கர விமர்சனம்:உழவனின் வலியும்…ஒரு கலகக்காரனின் எழுச்சியும்!

விவசாயி சேற்றில் கால் வைத்தால்தான் நாம் சோற்றில் கை வைக்க முடியும் என்பார்கள். ஆனால், அந்த விவசாயியின் கழுத்தில் வட்டி எனும் தூக்குக்கயிறு விழுந்தால் என்னவாகும்? இந்த ரத்தமும் கண்ணீரும் கலந்த நிதர்சனத்தை ஒரு அதிரடி த்ரில்லர் களத்தில் நின்று ‘ஆணித்தரமாக’ப் பேசியிருக்கிறது ‘கர’. வெறும் புள்ளிவிவரங்களால் (NCRB 2023 அறிக்கை) கடந்து போக வேண்டிய செய்தியை, ஒரு உணர்ச்சிகரமான சினிமாவாக மாற்றி ரசிக்க வைத்திருக்கிறார் இயக்குனர் விக்னேஷ் ராஜா. ஆனால் ஏனோ தலைப்பில் கூட போதிய அக்கறைக் காட்டவில்லை என்பதுதான் வருத்தம்.

🎬 கதை: துரோகத்தை வீழ்த்தும் ஒரு திருடன்!

1990-களின் மண் வாசனை மாறாத பின்னணி. ஒரு சாதாரண விவசாயி (கே.எஸ். ரவிக்குமார்), தான் நம்பிய நிலத்தை வங்கிக் கடனுக்காகவும், கழுத்தை நெரிக்கும் வட்டிப் பொறிக்காகவும் இழந்து நிற்கிறார். அதிகார வர்க்கத்தின் வஞ்சகத்தால் அப்பா சிந்திய கண்ணீருக்கு, மகன் கரசாமி (தனுஷ்) காட்டும் எதிர்வினைதான் இக்கதை. இழந்த கௌரவத்தை மீட்க கரசாமி ஒரு தேர்ந்த திருடனாக (Professional Thief) மாறுகிறார். அவர் வங்கி அமைப்பிற்கு எதிராக நடத்தும் அந்தப் புத்திசாலித்தனமான ஆட்டம், தியேட்டரில் விசில் பறக்க வைக்கிறது. ஒரு கட்டத்தில் போலீஸுக்கும் (சுராஜ்), கரசாமிக்கும் இடையிலான ஆடு-புலி ஆட்டம் ‘சீட் எட்ஜ்’ த்ரில்லராகப் பயணிக்கிறது.

✨ தனுஷ்: நடிப்பின் ‘கரா’த்தே!

தனுஷ் இப்போது ஒரு ஆக்சன் ஹீரோவாக மட்டும் தெரியவில்லை; அந்தப் பாத்திரமாகவே வாழ்கிறார். ஒரு பக்கம் தந்தையின் ஏமாற்றத்தைக் கண்டு துடிக்கும் மகன், மறுபக்கம் போலீஸையே திணறடிக்கும் கில்லாடித் திருடன் என இரண்டு பரிமாணங்களிலும் மிரட்டியிருக்கிறார். குறிப்பாக, ‘க்ரே ஷேட்’ கதாபாத்திரத்தில் அவர் காட்டும் அந்த அழுத்தமான முகபாவனைகள் – ‘நடிப்பு அசுரன்’ என்பதை மீண்டும் ஒருமுறை நிரூபிக்கிறது.

🎭 நட்சத்திரங்களின் பலம்

• கே.எஸ். ரவிக்குமார்: அனுபவ நடிப்பால் நம்மை நெகிழ வைக்கிறார். நிலத்தை இழந்து அவர் கலங்கும் காட்சிகள் திரையரங்கையே அமைதியாக்குகிறது.

• மமிதா பைஜூ: ஒரு அழகான, ஆழமான நடிப்பை வழங்கியிருக்கிறார். தனுஷுடன் அவர் தோன்றும் காட்சிகள் திரையில் கவிதை.

• சுராஜ் & ஜெயராம்: படத்தின் வேகத்தை ஒரு நொடி கூட குறையாமல் பார்த்துக்கொள்கிறார்கள். வில்லத்தனமும், அதிகாரத் தோரணையும் கச்சிதம்.

• கருணாஸ்: தனுஷின் நிழலாக வந்து கைதட்டல் பெறுகிறார்.

🎸 தொழில்நுட்பத்தின் விஸ்வரூபம்

ஜி.வி. பிரகாஷின் இசை இந்தப் படத்தின் முதுகெலும்பு. த்ரில்லர் காட்சிகளில் பிசிறில்லாத பின்னணி இசையும், ‘கண்ணம்மா ஏ கண்ணம்மா’ பாடலின் மென்மையும் ஜி.வி-யின் முத்திரை. தேனி ஈஸ்வரின் ஒளிப்பதிவு நம்மை 90-களுக்கே அழைத்துச் செல்கிறது. மாயபாண்டியின் கலை இயக்கம் மற்றும் வங்கி கொள்ளைக் காட்சிகள் ஒரு ‘சர்வதேச தரம்’.

🖋️ ஆந்தை ரிப்போர்ட்டர் பார்வை

‘கரா’ வெறும் எண்டர்டெயின்மென்ட் மட்டுமல்ல; விவசாயிகளின் கடன் சுமையைப் பற்றிப் பேசும் ஒரு சமூகப் புரட்சி. “நிலம் என்பது வெறும் மண் அல்ல, அது ஒரு விவசாயியின் உயிர்” என்பதை விறுவிறுப்பு குறையாமல் சொன்ன விதத்தில் இயக்குனர் விக்னேஷ் ராஜா ஜெயித்திருக்கிறார். தனுஷின் திரைப்பயணத்தில் இது மற்றுமொரு ‘மாஸ்டர் பீஸ்’.

மார்க்: 3.75 / 5