் செய்தால் மட்டுமே வரி விலக்கு (Abatement) கோர முடியும்.

• ஏற்றுமதி: இந்தப் புதிய வரி திட்டத்தின் கீழ், வரி செலுத்தாமல் புகையிலைப் பொருட்களை ஏற்றுமதி செய்ய அனுமதி கிடையாது.

ஆய்வு மற்றும் வரி வசூல்

உற்பத்தியாளர்கள் தாக்கல் செய்யும் விவரங்களை உதவி ஆணையர் அல்லது துணை ஆணையர் நேரில் ஆய்வு செய்து, ஆண்டு உற்பத்தித் திறனை உறுதி செய்வார். அதிகாரிகள் நிர்ணயிக்கும் வரி அதிகமாக இருக்கும் பட்சத்தில், உற்பத்தியாளர் நிலுவைத் தொகையை வட்டியுடன் செலுத்த வேண்டியிருக்கும்.

இந்த இயந்திரம் சார்ந்த புதிய வரி விதிப்பு முறையானது, வரி ஏய்ப்பைத் தடுக்கவும், புகையிலை உற்பத்தியைத் துல்லியமாகக் கண்காணிக்கவும் உதவும் என்று நிதியமைச்சகம் தெரிவித்துள்ளது.

விகே