யூடியூப்புக்கு ஆப்பு: ‘X’ தளத்தில் இனி கொட்டப்போகுது பணமழை!

சமூக வலைதள உலகில் இப்போதைக்கு வீடியோக்களின் சக்கரவர்த்தியாகத் திகழும் யூடியூப் (YouTube) தளத்திற்கு நேரடி சவால் விடுத்துள்ளார் ‘X’ (முன்னாள் ட்விட்டர்) அதிபர் எலான் மஸ்க். “இனி வீடியோ போட எங்க தளத்துக்கு வாங்க, யூடியூப்பை விட அதிக பணம் தர்றோம்” என படைப்பாளர்களுக்கு (Content Creators) அவர் விரித்துள்ள வலை, டெக் உலகில் பெரும் பரபரப்பை ஏற்படுத்தியுள்ளது.

என்ன நடந்தது?

நேற்று புதன்கிழமை (டிசம்பர் 31), ‘X’ பயனர் ஒருவர், “படைப்பாளர்களைத் தன் பக்கம் இழுக்க, யூடியூப்பை விடச் சிறந்த நிதிச் சலுகைகளை (Higher Payouts) ‘X’ தளம் வழங்க வேண்டும்” என ஒரு யோசனையை முன்வைத்தார். அதற்கு உடனடியாகப் பதிலளித்த எலான் மஸ்க், இந்தத் திட்டத்திற்குப் பச்சைக்கொடி காட்டியுள்ளார். இதன் மூலம் ‘X’ தளம் இனி வெறும் கருத்துப் பகிர்வுக்கான தளம் மட்டுமல்ல, வீடியோ உலகிலும் ஒரு பலமான போட்டியாளராக உருவெடுக்க உள்ளது.

மஸ்க் போடும் மாஸ்டர் பிளான்:

அதிக வருமானம்: யூடியூப் தற்போது வழங்கும் வருமானப் பகிர்வை (Revenue Share) விட, அதிக சதவீதத்தைப் படைப்பாளர்களுக்கு வழங்க மஸ்க் திட்டமிட்டுள்ளார்.

கிரியேட்டர்கள் இடமாற்றம்: பெரிய யூடியூபர்களை ‘X’ தளத்திற்கு வரவழைப்பதன் மூலம், அங்குள்ள கோடிக்கணக்கான பார்வையாளர்களையும் தன் பக்கம் இழுப்பதே மஸ்க்கின் நோக்கம்.

ஆல்-இன்-ஒன் ஆப் (Everything App): செய்தி, வீடியோ, பணப் பரிமாற்றம் என அனைத்திற்கும் ‘X’ மட்டுமே ஒரே தீர்வாக இருக்க வேண்டும் என்பதில் மஸ்க் உறுதியாக இருக்கிறார்.

யூடியூப்புக்கு இது பின்னடைவா?

பல ஆண்டுகளாக வீடியோ உலகில் அசைக்க முடியாத சக்தியாக இருக்கும் யூடியூப்பை வீழ்த்துவது அவ்வளவு எளிதல்ல. ஆனாலும், மஸ்க்கின் இந்த ‘பண ஆசை’ காட்டும் தந்திரம், ஆரம்பகட்ட கிரியேட்டர்கள் மற்றும் பெரிய இன்ஃப்ளூயன்சர்களைக் கவர வாய்ப்புள்ளது. குறிப்பாக, விளம்பர வருமானத்தில் யூடியூப் விதிக்கும் கடுமையான விதிகள் மற்றும் குறைவான வருமானத்தால் அதிருப்தியில் இருப்பவர்கள் இனி ‘X’ பக்கம் திரும்பலாம்.

படைப்பாளர்களுக்கு ஜாக்பாட்!

நீங்கள் ஒரு வீடியோ கிரியேட்டர் என்றால், இனி உங்களுக்கு இரண்டு பெரிய கதவுகள் திறந்திருக்கின்றன. ‘X’ தளம் யூடியூப்பை விட அதிகப் பணம் தரும் பட்சத்தில், பல புதிய திறமையாளர்கள் ‘X’ தளத்தையே தங்கள் முதன்மைத் தளமாகத் தேர்ந்தெடுக்கக்கூடும்.

ஆந்தை ரிப்போர்ட்டர் பார்வை:

எலான் மஸ்க் எதைத் தொட்டாலும் அது சர்ச்சையாகும் அல்லது அதிரடியாக மாறும். இப்போது அவர் கை வைத்துள்ள ‘வீடியோ டாமினன்ஸ்’ (Video Dominance) விவகாரம், வரும் 2026-ல் யூடியூப் நிறுவனத்திற்குப் பெரும் தலைவலியைத் தரும் என்பதில் சந்தேகமில்லை.

பிருத்விராஜ்