‘பிச்சைக்காரன்’ மேஜிக் மீண்டும் நடக்குமா?முன்னணி இயக்குநர்கள் மிரண்ட ‘நூறு சாமி’!

‘பிச்சைக்காரன்’ திரைப்படத்தின் இமாலய வெற்றிக்குப் பிறகு, தமிழ் சினிமாவின் ஆகச்சிறந்த எமோஷனல் கூட்டணியான இயக்குநர் சசி – விஜய் ஆண்டனி மீண்டும் இணைந்திருக்கும் திரைப்படம் ‘நூறு சாமி’. விஜய் ஆண்டனி ஃபிலிம் கார்ப்பரேஷன் சார்பில் பாத்திமா விஜய் ஆண்டனி தயாரிப்பில், மீரா விஜய் ஆண்டனி வழங்கும் இத்திரைப்படம் வரும் ஜூன் 19-ஆம் தேதி உலகமெங்கும் திரையரங்குகளில் வெளியாகிறது.

இதையொட்டி, படத்தின் ‘வெளியீட்டிற்கு முன்னரான நிகழ்வு’ (Pre-Release Event) சென்னை கமலா திரையரங்கில் பிரம்மாண்டமாக நடைபெற்றது. தமிழ் சினிமாவின் முன்னணி முத்திரை பதித்த இயக்குநர்களான வெற்றிமாறன், பா.ரஞ்சித், ஏ.ஆர்.முருகதாஸ், மிஷ்கின், ராஜூ முருகன், கார்த்திக் சுப்புராஜ், லிங்குசாமி உள்ளிட்ட பல ஆளுமைகளின் பங்கேற்புடன் இந்த விழா உணர்வுப்பூர்வமாக அரங்கேறியது.

இசையமைப்பாளராக பாலாஜி ஸ்ரீராம் அறிமுகம்!

விஜய் ஆண்டனி என்றாலே புதிய திறமையாளர்களை அடையாளப்படுத்துவதில் முன்னிற்பவர். அந்த வகையில், சசி – விஜய் ஆண்டனி கூட்டணி ‘நூறு சாமி’ படத்தின் மூலம் புதிய இசையமைப்பாளர் பாலாஜி ஸ்ரீராமை திரையுலகிற்கு அறிமுகப்படுத்தியுள்ளது.

மேடையில் பேசிய பாலாஜி ஸ்ரீராம்:

“இயக்குநர் சசி சார் எனக்கு போன் செய்து ஒரு சூழலை விவரித்து மெட்டு கேட்டார். அதுதான் ‘அம்மா அம்மா..’ பாடல். அந்த மெட்டு பிடித்ததும் உடனடியாக எனக்கு இந்த வாய்ப்பை தந்தார். இந்த இசை சிறப்பாக அமைந்ததற்கு சசி சார் மற்றும் விஜய் ஆண்டனி சாரின் வழிகாட்டுதலே காரணம்.”

இயக்குநர்கள் விஜய் ஆண்டனி, எஸ்.எஸ்.குமரன், சிமோன், சித்து குமார் ஆகியோர் இணைந்து புதிய இசையமைப்பாளரை ரசிகர்களுக்கு அறிமுகப்படுத்தி வாழ்த்தினர்.

லெஜெண்ட்ஸ் பாராட்டிய சசியின் ‘பெண்மைத் தன்மையும் மனிதநேயமும்’

விழாவில் பங்கேற்ற முன்னணி இயக்குநர்கள், இயக்குநர் சசி மற்றும் ‘நூறு சாமி’ படம் குறித்துப் பகிர்ந்த சுவாரசியமான தகவல்கள்:

“சசி எப்போதுமே புது இயக்குநர் போல உழைப்பவர்!” — இயக்குநர் வெற்றிமாறன்

“பொதுவாக இயக்குநர்கள் படமெடுத்தால் டைட்டிலுடன் அவர்கள் பெயர் சேரும். ஆனால் சசி சாருக்கு மட்டும்தான் படத்தின் பெயர் சேரும் (உதாரணம்: ‘பூ’ சசி, ‘பிச்சைக்காரன்’ சசி). நாங்கள் இருவரும் இயக்குநர் கதிரிடம் உதவியாளர்களாக இருந்தவர்கள். இந்த வயதிலும், இன்றைய தலைமுறை ரசிகர்களைக் கவரும் வகையில் ஒரு புது இயக்குநரின் ஆர்வத்தோடு உழைப்பதுதான் சசி சாரின் தனித்துவம்.”

“என் வாழ்வில் சசி சார் கற்றுக்கொடுத்த பாடம்!” — இயக்குநர் பா.ரஞ்சித்

“நான் உதவி இயக்குநராக வாய்ப்பு தேடிய காலத்தில், என்னை முதன்முதலாக அமர வைத்துப் பேசி நம்பிக்கை கொடுத்தவர் சசி சார். அவரிடம் கற்றுக் கொண்ட அந்தப் பண்பைத்தான் இன்றும் என்னை நாடி வரும் உதவி இயக்குநர்களிடம் நான் கடைப்பிடிக்கிறேன். ‘நூறு சாமி’ படம் எனக்கு மிகவும் பிடித்திருந்தது. குறிப்பாக இதில் வரும் ‘சீலிங் ஃபேன்’ காட்சியை என் வாழ்க்கையோடு உளவியல் ரீதியாக இணைத்துப் பார்க்க முடிந்தது. பெண்கள் மற்றும் சமூக மாற்றத்திற்கான அழுத்தமான படைப்பு இது.”

“தீனா படம் கைவிடப்பட இருந்தபோது நம்பிக்கை தந்தவர்!” — இயக்குநர் ஏ.ஆர்.முருகதாஸ்

“என்னுடைய முதல் படமான ‘தீனா’ இரண்டு நாள் ஷூட்டிங்கிற்குப் பின் நின்றுவிடுமோ என்ற குழப்பம் வந்தபோது, சசி சார் தான் ‘போராடு, 70% நினைத்தது வந்தாலே போதும், பாதியை ரசிகர்கள் பார்த்துக்கொள்வார்கள்’ என நம்பிக்கை தந்தார். ‘நூறு சாமி’ என் சொந்த ஊரில் நடந்த ஒரு உண்மைச் சம்பவத்தின் பின்னணி. க்ளைமாக்ஸ் 20 நிமிடம் யாரும் எதிர்பார்க்காத பதைபதைப்பைத் தரும். பாலுமகேந்திரா படத்தின் ஷோபா போல, நடிகை சுவாசிகா வலி, அவமானம் என அனைத்தையும் முகத்தில் கடத்தி அற்புதமாக நடித்துள்ளார். இந்த ஆண்டு தேசிய விருதுக்கு ராதிகா மேடத்திற்கும் சுவாசிகாவிற்கும் தான் போட்டி இருக்கும்!”

“ஆண்களிடம் இருக்கும் பெண்மைத் தன்மையே சிறந்த படைப்பைத் தரும்!” — இயக்குநர் மிஷ்கின்

“சினிமாவில் சாமிகள் மிகவும் கம்மி; நான் பார்த்த நூறு சாமிகளில் ஒரு சாமி இயக்குநர் சசி. இசைஞானி இளையராஜா, ஏ.ஆர்.ரஹ்மான் போன்றவர்களிடம் பெண்மைத் தன்மை (தாயுள்ளம்) அதிகமாக இருக்கும், அதனால்தான் அவர்கள் சிறந்த படைப்பாளிகள். அப்படியொரு பெண்மைத் தன்மையோடு மனித நேயம் கொண்டவர் சசி. இந்த சமுதாயத்தின் விதிகளை எழுதிய ஆண்கள், நம் வீதிகளில் புதைக்கப்பட்ட பெண்களை எப்படிப் பார்த்துக் கொள்ள வேண்டும் என்பதை இந்தப் படம் பேசுகிறது.”

“இது ஆண்கள், பெண்கள் என இருபாலரும் பார்க்க வேண்டிய படம்!” — இயக்குநர் ராஜூ முருகன்

“சமூக ஊடகங்கள் பெருகிய இந்த காலத்தில் பெண்களைப் பற்றிய பார்வை மிகவும் மோசமாகி, கலாச்சாரக் காவலர்கள் அதிகரித்துள்ளனர். வன்முறைகளும் நடக்கின்றன. இந்தச் சூழலில் ‘நூறு சாமி’ மிக முக்கியமான படம். சுனிதா வில்லியம்ஸ் விண்வெளியில் 680 நாட்கள் இருக்கும் காலத்திலும் பெண்களுக்கு நடக்கும் வலிகளைப் பேசுகிறது. விஜய் ஆண்டனியின் முகத்தைப் பார்த்தால் த்ரில்லர் தான் நினைவுக்கு வரும், ஆனால் இந்தப் படத்திற்குப் பிறகு அவருக்கு எந்தக் கதையும் எழுதலாம் எனத் தோன்றும்.”

ஆபத்பாண்டவன் விஜய் ஆண்டனி: தயாரிப்பாளர்கள் நெகிழ்ச்சி

• தயாரிப்பாளர் தனஞ்ஜெயன்: “இந்தப் படத்திற்கு முதலில் வேறு ஒரு தயாரிப்பாளர், நடிகர் இருந்தனர். பேச்சுவார்த்தை நீண்டு முடங்கியபோது, ஆபத்பாண்டவனாக வந்தவர்தான் விஜய் ஆண்டனி. சசி சாருக்காக முந்தைய தயாரிப்பாளரின் தொகையை முழுமையாகக் கொடுத்து படத்தை மீட்டார். அவர்தான் இந்த படத்தின் முதல் சாமி!”

• தயாரிப்பாளர் சி.வி.குமார்: “30 வருடங்களாகத் தமிழ் சினிமாவில் படம் இயக்குவது சாதாரண விஷயம் அல்ல. சசி சாருக்கு வாழ்த்துகள். நடிகராக, இசையமைப்பாளராகத் தாண்டி புதியவர்களுக்கும் வித்தியாசமான களங்களுக்கும் முதலீடு செய்யும் தயாரிப்பாளர் விஜய் ஆண்டனியை எனக்கு ரொம்பப் பிடிக்கும்.”

நிஜ மனிதரின் கதை: சசி மற்றும் விஜய் ஆண்டனியின் இறுதி உரை

கதையின் பின்னணி குறித்து இயக்குநர் சசி பேசுகையில், “தொலைக்காட்சி ரியாலிட்டி ஷோ ஒன்றில் ஒரு அம்மாவும் மகனும் பகிர்ந்துகொண்ட உண்மைச் சம்பவம்தான் இக்கதை. அதன் நிஜ மனிதர் ‘பாஸ்கர்’ என்பவரை இந்த மேடைக்கு அழைக்கிறேன். படத்தில் விஜய் ஆண்டனி கடைசி 40 நிமிடங்கள்தான் வருவார். இப்போது படம் தொடங்கி 40 நிமிடங்களுக்குப் பிறகுதான் ஹீரோவே வருகிறார், அதனால் வெற்றி பாதிக்கப்படுவதில்லை. படம் உங்களை ஏமாற்றாது” என்றார்.

நிகழ்வின் நிறைவாகப் பேசிய விஜய் ஆண்டனி:

“என் வாழ்க்கையில் மூன்று முக்கியத் திருப்புமுனைகள். 1. ‘டிஷ்யூம்’ படத்தில் சசி சார் எனக்குத் தந்த இசை வாய்ப்பு. 2. மக்களின் மனதில் நின்ற ‘பிச்சைக்காரன்’. 3. இந்த ‘நூறு சாமி’ படத்தின் மூலம் என்னை ‘லவ்வர் பாய்’ ஆக மாற்றியிருப்பது. இதன் பிறகு எனக்கு லவ்வர் பாய் கேரக்டர்கள் கிடைக்கும் என நம்புகிறேன். இது குடும்பத்தில் உள்ள அம்மா, அக்கா, தங்கை என எல்லாருக்குமான மிக முக்கியமான படம்; சமுதாயத்தில் பெரிய மாற்றத்தை ஏற்படுத்தும்” எனப் பெருமிதத்துடன் கூறினார்.