தமிழ் குரல் / AI Voice
புதுடெல்லியில் பள்ளி ஒன்றில் உடற்கல்வி பாடவேளை முடிந்து தனது வகுப்புக்குத் திரும்பிய ஒன்பது வயது சிறுமி திடீரென சரிந்து விழுந்து உயிரிழந்த சம்பவம் ஒட்டுமொத்த சமூகத்தையும் உலுக்கியுள்ளது. சிசிடிவி காட்சிகளில் அச்சிறுமி கைகளை இடுப்பில் வைத்துவிட்டு அப்படியே சரிந்து விழுவது பதிவாகியுள்ளது. சில ஊடகங்கள் இதனை மாரடைப்பு என்று குறிப்பிடுகின்றன. ஆனால், வளர்இளம் பருவத்திற்கு முன்பும், சிறார் பருவத்திலும் பாரம்பரியமான மாரடைப்பு ஏற்படும் வாய்ப்பு மிக அரிது. இந்த வயதில் ஏற்படும் துயரங்களுக்கு இதயத்தின் மின்சார அமைப்பில் ஏற்படும் கோளாறுகளே முக்கியக் காரணமாக அமைகின்றன.
ஹார்ட் அட்டாவுக்கும் கார்டியாக் அரெஸ்ட்டுக்கும் உள்ள வேறுபாடு
ஹார்ட் அட்டாக் எனப்படும் மாரடைப்பு என்பது இதயத்திற்கு இரத்தத்தை வழங்கும் முக்கிய தமனிகளில் திடீரென ஏற்படும் அடைப்பால் இதயத் தசைக்கு இரத்தம் செல்லாமல் போவதாகும். கார்டியாக் அரெஸ்ட் எனப்படும் இதய செயல் முடக்கம் என்பது இதயத்தின் துடிப்பை முறைப்படுத்தும் மின்சார அமைப்பில் ஏற்படும் கோளாறுகளால் இதயம் திடீரென தனது துடிப்பை முழுமையாக நிறுத்துவதாகும். இளம் வயதில் குறிப்பாகக் குழந்தைப் பருவத்தில் ஏற்படும் இது போன்ற மரணங்கள் பெரும்பாலும் கார்டியாக் அரெஸ்ட்களாகவே இருக்கின்றன.
குழந்தைப் பருவத்தில் இதயச் செயலிழப்பை ஏற்படுத்தும் முதன்மைக் காரணங்கள்
குழந்தைகளுக்கு ஏற்படும் மின் கடத்தல் சார்ந்த துடிப்புக் கோளாறுகள் மரபணு வழியாகக் கடத்தப்படுபவையாகும். இத்தகையோருக்கு மரணத்திற்குப் பின்பு பிரேதப் பரிசோதனை செய்தாலும் இதயத்தின் அமைப்போ அல்லது இரத்த நாளங்களிலோ எந்தப் பிரச்சினையும் இருக்காது, எல்லாமே இயல்பாகவே இருக்கும். குழந்தைப் பருவத்தில் ஏற்படும் ஐம்ப சதவீத இதய செயலிழப்புகளுக்கு இத்தகைய மின் கடத்தல் கோளாறுகளே காரணமாக அமைகின்றன.
லாங் கியூடி சிண்ட்ரோம் மற்றும் சிபிவிடி கோளாறுகள்
இதயம் துடிக்கும் ஒவ்வொரு முறைக்கும் இடைப்பட்ட காலத்தில் தசைகள் தன்னை மீண்டும் மின்னூட்டம் செய்துகொள்வதில் தாமதம் ஏற்படுவதை லாங் கியூடி சிண்ட்ரோம் என்கிறோம். இத்தகைய பாதிப்புள்ளவர்கள் அதிக உடற்பளு தரும் செயல்களில் ஈடுபடும்போதோ அல்லது திடீரென மகிழ்ச்சி, பயம், திகில் போன்ற உணர்ச்சிப் பெருக்கிற்கு ஆளாகும்போதோ அதிக அளவில் அட்ரினலின் சுரந்து இதயம் தறிகெட்டுத் துடிக்க ஆரம்பித்து இறுதியில் செயல் இழந்துவிடும். இதைப் போலவே அதிக உடல் உழைப்பு அல்லது உணர்ச்சிப் பெருக்கின் போது வெளிப்படும் அழுத்த ஹார்மோன்களால் இதயம் தறிகெட்டுத் துடிக்கும் நிலையை சிபிவிடி என அழைக்கிறோம்.
பிறவிக் கோளாறுகளும் மற்ற காரணங்களும்
குழந்தைகள் பிறக்கும்போதே மரபணு ரீதியாக இதயத்தின் தசைகள் கூடுதல் தடிமனாக இருப்பதும், இதயத்திற்கு ஊட்டமளிக்கும் தமனிகளில் பிறவிக் கோளாறுகள் இருப்பதும் கார்டியாக் அரெஸ்ட்டை ஏற்படுத்தலாம். இவை தவிர, சமீபத்தில் வைரஸ் காய்ச்சல் ஏற்பட்டு முழுமையாகக் குணமடையாத நிலையில் இதயத் தசைகள் அழற்சிக்குள்ளாகும் மையோகார்டைட்டிஸ் நிலையும் தீவிர விளையாட்டுகளின் போது ஆபத்தை விளைவிக்கலாம். மேலும், ஏற்கனவே ஆஸ்துமா போன்ற பாதிப்பு உள்ளவர்களுக்குத் தீவிர உடற்பயிற்சிக்குப் பின் சுவாசக் குறைபாடு ஏற்பட்டு அதனால் இதயத் துடிப்பு நின்றுபோகும் அபாயமும் உண்டு. வெயிலில் அதிக நேரம் விளையாடும்போது உடல் சூடாவதும் தாது உப்புகளில் ஏற்படும் சீர்கேடும் கூட இதயத் துடிப்பில் பாதிப்பை ஏற்படுத்தலாம்.
உயிரைக் காக்கும் சிபிஆர் மற்றும் ஏஇடி கருவிகளின் அவசியம்
பள்ளிகளில் குழந்தைகள் விளையாடும்போதோ விளையாடி முடித்த பின்போ நெஞ்சுவலி, மூச்சிறைப்பு, தலைசுற்றல் அல்லது மயக்கம் இருப்பதாகக் கூறினால் உடனடியாகக் குழந்தை நலக் கார்டியாலஜிஸ்ட் மூலம் பரிசோதனை செய்வது அவசியமாகும். குறிப்பாகக் குடும்பத்தில் ஐம்பது வயதுக்குள் மாரடைப்பு அல்லது இதய மரணங்கள் நிகழ்ந்திருந்தால் இன்னும் அதிக எச்சரிக்கையுடன் இருக்க வேண்டும். யாரேனும் திடீரென மயங்கிச் சரிந்து மூச்சின்றி விழுந்தால் உடனடியாக நூற்றியெட்டுக்கு அழைத்துவிட்டு கைகளால் செய்யும் சிபிஆர் சிகிச்சையைத் தொடங்க வேண்டும்.
மார்பகத்தின் நடுப்பகுதியில் இரு அங்குலம் ஆழத்திற்கு ஒரு நிமிடத்திற்கு நூறு முதல் நூற்றி இருபது முறை அழுத்தம் கொடுக்கும் கைகளால் மட்டுமே செய்யும் சிபிஆர் மற்றும் வாய்வழி மூச்சு முறை மூளைக்கு ஆக்சிஜன் செல்வதை உறுதி செய்யும். இதனுடன் பள்ளிகள், கல்லூரிகள் மற்றும் பொது இடங்கள் அனைத்திலும் ஏஇடி எனப்படும் தானியங்கு இதய மீட்பு கருவி கட்டாயமாக இடம்பெற வேண்டும். சிபிஆர் கொடுத்துக்கொண்டிருக்கும்போதே இந்தச் சிறிய சூட்கேஸ் அளவிலான கருவியைக் கொண்டு இதயத் துடிப்பை மீண்டும் சீரமைக்க முடியும். ஒவ்வொரு நிகழ்வும் நமக்கான ஒரு பாடம்; விழிப்புணர்வுடன் குழந்தைகளைக் காப்போம்.
