உலக காண்டாமிருக தினம்: ஓர் உயிரினத்தின் வலிமை மற்றும் அதன் வேதனை!
பூமியின் பல்வேறு சுற்றுச்சூழல் அமைப்புகளில் ஒரு கம்பீரமான உயிரினமாகத் திகழும் காண்டாமிருகம், அதன் வலிமையான கொம்பு மற்றும் தனித்துவமான தோற்றத்தால் உலக மக்களின் கவனத்தை ஈர்த்துள்ளது. இந்த அற்புதமான விலங்கினத்தைக் கொண்டாடுவதற்கும், அதன் பாதுகாப்பின் அவசியத்தை வலியுறுத்துவதற்கும் ஒவ்வொரு ஆண்டும் செப்டம்பர் 22-ஆம் தேதி உலக காண்டாமிருக தினமாகக் கொண்டாடப்படுகிறது.
இந்த தினம் உருவான கதை
உலக காண்டாமிருக தினம் முதன்முதலில் 2010-ஆம் ஆண்டில் தென் ஆப்பிரிக்காவில் உள்ள உலக வனவிலங்கு நிதியத்தால் (WWF) அறிவிக்கப்பட்டது. 2011-ஆம் ஆண்டில், இத்தினம் முதன்முதலாக அனுசரிக்கப்பட்டது. இந்த தினத்தை உருவாக்குவதில் இரண்டு பெண்களின் பங்கு முக்கியமானது. ஜிம்பாப்வேயில் சிஷாக்வே பண்ணையில் பணிபுரிந்த லிசா ஜேன் கேம்பெல் என்பவர் இதற்கான திட்டங்களைத் தொடங்கினார். அப்போது ஆன்லைனில் கண்ட ரிஷ்ஜா என்ற பெண்ணின் ஆதரவுடன், இவர்கள் இருவரும் இணைந்து இத்தினத்திற்கான ஆதரவைத் திரட்டினர். இவர்களின் முயற்சி, உலகெங்கிலும் உள்ள தன்னார்வ தொண்டு நிறுவனங்கள், உயிரியல் பூங்காக்கள், வணிக அமைப்புகள் மற்றும் காண்டாமிருக ஆர்வலர்களை ஒன்றிணைத்தது.
அழிவின் விளிம்பில் ஐந்து இனங்கள்
பல நூறு ஆண்டுகளாக ஆப்பிரிக்கா மற்றும் ஆசியாவின் நிலப்பரப்பை அலங்கரித்து வந்த காண்டாமிருகங்கள், இன்று வேகமாக அழிந்து வரும் உயிரினங்களில் ஒன்றாக மாறிவிட்டன. அவற்றின் கொம்புகளின் மருத்துவ குணங்கள் குறித்த மூடநம்பிக்கைகள் காரணமாக, சட்டவிரோத வேட்டையாடுதல் பெரும் அச்சுறுத்தலாக உள்ளது.
காண்டாமிருகங்களில் மொத்தம் ஐந்து இனங்கள் உள்ளன:
- வெள்ளை காண்டாமிருகம் (White Rhino)
- கருப்பு காண்டாமிருகம் (Black Rhino)
- இந்திய காண்டாமிருகம் (Indian Rhino)
- ஜாவான் காண்டாமிருகம் (Javan Rhino)
- சுமத்ரன் காண்டாமிருகம் (Sumatran Rhino)
இந்த ஐந்து இனங்களும் வெவ்வேறு சவால்களை எதிர்கொண்டு வருகின்றன. வாழ்விட இழப்பு மற்றும் மனிதனால் ஏற்படும் பிற அச்சுறுத்தல்கள் அவற்றின் எண்ணிக்கையை வெகுவாகக் குறைத்துள்ளன.
பாதுகாப்பு முயற்சிகளும் விழிப்புணர்வும்
அதிர்ஷ்டவசமாக, உலகெங்கிலும் உள்ள அரசாங்கங்கள், தன்னார்வ நிறுவனங்கள் மற்றும் தனிநபர்கள் காண்டாமிருகங்களைப் பாதுகாக்க ஒன்றிணைந்து செயல்பட்டு வருகின்றனர். இவர்களின் கூட்டு முயற்சியால், பல இடங்களில் காண்டாமிருகங்களின் எண்ணிக்கை ஓரளவிற்கு அதிகரித்துள்ளது. இது, நமது கூட்டு முயற்சியால் மட்டுமே இந்த உயிரினங்களின் அழிவைத் தடுக்க முடியும் என்பதை எடுத்துக்காட்டுகிறது.
பொது விழிப்புணர்வு பிரச்சாரங்கள் மற்றும் கல்வித் திட்டங்கள் இந்த விலங்குகளின் முக்கியத்துவத்தை எடுத்துரைப்பதில் முக்கிய பங்கு வகிக்கின்றன. உலக காண்டாமிருக தினம், இந்த அழகான விலங்குகளைப் போற்றும் ஒரு நாளாக மட்டுமல்லாமல், அவை எதிர்கொள்ளும் சவால்கள் மற்றும் அவற்றை பாதுகாக்க நாம் மேற்கொள்ள வேண்டிய நடவடிக்கைகள் குறித்துச் சிந்திப்பதற்கான ஒரு வாய்ப்பாகவும் அமைகிறது.
நமது பூமியின் பல்லுயிர் பெருக்கத்தின் பாதுகாவலர்களாகத் திகழும் காண்டாமிருகங்களைப் பாதுகாக்கும் பொறுப்பு நமக்கு உள்ளது என்பதை இத்தினம் நமக்கு மீண்டும் நினைவூட்டுகிறது.
நிலவளம் ரெங்கராஜன்
