ஆங்கிலிக்கன் திருச்சபையின் முதல் பெண் பேராயராக சரளா முல்லலி நியமனம்!

லண்டன் பிஷப் சாரா முல்லலி (63) வெள்ளிக்கிழமை (அக்டோபர் 3, 2025) ஆக்ஸ்போர்டு ஆயராக (Archbishop of Canterbury) அறிவிக்கப்பட்டார். ஆங்கிலிக்கன் திருச்சபையின் 106வது ஆன்மீகத் தலைவர் இவரே. இந்தப் பதவிக்கு ஒரு பெண் தேர்வு செய்யப்படுவது, பல நூற்றாண்டுகள் பழமையான இந்தத் திருச்சபையில் ஒரு மாபெரும் வரலாற்று மைல்கல்லாகும். இவருக்கு முன் 105 ஆண்கள் இந்தப் பதவியை வகித்துள்ளனர்.

பின்னணியும் முக்கியத்துவமும்

முல்லலி ஒரு மதத் தலைவராக வருவதற்கு முன்பு, இங்கிலாந்தின் முன்னாள் தலைமைச் செவிலியர் அதிகாரியாக (former chief nursing officer for England) இருந்தார். செவிலியர் பணியில் இருந்தபோது சமூகத்திற்கு அவர் ஆற்றிய சிறந்த பங்களிப்பிற்காக அவருக்கு ‘டேம்’ என்ற பட்டம் வழங்கப்பட்டது. 1994-இல் தான் திருச்சபை முதல் பெண் பாதிரியாரை நியமித்தது, முதல் பெண் பிஷப் 2015-இல் நியமிக்கப்பட்டார். இந்தச் சூழலில், திருச்சபையின் உலகளாவிய ஆன்மீகத் தலைமைப் பதவிக்கு ஒரு பெண் நியமிக்கப்படுவது, திருச்சபையில் பெண்களின் பங்களிப்பு எவ்வளவு தூரம் முன்னேறியுள்ளது என்பதற்கான ஒரு சான்று.

பிரதமர் கெய்ர் ஸ்டார்மர் (Keir Starmer) இந்தப் புதிய நியமனத்தை வரவேற்று, “ஆங்கிலிக்கன் திருச்சபை இந்த நாட்டிற்கு மிக முக்கியமான ஒன்றாகும். அதன் தேவாலயங்கள், பேராலயங்கள், பள்ளிகள் மற்றும் தொண்டு நிறுவனங்கள் நமது சமூகத்தின் கட்டமைப்பின் ஒரு பகுதியாக உள்ளன. கேன்டர்பரியின் ஆயர் நமது தேசிய வாழ்வில் ஒரு முக்கிய பங்காற்றுவார்” என்று குறிப்பிட்டு அவருக்கு வாழ்த்து தெரிவித்தார்.

தீர்மானிக்க வேண்டிய முக்கிய சவால்கள்

சரா முல்லலிக்கு முன் இருக்கும் பாதை சவால்களால் நிறைந்திருக்கிறது. அவற்றுள் சில:

1. பாலினம் மற்றும் LGBTQ+ பிரிவினர் குறித்த பிளவுகள்: திருச்சபைக்குள் பெண்கள் மற்றும் LGBTQ+ சமூகத்தினரின் நிலை குறித்து தீவிரமான கருத்து வேறுபாடுகள் உள்ளன. இந்தப் பிளவுகளைச் சமாளிப்பது முல்லலியின் முதல் முக்கிய பணியாக இருக்கும்.
2. பாலியல் துஷ்பிரயோக ஊழல்கள்: கடந்த ஒரு தசாப்தத்திற்கும் மேலாக திருச்சபையை அலைக்கழிக்கும் பாலியல் துஷ்பிரயோக ஊழல்களைத் தீர்க்கவும், பாதிக்கப்பட்டவர்களுக்கு நியாயம் வழங்கவும் திருச்சபை தலைவர்கள் போதுமான நடவடிக்கை எடுக்கவில்லை என்ற குற்றச்சாட்டு உள்ளது. இந்தப் பிரச்சினையை முல்லலி எதிர்கொண்டு, திருச்சபையின் நம்பிக்கையை மீட்டெடுக்க வேண்டிய மிகப்பெரிய சவால் உள்ளது.
3. முன்னாள் ஆயரின் ராஜினாமா: முல்லலிக்கு முன் இருந்த ஆர்ச்பிஷப் ஜஸ்டின் வெல்பி (Justin Welby), ஒரு தன்னாட்சி விசாரணைக்குப் பிறகு நவம்பர் 2024-இல் ராஜினாமா செய்தார். திருச்சபையின் கோடைக்கால முகாம்களில் தன்னார்வலர் ஒருவரால் நடத்தப்பட்ட பாலியல் மற்றும் உடல்ரீதியான தொடர் துஷ்பிரயோகம் பற்றி அறிந்தவுடனே அவர் போலீஸிடம் தெரிவிக்கத் தவறிவிட்டார் என அந்த விசாரணை கண்டறிந்தது.

   * திருச்சபை துஷ்பிரயோகத்தால் பாதிக்கப்பட்டோரின் ஆதரவாளரான ஆண்ட்ரூ கிரேஸ்டோன் (Andrew Graystone), “புதிய ஆர்ச்பிஷப்புக்கு, குறைந்து வரும் திருச்சபை வருகை, அதிகாரிகளின் அதிகப்படியான நிர்வாகக் கட்டமைப்புகள், மற்றும் பாதிரியார்களுக்குள் படுக்கையறை விவகாரங்கள் குறித்த வாக்குவாதங்கள் போன்ற சவால்கள் இருக்கும். ஆனால், ஒரு தசாப்த கால துஷ்பிரயோக ஊழல்களுக்குப் பிறகு, நம்பிக்கையை மீட்டெடுப்பதே புதிய ஆர்ச்பிஷப்புக்கான மிகப்பெரிய சவாலாகும்” என்று தெரிவித்துள்ளார்.

உலகளாவிய தாக்கம்

கேன்டர்பரியின் ஆர்ச்பிஷப் நியமனம் இங்கிலாந்தில் செய்யப்பட்டாலும், அதற்கு மன்னர் சார்லஸ் III (King Charles III) ஒப்புதல் அளித்தாலும், இதன் தாக்கங்கள் உலகம் முழுவதும் எதிரொலிக்கும்.

• ஆங்கிலிக்கன் கம்யூனியன் (Anglican Communion) 165 நாடுகளில் பரவியுள்ள 85 மில்லியனுக்கும் அதிகமான உறுப்பினர்களைக் கொண்டுள்ளது. அமெரிக்காவில் உள்ள எபிஸ்கோபல் திருச்சபை (Episcopal Church) உட்பட ஒவ்வொரு தேசிய திருச்சபைக்கும் அதன் சொந்தத் தலைவர் இருந்தாலும், கேன்டர்பரியின் ஆர்ச்பிஷப் ‘சமமானவர்களில் முதன்மையானவர்’ (first among equals) என்று கருதப்படுகிறார். எனவே, உலகெங்கிலும் உள்ள ஆங்கிலிக்கன் உறுப்பினர்களிடத்தில் முல்லலியின் நியமனம் ஒரு முக்கிய தாக்கத்தை ஏற்படுத்தும்.

தேர்வு செயல்முறை

முல்லலியைத் தேர்ந்தெடுப்பதற்கான செயல்முறை, பிரிட்டனின் உள்நாட்டு உளவு அமைப்பான MI5-இன் முன்னாள் தலைமை இயக்குநர் தலைமையிலான சுமார் 20 பேர் கொண்ட குழுவால் நடத்தப்பட்ட 11 மாத மாரத்தான் ஆகும்.

• லண்டன் கிங்ஸ் கல்லூரியில் (King’s College London) முடியாட்சி மற்றும் நவீன மத சிந்தனை நிபுணர் ஜார்ஜ் க்ராஸ் (George Gross) கூறுகையில், “அண்மையில் போப் மிக விரைவாகத் தேர்ந்தெடுக்கப்பட்டார், ஆனால் கேன்டர்பரியின் ஆர்ச்பிஷப்பைத் தேர்ந்தெடுக்க மாதங்கள் ஆகின்றன” என்று தெரிவித்தார்.
• இந்தத் தேர்வு செயல்முறை அதிக வெளிப்படையானது அல்ல. எந்தக் குறுகிய கால வேட்பாளர் பட்டியலும் வெளியிடப்படவில்லை, பகிரங்க வாக்கெடுப்பும் நடத்தப்படவில்லை. திருச்சபையை முன்னோக்கிக் கொண்டு செல்ல எந்த பிஷப் பொருத்தமானவர் என்று கண்டறிய, பல்வேறு ஆர்வலர் குழுக்களின் கருத்தைக் கேட்டறியும் ஒரு மெதுவான செயல்முறையாகவே இது இருந்தது.

வரலாற்றை மாற்றி, பல முற்போக்கான நிலைப்பாடுகளை ஆதரிக்கும் ஒரு பெண் தலைமைப் பொறுப்புக்கு வந்துள்ளார். அதே சமயம், திருச்சபையின் அடித்தளத்தையே உலுக்கிய சவால்களும், பிளவுகளும் அவரை எதிர்கொள்ள காத்திருக்கின்றன. திருச்சபையின் புதிய அத்தியாயம் சாரா முல்லலியின் தலைமையில் எப்படி அமையப்போகிறது என்பதை உலகமே உற்றுநோக்கி வருகிறது.

ரமாபிரபா