இருசக்கர வாகனங்களுக்கும் சுங்கச்சாவடிகளில் Toll கட்டணம்?

நாட்டின் பொருளாதாரத்தை மேம்படுத்த உதவும் விரைவான பயணத்திற்காக இந்தியாவில் தேசிய நெடுஞ்சாலைகள் அமைக்கப்பட்டுள்ளன. இந்த நெடுஞ்சாலைகள் இதற்கு துணை நிற்கும் நிலையில், அவற்றில் அமைக்கப்பட்டுள்ள சுங்கச்சாவடிகள் தான், வாகன உரிமையாளர்களுக்கும், பயணிகளுக்கும் பெரும் சிரமமாக மாறி வருகிறது. இந்த சுங்கச்சாவடிகள் வழியாக தினமும் 70 லட்சம் வாகனங்கள் பயணிக்கின்றன. இவற்றின் மூலம் தினமும் ₹125கோடிக்கு மேல் கட்டணம் வசூலிக்கப்படுகிறது. இந்த சுங்கச்சாவடிகள் அனைத்திலும் ஆண்டு தோறும் கட்டணம் உயர்த்திக் கொள்ள தேசிய நெடுஞ்சாலை ஆணையம் அனுமதி வழங்கியுள்ளது. இதை சாதகமாக்கி கொண்ட சுங்கச்சாவடிகள், பயணிகள் என்ற பெயரில் வாகனங்களில் பயணிக்கும் மக்களின் பணத்தை கட்டணமாக வசூலித்து அதிர வைத்து வருகிறது. இச்சூழலில் வரும் ஜூலை 15, 2025 முதல், இருசக்கர வாகனங்களான பைக் மற்றும் ஸ்கூட்டர்களுக்கும் தேசிய நெடுஞ்சாலைகளில் உள்ள சுங்கச்சாவடிகளில் (Toll Plazas) கட்டணம் வசூலிக்கப்படும் என்று தகவல்கள் வெளியாகியுள்ளன.

இது இந்திய சாலைப் பயன்பாட்டு கொள்கையில் ஒரு குறிப்பிடத்தக்க மாற்றத்தைக் குறிக்கிறது. இதுநாள் வரை, பெரும்பாலான தேசிய நெடுஞ்சாலைகள் மற்றும் விரைவுச் சாலைகளில் இருசக்கர வாகனங்களுக்கு சுங்கக் கட்டணத்திலிருந்து விலக்கு அளிக்கப்பட்டிருந்தது. குறைந்த வருமானம் கொண்ட பயணிகளின் நிதிச்சுமையைக் குறைப்பதற்கும், சுங்கச்சாவடிகளில் போக்குவரத்து நெரிசலைக் குறைப்பதற்கும் இந்த விலக்கு முதலில் நோக்கமாக இருந்தது.

முக்கிய அம்சங்கள்:

FASTag கட்டாயம்: இருசக்கர வாகனங்களுக்கு FASTag கட்டாயமாக்கப்படும். இது டிஜிட்டல் முறையில் சுங்கக் கட்டணத்தைச் செலுத்துவதை எளிதாக்கும்.
₹2,000 அபராதம்: FASTag இல்லாமல் சுங்கச்சாவடியைக் கடக்கும் வாகனங்களுக்கு ₹2,000 அபராதம் விதிக்கப்படலாம்.
வருவாய் ஈட்டுதல்: தேசிய நெடுஞ்சாலைகளைப் பராமரிக்கவும், உள்கட்டமைப்பு திட்டங்களுக்கு நிதி திரட்டவும் இந்த முடிவு எடுக்கப்பட்டுள்ளதாக அதிகாரிகள் தெரிவிக்கின்றனர். இருசக்கர வாகனங்களின் எண்ணிக்கை அதிகரிப்பதன் காரணமாக சாலைகளில் ஏற்படும் தேய்மானம் மற்றும் போக்குவரத்து மேலாண்மை சவால்களை சமாளிக்க இது உதவும் என்று வாதிடப்படுகிறது.
குறைந்த கட்டணம்: நான்கு சக்கர வாகனங்களை விட இருசக்கர வாகனங்களுக்கான சுங்கக் கட்டணம் குறைவாக இருக்கும் என்று எதிர்பார்க்கப்படுகிறது.
மக்களின் கருத்துகள்: இந்த அறிவிப்பு பயணிகள் மற்றும் கொள்கை வகுப்பாளர்களிடையே விவாதங்களைத் தூண்டியுள்ளது. தினசரி பயணம் செய்வோருக்கு கூடுதல் நிதிச்சுமை ஏற்படும் என்று பலர் கவலை தெரிவித்துள்ளனர். அதேநேரத்தில் இப்படி கட்டணம் வசூலித்தாலும் வாகனங்களுக்கும், வாகன ஓட்டிகளுக்கும் உரிய அடிப்படை வசதிகளை, சுங்கச்சாவடி நிர்வாகங்கள் செய்து ெகாடுக்கிறதா? என்றால் அதற்கான விடை கேள்விக்குறியாகவே உள்ளது

அதிகாரப்பூர்வ அரசு அறிவிப்பு இன்னும் எதிர்பார்க்கப்படுகிறது என்றாலும், இந்த மாற்றத்திற்கான ஏற்பாடுகள் நடைபெற்று வருகின்றன. இந்த மாற்றம் குறித்த முழுமையான விவரங்கள் மற்றும் நடைமுறை விதிகள் விரைவில் வெளியிடப்படும் எனத் தெரிகிறது.