சட்டம் ஒழுங்கு டிஜிபியாக மகேஷ்குமார் அகர்வால் ஐபிஎஸ் நியமனம்!

தமிழக காவல்துறையின் உச்சபட்ச பதவியான சட்டம் ஒழுங்கு டிஜிபி மற்றும் போலீஸ் படைத் தலைவராக (DGP & Head of Police Force) மகேஷ்குமார் அகர்வால் ஐபிஎஸ் அதிகாரப்பூர்வமாக நியமிக்கப்பட்டுள்ளார். தற்போது பதவியில் இருக்கும் சந்தீப் ராய் ரத்தோருக்குப் பதிலாக இந்த அதிரடி நியமனம் செய்யப்பட்டுள்ளது. நேர்மையான, திறமையான மற்றும் கனிவான நிர்வாகத்திற்குப் பெயர் பெற்ற ஒரு மூத்த அதிகாரி மாநிலத்தின் ஒட்டுமொத்த காவல் துறைப் பொறுப்பை ஏற்பது தமிழக காவல்துறைக்கு ஒரு புதிய சகாப்தமாகப் பார்க்கப்படுகிறது.

இளம் வயதில் ஐபிஎஸ்: லட்சியப் பயணம்

பஞ்சாப் மாநிலத்தைப் பூர்வீகமாகக் கொண்ட மகேஷ்குமார் அகர்வால், தனது தந்தையின் சிறந்த வழிகாட்டுதலின்படி சட்டம் (Law) பயின்றவர். சட்டப் படிப்பை முடித்த கையோடு சிவில் சர்வீஸ் தேர்வுக்குத் தயாரான இவர், கடந்த 1994-ஆம் ஆண்டு, தனது 22-வது இளம் வயதிலேயே இந்தியக் காவல் பணி (IPS) தேர்வில் வெற்றி பெற்று சாதனை படைத்தார். மிக இளம் வயதிலேயே ஐபிஎஸ் அதிகாரியாகத் தன் காவல் பணியைத் தொடங்கிய இவர், தமிழகத்தைத்தன் முதன்மைப் பணித்தளமாகக் கொண்டு களமிறங்கினார்.

மாவட்ட எஸ்பி முதல் மாநகர கமிஷனர் வரை: நீண்ட அனுபவம்

தமிழகத்தின் பல்வேறு மாவட்டங்களிலும், சவாலான பல முக்கியப் பிரிவுகளிலும் திறம்படப் பணியாற்றிய நீண்ட நெடிய கள அனுபவம் மகேஷ்குமார் அகர்வாலுக்கு உண்டு. சட்டம் ஒழுங்கைப் பராமரிப்பதிலும், நவீனக் காவல் துறையை வழிநடத்துவதிலும் இவர் வகித்த முக்கியப் பொறுப்புகள் பின்வருமாறு:

• தேனி மற்றும் தூத்துக்குடி மாவட்டங்களின் காவல் கண்காணிப்பாளர் (SP).

• சென்னை பூக்கடை பகுதி துணை ஆணையர் (DC).

• சென்னை போக்குவரத்துப் பிரிவு துணை ஆணையர்.

• மதுரை மாநகரக் காவல் ஆணையர் (Commissioner of Police).

• சென்னை தெற்கு மண்டல கூடுதல் ஆணையர்.

• சென்னை மாநகரக் காவல் ஆணையர் (COP – Chennai).

• டிஜிபி அலுவலகச் செயலாக்கப் பிரிவு ஏடிஜிபி (ADGP, Operations).

• தமிழக ஆயுதப்படை டிஜிபி (DGP, Armed Police).

மாநிலப் பணிகள் ஒருபுறமிருக்க, மத்திய அரசின் சிபிஐ (CBI) அதிகாரியாகப் பத்து ஆண்டுகள் மிக முக்கியப் பொறுப்புகளைக் கையாண்டுள்ளார். மேலும், போதைப்பொருள் தடுப்பு நுண்ணறிவுப் பிரிவு (NCIB) ஏடிஜிபியாகவும், டெல்லியில் எல்லை பாதுகாப்புப் படையின் (BSF) கூடுதல் இயக்குநராகவும் (Additional Director) பணியாற்றி தேசிய அளவில் தனது முத்திரையைப் பதித்தவர்.

தமிழகத்தை உலுக்கிய வழக்குகளும் கூர்மையான புலனாய்வும்

மகேஷ்குமார் அகர்வால் என்றாலே காவல்துறையில் நினைவுக்கு வருவது அவரது அசாத்திய புலனாய்வுத் திறன்தான் (Investigative Skills). தமிழகத்தை உலுக்கிய பல பெரும் சவாலான வழக்குகளுக்கு இவர் மிக நேர்த்தியாக விடை கண்டுள்ளார்.

• ரயில் பணக் கொள்ளை வழக்கு: சேலத்திலிருந்து சென்னை வந்த ரயிலின் கூரையைத் துளையிட்டு ரூ.5.78 கோடி கொள்ளையடிக்கப்பட்ட வழக்கு இந்திய அளவில் பெரும் பரபரப்பை ஏற்படுத்தியது. இவர் தலைமையிலான சிபிசிஐடி (CBCID) பிரிவுதான், எந்தவொரு துப்பும் இல்லாத நிலையிலும் அறிவியல் பூர்வமான தீவிர விசாரணை நடத்தி வடமாநிலக் கொள்ளையர்களைக் கூண்டோடு கைது செய்தது.

• சென்னை சென்ட்ரல் குண்டுவெடிப்பு: சென்னை சென்ட்ரல் ரயில் நிலையத்தில் நடந்த குண்டுவெடிப்பு வழக்கின் விசாரணையை முடுக்கிவிட்டு, குற்றவாளிகளைக் கண்டறிவதில் முக்கியப் பங்காற்றினார்.

• உமா மகேஸ்வரி கொலை வழக்கு: சென்னையில் ஒட்டுமொத்த ஐடி (IT) ஊழியர்களையும் அச்சத்தில் ஆழ்த்திய பெண் ஐடி ஊழியர் உமா மகேஸ்வரி கொலை வழக்கை அதிரடியாக விசாரித்து, குற்றவாளிகளைச் சட்டம் முன் நிறுத்திய பெருமை இவருக்கு உண்டு.

கொரோனா காலத்தில் கனிவான முகம்

கொரோனா பேரிடர் மற்றும் கடுமையான ஊரடங்கு நிலவிய காலகட்டத்தில் சென்னை மாநகரக் காவல் ஆணையராக மகேஷ்குமார் அகர்வால் பொறுப்பு வகித்தார். சட்டம் ஒழுங்கைக் கடுமையாக நிலைநாட்டுவது ஒருபுறமிருந்தாலும், பொதுமக்களின் பாதுகாப்பு, பிற மாநிலத் தொழிலாளர்களின் நலன் மற்றும் வாழ்வாதாரம் ஆகியவற்றில் இவர் காட்டிய கனிவும், எடுத்த அதிரடி நல நடவடிக்கைகளும் பொதுமக்கள் மற்றும் சமூக ஆர்வலர்களிடையே மிகப்பெரிய பாராட்டைப் பெற்றுத் தந்தது.

தற்போது ஒட்டு மொத்த தமிழ்நாடு போலீஸ் படைத் தலைவராகப் பொறுப்பேற்க இருக்கும்  மகேஷ்குமார் அகர்வாலின் இந்த நியமனம், அவரது முப்பது ஆண்டுகால நேர்மையான, கறைபடாத மற்றும் திறமையான காவல் பணி நிர்வாகத்திற்குச் சான்றாக அமைந்துள்ளது. மாநிலத்தின் சட்டம் ஒழுங்கை அடுத்த கட்டத்திற்கு எடுத்துச் செல்ல இவருடைய அனுபவம் பெரிதும் உதவும் என எதிர்பார்க்கப்படுகிறது.

நமது கிரைம் நிருபர்