உலக சதுரங்க தின வாழ்த்துக்கள்! ♟️

இன்று ஜூலை 20, ஆம், இன்றுதான் அனைத்துலக சதுரங்க நாள் (International Chess Day)! சதுரங்கப் பிரியர்கள் அனைவருக்கும் வாழ்த்துக்கள்! இந்த தினம் ஏன் கொண்டாடப்படுகிறது தெரியுமா? 1924 ஆம் ஆண்டு இதே ஜூலை 20 ஆம் தேதிதான், உலக செஸ் கூட்டமைப்பு (World Chess Federation) பிரான்ஸ் நாட்டின் பாரிஸ் நகரில் நிறுவப்பட்டது. அந்த நிகழ்வின் நினைவாகத்தான் ஒவ்வொரு வருடமும் இந்த நாள் உலக சதுரங்க தினமாகக் கொண்டாடப்படுகிறது.

சதுரங்கம்: ஓர் அரச விளையாட்டு! 👑

பண்டைய காலத்தில் அரசர்களின் விளையாட்டாக இருந்த சதுரங்கம், இன்றும் உலகம் முழுவதும் ஒரே மாதிரியாக விளையாடப்படும் ஒரு சுவாரஸ்யமான பலகை விளையாட்டு. இதற்கு தமிழில் செங்களம், வல்லாட்டம் என்ற பெயர்களும் உண்டு. ஆனைக்குப்பு என்றும் அழைக்கப்படும் இந்த விளையாட்டில், ஒரு பக்கத்திற்கு 16 காய்கள் வீதம் மொத்தம் 32 காய்கள் பயன்படுத்தப்படும். கருப்பு மற்றும் வெள்ளை நிறங்களில் காய்கள் இருப்பது வழக்கம். 8 வரிசைகளிலும், 8 நிரல்களிலும் அமைந்த 64 கட்டங்களைக் கொண்ட சதுரங்கப் பலகையில், கருப்பு-வெள்ளை நிறக் கட்டங்கள் மாறி மாறி அமைந்திருக்கும்.

சதுரங்கத்தின் வரலாறு மற்றும் சிறப்புகள்! 📜

ஏழாம் நூற்றாண்டில் இந்தியாவில்தான் சதுரங்கம் உருவானது என்றும், பின்னர் மங்கோலியா வழியாக உலகமெங்கும் பரவியது என்றும் வரலாறு சொல்கிறது. குறிப்பாகச் சொல்வதனால்  இது இந்தியாவில், குப்தப் பேரரசின் போது (சுமார் 6 ஆம் நூற்றாண்டில்) தோன்றியதாக நம்பப்படுகிறது. அங்கிருந்து அது பாரசீக சசானிட் பேரரசிற்கும், பின்னர் இஸ்லாமிய உலகிற்கும், பின்னர் ஐரோப்பாவிற்கும், இறுதியில் உலகின் பிற பகுதிகளுக்கும் பரவியது.உலகம் முழுவதும் சுமார் 600,000,000 (அறுநூறு மில்லியன்) மக்களுக்கு சதுரங்கம் விளையாடத் தெரியும் என்று ஒரு கணக்கெடுப்பு தெரிவிக்கிறது. ஆங்கில மொழியில் அச்சிடப்பட்ட இரண்டாவது புத்தகம் சதுரங்கம் பற்றியது தான் என்கிற தகவலும் இங்கு கவனிக்கத்தக்கது. இதன் சரியான விதிமுறைகள் இத்தாலியில் 16 ஆம் நூற்றாண்டில் உருவாயின. ராஜா, ராணி, சிப்பாய் உள்ளிட்ட காய்களைக் கொண்டு விளையாடப்படும் இந்த விளையாட்டு, வெறும் பொழுதுபோக்கு மட்டுமல்ல. இது ஒரு கலை, ஓர் அறிவியல் மற்றும் நமது புத்திக்கூர்மைக்கு உதவும் ஓர் அரசமுறை விளையாடல்!

சதுரங்கம் மனித இனத்தின் ஆரம்பகால விளையாட்டுகளில் ஒன்று. செஸ் விளையாட்டைத் தொடர்ந்து விளையாடும் சிறுவர், சிறுமிகளின் மூளை மிகவும் நுட்பமாகவும், அவர்களின் வேலைத்திறன் மேம்படுவதாகவும் ஆய்வாளர்கள் கண்டறிந்துள்ளனர். அவர்களின் படிப்புத்திறன் மற்றும் ஞாபகசக்தி கூட அதிகரிப்பதாக சமீபகால ஆய்வுகள் உறுதிப்படுத்துகின்றன!

மனிதர்கள் மட்டுமே ஆடிக்கொண்டிருந்த செஸ் விளையாட்டை இப்போது ரோபோக்களும் ஆடத் தொடங்கிவிட்டன. இருந்தாலும், ரோபோக்களை மிஞ்சும் சதுரங்க வீரர்களும் இன்னும் இருக்கிறார்கள் என்பது நமக்கான ஆறுதல்தான்! சதுரங்கம் நம்முடைய மூளைக்கு வேலை கொடுப்பதற்கு மட்டுமல்ல, வறண்டுபோன நமது சிந்தனையைத் தூண்டும் ஒரு சிறந்த விளையாட்டாகவும் பயன்படுகிறது. செஸ் விளையாடிவிட்டு ஒரு கவிதையோ, நாவலோ எழுத முடியும் என்று நிரூபிக்கப்பட்டுள்ளது!

சதுரங்கம் கற்றுத்தரும் வாழ்க்கைப் பாடங்கள்! 💡

சதுரங்க விளையாட்டில் உள்ள ஒவ்வொரு காயும், வாழ்க்கையின் ஒவ்வொரு தருணத்தையும் பிரதிபலிக்கிறது. சிப்பாயின் முன்நகர்வு முதல் ராணியின் வலிமை வரை, ஒவ்வொரு நகர்விலும் ஒரு வாழ்க்கைக்கான பாடம் உண்டு. அவை என்னென்ன என்று பார்ப்போமா?

• திட்டமிடல் மற்றும் தொலைநோக்கு பார்வை: சதுரங்கம் ஒரு மூலோபாய விளையாட்டு. ஒவ்வொரு நகர்வையும், எதிராளியின் சாத்தியமான நகர்வுகளையும் கணித்து, பல நகர்வுகளுக்கு முன்னதாகவே திட்டமிட வேண்டும். இது வாழ்க்கையிலும், நம் இலக்குகளை அடைய தெளிவான திட்டமிடலும் தொலைநோக்கு பார்வையும் அவசியம் என்பதை உணர்த்துகிறது.
• பொருமையின் அவசியம்: அவசரப்பட்டு செய்யும் எந்த நகர்வும் தோல்வியில் முடியலாம். சரியான தருணத்திற்காகக் காத்திருந்து, நிதானமாகச் செயல்படுவது வெற்றியின் ரகசியம் என்பதை செஸ் கற்றுக்கொடுக்கிறது.
• தியாகத்தின் வலிமை: சில சமயங்களில், ஒரு பெரிய இலக்கை அடைய சிறிய தியாகங்களைச் செய்ய வேண்டியிருக்கும். ஒரு காயைத் தியாகம் செய்து, விளையாட்டில் பெரிய அனுகூலத்தைப் பெறுவது போல, வாழ்க்கையிலும் இது பொருந்தும்.
• தவறுகளிலிருந்து கற்றல்: எந்த ஒரு நகர்வும் தவறாகப் போகலாம். ஆனால் அந்தத் தவறில் இருந்து கற்றுக்கொண்டு, அடுத்த முறை அதைத் திருத்திக்கொள்வது அவசியம். வாழ்க்கையிலும் தோல்விகள் சகஜம், அதிலிருந்து பாடம் கற்றுக்கொண்டு முன்னேற வேண்டும்.
• ஒவ்வொரு காயின் முக்கியத்துவம்: சிப்பாய் முதல் ராஜா வரை, ஒவ்வொரு காய்க்கும் ஒரு குறிப்பிட்ட பங்கு உண்டு. சிறியதாகத் தோன்றும் சிப்பாய்கூட, சரியாகப் பயன்படுத்தப்பட்டால் ராணியாக மாற முடியும். இது வாழ்க்கையில், சிறியவர்கள் கூட பெரிய சாதனைகளைச் செய்ய முடியும் என்பதையும், ஒவ்வொருவரின் பங்களிப்பும் முக்கியம் என்பதையும் உணர்த்துகிறது.
• மாறுதல்களை எதிர்கொள்ளுதல்: விளையாட்டின் போக்கில் பல மாற்றங்கள் ஏற்படும். எதிர்பாராத திருப்பங்கள் வரும்போது, அதற்கேற்ப நமது திட்டங்களை மாற்றியமைக்க வேண்டும். வாழ்க்கையும் அப்படித்தான், எதிர்பாராத சவால்களை எதிர்கொள்ள நாம் தயாராக இருக்க வேண்டும்.
• நெகிழ்வுத்தன்மை (Flexibility): ஒரு திட்டம் வேலை செய்யவில்லை என்றால், மற்றொரு திட்டத்திற்கு மாற தயாராக இருக்க வேண்டும். கடினத்தன்மை மட்டுமல்ல, தேவைப்படும்போது நமது அணுகுமுறையை மாற்றிக்கொள்ளும் நெகிழ்வுத்தன்மையும் அவசியம்.
• முடிவெடுக்கும் திறன்: ஒவ்வொரு நகர்வும் ஒரு முடிவெடுக்கும் தருணம். விரைவாகவும் சரியாகவும் முடிவெடுக்கும் திறன், விளையாட்டிலும் வாழ்க்கையிலும் வெற்றிக்கு அடிப்படை.

சதுரங்கம் என்பது வெறும் விளையாட்டு அல்ல, அது வாழ்க்கையை அணுகும் கலையை நமக்குக் கற்றுத்தரும் ஒரு சிறந்த ஆசான். நீங்கள் சதுரங்கம் விளையாடுபவரா? இதில் நீங்கள் கற்றுக்கொண்ட வாழ்க்கைப் பாடங்கள் ஏதேனும் உண்டா?

நிலவளம் ரெங்கராஜன்