அச்சுத் துறையைச் சமாளிக்க புதிய பாதையில் பயணிக்கும் செய்தி நிறுவனங்கள்!

இந்தியாவின் முன்னணி நாளிதழ் குழுமங்கள் தங்கள் பாரம்பரிய அச்சு ஊடக வியாபார முறையிலிருந்து வேகமாக விலகி, புதிய வணிக மாதிரிகளை நோக்கி மாறத் தொடங்கியுள்ளன. நாளிதழ்களைப் படிக்கும் வாசகர்களின் எண்ணிக்கை படிப்படியாகக் குறைந்து வரும் சூழலில், வருவாய்க்காக அச்சு விளம்பரங்களையும் சந்தாக்களை மட்டுமே நம்பியிருக்க முடியாது என்பதைச் செய்தி நிறுவனங்கள் உணர்ந்துள்ளன. இதன் விளைவாக, டிஜிட்டல் தளங்கள், வெளிப்புற விளம்பரங்கள் மற்றும் பிரம்மாண்ட நிகழ்வுகள் வாயிலாக ஈட்டப்படும் அச்சசாரா வணிக வருவாய் நடப்பு நிதியாண்டில் 25 சதவீதத்தை எட்டும் என கிரிசில் ரேட்டிங்ஸ் அமைப்பின் ஆய்வு தெரிவிக்கிறது.

வாசகர் வட்டச் சரிவும் சந்தை மாற்றமும்

இந்தியாவில் ஆங்கிலம் மற்றும் வட்டார மொழி ஊடகங்கள் இரண்டிலுமே இந்த மாற்றம் தீவிரமாக நடைபெற்று வருகிறது. இந்தியாவின் முன்னணி நாளிதழ் குழுமங்களின் புழக்க சுழற்சி அடிமட்டத்தில் கணிசமான சரிவைச் சந்தித்துள்ளது. கடந்த 2019 ஆம் ஆண்டில் சுமார் 1.5 கோடியாக இருந்த பெரிய செய்தி நிறுவனங்களின் மொத்த விற்பனை எண்ணிக்கை 2025 ஆம் ஆண்டில் 1 கோடியாகக் குறைந்துள்ளது. இளைய தலைமுறை வாசகர்கள் செய்திகளையும் பிற தகவல்களையும் டிஜிட்டல் தளங்கள் மூலமாகவே உடனடியாகப் நுகர விரும்புவதால் இந்தச் சரிவு தொடரும் என எதிர்பார்க்கப்படுகிறது. இதன் காரணமாக, அச்சு சார்ந்த வருவாய் கடந்த ஏழு ஆண்டுகளில் ஆண்டிற்கு 1 முதல் 2 சதவீதம் வரை தொடர் சரிவைச் சந்தித்து வருகிறது.

டிஜிட்டல் மற்றும் நிகழ்வுகள் அளிக்கும் புதிய வேகம்

பாரம்பரிய அச்சு வணிகம் ஆண்டிற்கு 2 முதல் 3 சதவீத வளர்ச்சியை மட்டுமே எட்டும் எனக் கணிக்கப்பட்டுள்ள நிலையில், அச்சுசாரா வணிகப் பிரிவுகள் ஆண்டிற்கு 10 முதல் 12 சதவீதம் வரை கூட்டு வளர்ச்சியைப் பதிவு செய்யும் என்று கிரிசில் ரேட்டிங்ஸ் மூத்த இயக்குநர் மணீஷ் குப்தா சுட்டிக்காட்டியுள்ளார். இதனால் தான் செய்தி நிறுவனங்களுக்குத் தங்களின் வணிகப் பிரிவுகளைப் பன்முகப்படுத்துவது என்பது இனி வெறும் விருப்பத்தேர்வு அல்ல, அது உயிர்வாழ்வதற்கான கட்டாயம் என்று அவர் குறிப்பிட்டுள்ளார். அச்சு, டிஜிட்டல், எஃப்.எம் ரேடியோ, வெளிப்புற விளம்பரங்கள் மற்றும் நிகழ்வுகளை ஒருங்கிணைத்து ஒரே தொகுப்பாக விளம்பரதாரர்களுக்கு வழங்கும் உத்தியைப் பதிப்பாளர்கள் கையாளத் தொடங்கியுள்ளனர்.

வருவாய் சவால்களும் லாப வரம்பும்

செய்தி நிறுவனங்கள் புதிய வணிகப் பிரிவுகளை நோக்கி விரிவடைந்தாலும், அச்சு ஊடகங்களை விட இவற்றில் கிடைக்கும் லாப வரம்பு சற்று குறைவாகவே உள்ளது. நடப்பு நிதியாண்டில் ஊடகக் குழுமங்களின் ஒட்டுமொத்த லாப வரம்பு 12 முதல் 13 சதவீதமாக இருக்கும் என எதிர்பார்க்கப்படுகிறது. வெளிப்புற விளம்பரங்கள் மற்றும் நிகழ்வு மேலாண்மைப் பிரிவுகள் அதிக செலவினங்களைக் கொண்டவை என்றாலும், டிஜிட்டல் பிரிவுகள் தங்களின் ஆரம்பக்கட்ட முதலீட்டு இழப்புகளில் இருந்து மீண்டு லாபப் பாதையை நோக்கி நகரத் தொடங்கியுள்ளன.

பக்கபலமாக இருக்கும் வலுவான நிதி நிலைமை

நாளிதழ் குழுமங்கள் புதிய வணிகப் பிரிவுகளில் தைரியமாகக் களம் இறங்குவதற்கு அவர்களின் வலுவான நிதி மூலதனமே பிரதான காரணமாகும். முன்னணி செய்தி நிறுவனங்கள் தங்கள் லாபத்தின் பெரும் பகுதியை ரொக்க இருப்பாகவும், திரவ முதலீடுகளாகவும் வைத்துள்ளன. கிரிசில் ரேட்டிங்ஸ் இயக்குநர் அங்கித் ஹாகுவின் கூற்றுப்படி, செய்தி நிறுவனங்களின் கடன் தகுதி இனி அச்சு வணிகத்தின் வளர்ச்சியைப் பொறுத்தது அல்ல, மாறாக அவர்களின் நிதிநிலை அறிக்கையின் பலத்தையே சார்ந்துள்ளது. இந்தச் செய்தி நிறுவனங்களின் நிகர மதிப்பில் சுமார் 90 சதவீதம் நிதிச் சொத்துக்களாகவும் ரொக்க இருப்பாகவும் இருப்பதால், அச்சுத் துறையில் ஏற்படும் பின்னடைவுகளைத் தாங்கிப் புதிய வணிகங்களை வலுப்படுத்த முடிகிறது.

எதிர்காலச் சவால்களும் வாய்ப்புகளும்

தங்களின் வலுவான பிராண்ட் மதிப்பு, விரிவான வட்டாரக் கட்டமைப்பு மற்றும் பெருமளவிலான வாசகர்களைப் புதிய டிஜிட்டல் மற்றும் அனுபவப் பூர்வமான வணிக மாதிரிகளாக மாற்றுவதில் பாரம்பரிய செய்தி நிறுவனங்களுக்குப் பெரும் வாய்ப்பு உள்ளது. இருப்பினும், நாளிதழ் விற்பனை எதிர்பார்த்ததை விட வேகமாகக் குறைவது அல்லது டிஜிட்டல் வாசகர்களை வருவாயாக மாற்றுவதில் ஏற்படும் தாமதம் ஆகியவை நிறுவனங்களுக்கு நெருக்கடியை ஏற்படுத்தக்கூடும். எவ்வாறாயினும், வளர்ந்து வரும் நவீன ஊடகச் சூழலில் நீடித்திருக்க பன்முகத் தொழில் விரிவாக்கமே அச்சு ஊடகங்களின் ஒரே நம்பிக்கையாக உருவெடுத்துள்ளது.

வாத்தீ அகஸ்தீஸ்வரன்