விளையாட்டில் அரசியல் வக்கிரம்: விலகிப் போவது ‘பெருமை’ அல்ல… பெரும் ‘சிறுமை’!

உலகமே ஆவலோடு எதிர்பார்க்கும் டி20 உலகக்கோப்பை கிரிக்கெட் திருவிழா அடுத்த மாதம் தொடங்க உள்ளது. ஆனால், மைதானத்தில் பந்துகளை எதிர்கொள்ள வேண்டிய அணிகள், இன்று அரசியலை எதிர்கொள்ள முடியாமல் ‘புறக்கணிப்பு’ என்ற ஒற்றை ஆயுதத்தைக் கையில் எடுத்துள்ளன. இந்தியாவுக்கு வர மறுத்து வங்கதேசம் வெளியேறியதைத் தொடர்ந்து, இப்போது பாகிஸ்தானும் அதே பாதையில் செல்லத் துடிப்பது ஆரோக்கியமான விளையாட்டிற்கு அழகல்ல!

பாதுகாப்பு சாக்கா? அரசியல் பிடிவாதமா?

இந்தியாவுக்கு வந்து விளையாடத் தங்களுக்குப் பாதுகாப்பு அச்சுறுத்தல் இருப்பதாகக் கூறி வங்கதேசம் இந்தத் தொடரில் இருந்து விலகியுள்ளது. அவர்களைத் தொடர்ந்து, பாகிஸ்தானும் இப்போது தனது நிலைப்பாட்டை மாற்றிக்கொள்ளத் துடிக்கிறது. “இந்தியா மட்டும் பாகிஸ்தானுக்கு வர மறுக்கும்போது, நாங்கள் ஏன் இந்தியாவுக்குச் செல்ல வேண்டும்?” என்ற ஈகோ யுத்தமே இதற்குப் பின்னால் ஒளிந்திருக்கிறது.

வங்கதேசத்தின் பிடிவாதம்.. பாகிஸ்தானின் தூண்டுதல்!

வங்கதேசத்தின் இந்தத் திடீர் விலகலுக்குப் பின்னால் பாகிஸ்தான் கிரிக்கெட் வாரியத்தின் (PCB) தூண்டுதல் இருப்பதாகச் சர்வதேச ஊடகங்கள் குற்றம் சாட்டுகின்றன. ஐசிசி (ICC) எவ்வளவோ சமாதானம் செய்தும், ‘இந்தியாவுக்குப் பதில் இலங்கையில் போட்டிகளை நடத்துங்கள்’ என்ற வங்கதேசத்தின் கோரிக்கையை ஏற்க முடியாது என ஐசிசி கையை விரித்துவிட்டது. இதனால் தற்போது வங்கதேசத்திற்குப் பதில் ஸ்காட்லாந்து அணி உள்ளே வந்துவிட்டது.

இது பெருமை அல்ல… கேவலம்!

ஒரு விளையாட்டு வீரன் தனது திறமையை மைதானத்தில் நிரூபிக்க வேண்டும். அதை விடுத்து, அரசியல் காரணங்களுக்காக உலகத்தரம் வாய்ந்த ஒரு தொடரைப் புறக்கணிப்பது அந்த நாட்டின் கிரிக்கெட் ரசிகர்களுக்குச் செய்யும் துரோகம்.

• வங்கதேசம் விலகியதால் அந்நாட்டு கிரிக்கெட் வாரியத்திற்கு ஏற்படப்போகும் நிதியிழப்பு ஒருபுறம் இருக்கட்டும், சர்வதேச அளவில் அந்த அணிக்குக் கிடைக்கும் கௌரவம் என்னவாகும்?

• பாகிஸ்தானைப் பொறுத்தவரை, ஏற்கனவே பொருளாதார நெருக்கடியில் சிக்கித் தவிக்கும் சூழலில், ஐசிசி வழங்க வேண்டிய கோடிக்கணக்கான நிதியையும், எதிர்காலத் தொடர்களில் பங்கேற்கும் உரிமையையும் இழக்கத் துணிவது ‘சிறுபிள்ளைத்தனமான’ முடிவு.

ஆந்தை ரிப்போர்ட்டர் பார்வை

விளையாட்டு என்பது நாடுகளை இணைக்கும் பாலமாக இருக்க வேண்டும். ஆனால் இங்கே ‘ஈகோ’வும், ‘அரசியலும்’ பாலத்தை உடைத்துக் கொண்டிருக்கின்றன.

“வீரர்கள் மைதானத்தில் ஓட வேண்டும்… அரசியல்வாதிகள் பின்னால் அல்ல!”

இந்தியா-பாகிஸ்தான் மோதல் என்பது எப்போதும் ஒரு வியாபாரத் தந்திரமாகவே பார்க்கப்படுகிறது. இப்போது வங்கதேசத்தையும் இதில் கோர்த்துவிட்டு, ஒட்டுமொத்தத் தொடரின் சுவாரஸ்யத்தைக் கெடுப்பது ஆசிய கிரிக்கெட்டின் வீழ்ச்சிக்கே வழிவகுக்கும். விலகிப் போவதால் நீங்கள் பெரிய ஆளாகத் தெரியலாம், ஆனால் வரலாற்றில் இது ஒரு ‘சிறுமை’யாகவே பதியப்படும்!