உலக மிஸோஃபோனியா நாள்:சத்தங்களால் நரகமாகும் மனிதர்களின் வாழ்வு!

நம்மில் பலருக்குச் சில ஒலிகள் எரிச்சலை ஏற்படுத்தலாம். ஆனால், ஒரு நபர் சாப்பிடும்போது எழுப்பும் மெல்லும் சத்தம் (Chewing sound), விசைப்பலகையைத் தட்டும் ஓசை (Keyboard typing) அல்லது சாதாரண மூச்சுக்காற்றின் சத்தம் கூட ஒருவருக்குக் கடுமையான கோபத்தையோ, பீதியையோ அல்லது தற்கொலை எண்ணத்தையோ தூண்டினால் எப்படி இருக்கும்? கற்பனை செய்யவே பயங்கரமாக இருக்கும் இந்த நிலைக்குப் பெயர்தான் ‘மிஸோஃபோனியா’ (Misophonia). ஒவ்வொரு ஆண்டும் ஜூலை 9 அன்று உலக மிஸோஃபோனியா விழிப்புணர்வு நாள் கடைப்பிடிக்கப்படுகிறது. இது வெறும் ஒரு மருத்துவக் குறைபாடு அல்ல; மனிதர்களின் அன்றாட வாழ்வை நரகமாக்கும் ஒரு தீவிர நரம்பியல் பிரச்சனை என்பதைப் புரிய வைப்பதே இந்த நாளின் நோக்கம்.

சுற்றி நடக்கும் சாதாரண சத்தங்களைக்கூட சகித்துக் கொள்ள முடியாமல் தவிக்கும் மில்லியன் கணக்கான மக்களின் வலியையும், இந்த விழிப்புணர்வு நாளுக்குப் பின்னால் இருக்கும் ஒரு சோகமான வரலாற்றையும் இச்சிறப்புக் கட்டுரையில் விரிவாகப் பார்ப்போம்.

மிச்செல் டெல் வேல்: ஒரு மரணமும் இந்த நாளின் உருவாக்கமும்

ஒவ்வொரு விழிப்புணர்வு நாளுக்குப் பின்னாலும் ஒரு வரலாறு இருக்கும், ஆனால் உலக மிஸோஃபோனியா நாளுக்குப் பின்னால் ஒரு கண்ணீர் வரலாறு இருக்கிறது. ஜூலை 9 என்பது அமெரிக்காவைச் சேர்ந்த மிச்செல் டெல் வேல் (Michelle Del Valle) என்ற சிறுமியின் பிறந்தநாளாகும். தனது 13 வயது முதல் மிஸோஃபோனியா குறைபாட்டால் மிகக் கடுமையாகப் பாதிக்கப்பட்டார் மிச்செல். சுற்றியிருந்த சாதாரண ஒலிகள் அவரது மூளையை வதைத்தன.

பல ஆண்டுகள் போராடியும், இந்த விசித்திரமான நோய்க்குச் சமூகத்தில் முறையான அங்கீகாரமோ, மருத்துவப் புரிதலோ இல்லாததால் ஏற்பட்ட தனிமையின் காரணமாக, தனது 17-வது வயதில் மிச்செல் தற்கொலை செய்து கொண்டார். அவரது மரணத்திற்குப் பிறகு, அவரைப் போன்ற மில்லியன் கணக்கான குழந்தைகள் மற்றும் மனிதர்களின் உயிரைக் காக்கவும், அவர்களுக்கு ஆதரவளிக்கவும் ‘soQuiet’ போன்ற இலாப நோக்கமற்ற சர்வதேச அமைப்புகள் இணைந்து மிச்செல் டெல் வேலின் பிறந்தநாளை உலக மிஸோஃபோனியா விழிப்புணர்வு நாளாக அறிவித்து முன்னெடுத்து வருகின்றன.

மிஸோஃபோனியா என்றால் என்ன? (The Science of Misophonia)

கிரேக்க மொழியில் மிஸோஃபோனியா என்றால் ‘ஒலியை வெறுத்தல்’ (Hatred of sound) என்று பொருள். ஆனால், மருத்துவ ரீதியாக இது வெறும் வெறுப்பு அல்ல. இது காது சம்பந்தப்பட்ட குறைபாடும் அல்ல; இது ஒரு நரம்பியல் சார்ந்த கோளாறு (Neurological condition).

சாதாரண மனிதர்களின் மூளை அன்றாட ஒலிகளை வடிகட்டி, தேவையற்ற சத்தங்களை அலட்சியப்படுத்த பழகியிருக்கும். ஆனால், மிஸோஃபோனியாவால் பாதிக்கப்பட்டவர்களின் மூளையில் உள்ள ‘ஆடிட்டரி கார்டெக்ஸ்’ (Auditory Cortex) மற்றும் உணர்ச்சிகளைக் கட்டுப்படுத்தும் ‘லிம்பிக் சிஸ்டம்’ (Limbic System) ஆகியவற்றுக்கு இடையே தவறான தொடர்பு ஏற்படுகிறது. இதனால், குறிப்பிட்ட சில ஒலிகளைக் கேட்கும்போது, அவர்களின் மூளை அதனை ஒரு பெரிய ஆபத்தாக அல்லது தாக்குதலாக நினைத்து ‘ஃபைட் ஆர் ஃபிளைட்’ (Fight or Flight) என்ற அதீத பாதுகாப்பு நிலைக்குச் சென்றுவிடுகிறது.

மனிதர்களைப் பைத்தியமாக்கும் தூண்டுதல் ஒலிகள் (Triggers)

மிஸோஃபோனியாவைத் தூண்டும் ஒலிகள் (Triggers) நபர் பொதுவானவை மற்றும் அன்றாட வாழ்வில் நாம் சாதாரணமாகக் கடந்து செல்பவை:

• உணவு ஒலிகள்: மற்றவர்கள் மெல்லுதல், உறிஞ்சுதல், கடித்தல் அல்லது விழுங்குதல்.

• சுவாச ஒலிகள்: கனமாக மூச்சை உள்ளிழுத்தல், குறட்டை, மூக்கை உறிஞ்சுதல், கொட்டாவி விடுதல்.

• அலுவலக/வீட்டு ஒலிகள்: பேனா முனையைக் கிளிக் செய்தல், கீபோர்டு தட்டுதல், கடிகார முள் நகர்தல், நகம் வெட்டுதல்.

இந்த ஒலிகளைக் கேட்கும்போது பாதிக்கப்பட்ட நபர்களுக்குக் கடுமையான கோபம், உடல் நடுங்குதல், நெஞ்சு படபடப்பு, அந்த இடத்தை விட்டு ஓடிவிடலாமா என்ற பீதி மற்றும் மன அழுத்தம் ஆகியவை உடனடியாக ஏற்படும். இதனால் அவர்கள் பொது இடங்கள், குடும்ப விழாக்கள், ஏன் அலுவலகங்களுக்குக் கூடச் செல்ல பயந்து தங்களைத் தனிமைப்படுத்திக் கொள்கிறார்கள்.

விழிப்புணர்வு நாளின் முக்கிய நோக்கங்கள்

சமூகத்தில் மிஸோஃபோனியா பற்றிய புரிதல் மிகக் குறைவாக இருப்பதால், இந்த விழிப்புணர்வு நாள் மூன்று முக்கிய இலக்குகளைக் கொண்டு இயங்குகிறது:

1. களங்கத்தைத் துடைப்பது (Removing Social Stigma): பாதிக்கப்பட்ட நபர்களைச் சுற்றியிருப்பவர்கள் “நீ சும்மா ஓவர் ஆக்ட் பண்ற”, “கொஞ்சம் அட்ஜஸ்ட் பண்ணிக்கலாம்ல” என்று அலட்சியப்படுத்துகிறார்கள். இது மனநலக் குறைபாடு அல்ல, ஒரு நரம்பியல் பிரச்சனை என்பதைப் புரிய வைத்து சமூகக் களங்கத்தைத் துடைப்பது இதன் முதல் நோக்கம்.

2. பாதிக்கப்பட்டவர்களுக்கான ஆதரவு: உலகளவில் கோடிக்கணக்கான மக்கள் இதனால் அவதிப்படுகிறார்கள். அவர்களுக்குத் தேவையான மருத்துவ, உளவியல் ஆலோசனைகளையும், அவர்கள் பாதுகாப்பாக உணர்வதற்கான சூழலையும் உருவாக்குவது.

3. சுகாதார நிபுணர்களின் புரிதல்: பல பொது மருத்துவர்களுக்கே இதைப் பற்றிய துல்லியமான அறிவியல் புரிதல் இருப்பதில்லை. எனவே, மருத்துவ உலகினரிடையே இதுகுறித்த தீவிர ஆராய்ச்சிகளையும் சரியான சிகிச்சை முறைகளையும் கொண்டு சேர்ப்பது.

அன்றாட வாழ்வின் பாதிப்பும் தற்காப்பு வழிகளும்

மிஸோஃபோனியா ஒரு மனிதனின் ஒட்டுமொத்த வாழ்வாதாரத்தையும், உறவுகளையும் கூடப் பாதிக்கக்கூடியது. இதிலிருந்து தப்பிக்கப் பாதிக்கப்பட்ட நபர்கள் பெரும்பாலும் ‘அகௌஸ்டிக் ஐசோலேஷன்’ (Acoustic Isolation) எனப்படும் சத்தத்தைக் கட்டுப்படுத்தும் இயர்போன்கள், ஒலியைத் தடுக்கும் இயர்பிளக்குகள் (Earplugs) அல்லது பின்னணி இரைச்சலை உருவாக்கும் ஒயிட் நாய்ஸ் (White noise) கருவிகளைப் பயன்படுத்துகிறார்கள்.

காக்னிட்டிவ் பிஹேவியரல் தெரபி (CBT) போன்ற உளவியல் சிகிச்சைகள் இந்த ஒலிகளால் ஏற்படும் கோபத்தைக் கையாள ஓரளவு உதவுகின்றன. ஜூலை 9 போன்ற விழிப்புணர்வு நாட்கள், சத்தமில்லாத ஒரு அமைதியான சூழலையும், சக மனிதர்களின் சகிப்புத்தன்மையையும் பாதிக்கப்பட்டவர்களுக்குப் பெற்றுத் தருவதற்கான ஒரு முக்கியமான தொடக்கப்புள்ளியாகும்.

வாத்தீ அகஸ்தீஸ்வரன்