சர்வதேச சிறுகோள் தினம்!

உலகம் எப்படி அழியும் என்று ஆய்வாளர்கள் யோசிக்கும் போது asteroids எனப்படும் சிறுகோள் தாக்குதல் தான் பிரதானமாக இருக்கிறது. சுமார் 65 மில்லியன் ஆண்டுகளுக்கு முன்பு ஒரு பெரிய சிறுகோள் பூமியில் மோதியதால் தான் டைனோசர்கள் அழிந்தன என்று நம்பப்படுகிறது. அதேபோன்ற ஒரு நிகழ்வு இன்று நடந்தால், அது பேரழிவை ஏற்படுத்தும். சிறுகோள் மோதும்போது பெரிய அளவில் ஆற்றல் வெளியேறி அது பேரழிவை ஏற்படுத்தும்.. தீ மற்றும் சுனாமி போன்ற இயற்கை பேரிடர்களும் ஏற்படும். இந்த மோதலால் விண்வெளியில் தூசு மற்றும் குப்பைகள் கலக்கும். அது சூரிய ஒளியையே கூட மறைத்து நியூக்ளியர் பனிக்காலத்தை ஏற்படுத்தக்கூடும். இதனால் காலநிலை மாறி, பூமியில் உள்ள உயிரினங்கள் அழியக்கூடும். இதுபோன்ற பேரழிவைத் தடுக்கவே நாசா போன்ற விண்வெளி ஆய்வு நிறுவனங்கள் பூமியை நெருங்கும் சிறுகோள்களை தொடர்ந்து கண்காணித்து வருகின்றன. சிறுகோள் தாக்கலாம் என்றே ஆய்வாளர்கள் பலரும் கருதுகிறார்கள். முதல் சிறுகோள் தாக்குதல்களில் டைனாசர்கள் மொத்தமாக அழிந்தது போல.. இந்த முறை மனித இனம் அழியும் என எச்சரிக்கிறார்கள். இதை எல்லாம் பலருக்கும் உணர்த்தவே ஆண்டுதோறும் ஜூன் 30 அன்று உலகெங்கிலும் சர்வதேச சிறுகோள் நாள் (International Asteroid Day) கொண்டாடப்படுகிறது. இந்த நாள், சிறுகோள்களால் பூமிக்கு ஏற்படக்கூடிய ஆபத்துகள் குறித்தும், அவற்றை எதிர்கொள்ள எடுக்கப்பட வேண்டிய நடவடிக்கைகள் குறித்தும் பொதுமக்களிடையே விழிப்புணர்வை ஏற்படுத்த நிறுவப்பட்டது.

வரலாறு: துங்குஸ்கா நிகழ்வு

சிறுகோள் நாள் கொண்டாடப்படுவதற்குப் பின்னால் ஒரு முக்கியமான வரலாற்று நிகழ்வு உள்ளது. 1908 ஆம் ஆண்டு ஜூன் 30 ஆம் தேதி, ரஷ்யாவின் மத்திய சைபீரியாவில் உள்ள துங்குஸ்கா ஆற்றுக்கு அருகே ஒரு பெரிய சிறுகோள் மோதி வெடித்தது. இந்த நிகழ்வு “துங்குஸ்கா நிகழ்வு” என்று அழைக்கப்படுகிறது.

இந்த வெடிப்பு சுமார் 10 மில்லியன் டன் டிஎன்டி வெடிமருந்துக்கு சமமான சக்தியை வெளியிட்டது. இதன் விளைவாக, சுமார் 2,000 சதுர கிலோமீட்டர் பரப்பளவில் இருந்த 80 மில்லியன் மரங்கள் தரைமட்டமாக்கப்பட்டன. அதிர்ஷ்டவசமாக, இந்த பகுதி மக்கள் வாழாத காடு என்பதால், பெரிய அளவில் உயிர்ச்சேதம் ஏற்படவில்லை. இந்த நிகழ்வு, ஒரு சிறுகோளின் தாக்கம் பூமியில் எவ்வளவு பெரிய அழிவை ஏற்படுத்தக்கூடும் என்பதை உணர்த்தியது. இந்த துயரமான நிகழ்வை நினைவுகூரும் வகையிலும், எதிர்காலத்தில் இதுபோன்ற பாதிப்புகளைத் தடுக்க வேண்டியதன் அவசியத்தை உணர்த்தும் வகையிலும், ஐக்கிய நாடுகள் சபை 2016 ஆம் ஆண்டில் ஜூன் 30 ஆம் தேதியை சர்வதேச சிறுகோள் நாளாக அறிவித்தது.

சிறுகோள்கள் என்றால் என்ன?

சிறுகோள்கள் (Asteroids) என்பவை சூரிய குடும்பம் உருவானபோது எஞ்சிய சிறிய, பாறைப் பொருட்கள். இவை கோள்களைப் போல சூரியனைச் சுற்றி வருகின்றன.அதாவது சிறுகோள்கள் சூரியக் குடும்பம் உருவான காலத்திலிருந்தே இருந்து வருகின்றன. செவ்வாய், வியாழன் கோள்களுக்கு இடையே லட்சக்கணக்கான சிறுகோள்கள் காணப்படுகின்றன. பூமிக்கு அருகிலும் சிறுகோள்கள் இருக்கின்றன. அவையும் சூரியனைச் சுற்றி வருகின்றன. இந்தச் சிறுகோள்கள் பாறைகளால் ஆனவை. இவற்றில் தங்கம், பிளாட்டினம் போன்ற உலோகங்கள் இருக்கின்றன. இந்தச் சிறுகோள்களில் இருக்கும் உலோகங்களை பூமிக்குக் கொண்டுவருவதற்கான ஆராய்ச்சிகள் நடைபெற்று வருகின்றன.பெரும்பாலான சிறுகோள்கள் செவ்வாய் மற்றும் வியாழன் கிரகங்களுக்கு இடையில் உள்ள சிறுகோள் பட்டையில் காணப்படுகின்றன. இவை சிறிய கூழாங்கல் அளவு முதல் நூற்றுக்கணக்கான கிலோமீட்டர் விட்டம் கொண்ட குள்ள கிரகங்கள் வரை பல்வேறு அளவுகளில் இருக்கின்றன. பூமியின் மீது ஒவ்வொரு நாளும் சுமார் 100 டன் எடை அளவு சிறுகோள்கள் மோதுகின்றன. இவற்றில் பெரும்பாலானவை, சிறு சிறு மணல் அளவுதான். இவையே பூமியின் வளிமண்டலத்தில் பாயும்போது, உராய்ந்து எரிநட்சத்திரமாகக் காட்சிதருகிறது.  ஓர் ஆண்டில் சில தடவையேனும் சிறு கார் அளவுப் பாறை பூமியில் மோதி எரிந்துபோகும். அதன் சிறு பகுதி, பூமியில் விழும். இதுதான் எரிகல்.

சிறுகோள் நாளின் முக்கியத்துவம்

சிறுகோள் நாள் வெறும் ஒரு நினைவூட்டல் மட்டுமல்ல, இது பூமியின் பாதுகாப்பிற்கான ஒரு முக்கிய முயற்சியாகும். இதன் முக்கியத்துவங்கள்:

• விழிப்புணர்வு: சிறுகோள்கள் பூமிக்கு ஏற்படுத்தக்கூடிய அச்சுறுத்தல்கள் பற்றியும், அவற்றை எப்படி கண்டறிவது, கண்காணிப்பது மற்றும் திசைதிருப்புவது என்பது பற்றியும் மக்களுக்கு விழிப்புணர்வு ஏற்படுத்துதல்.
• ஆராய்ச்சி மற்றும் மேம்பாடு: சிறுகோள்களை கண்டறிந்து, அவற்றின் சுற்றுப்பாதையை கணிப்பதற்கான தொழில்நுட்பங்களை மேம்படுத்துதல். நாசா போன்ற விண்வெளி ஆராய்ச்சி நிறுவனங்கள், “கிரக பாதுகாப்பு ஒருங்கிணைப்பு அலுவலகம் (PDCO)” போன்ற பிரிவுகளை நிறுவி, பூமிக்கு அருகில் உள்ள அபாயகரமான சிறுகோள்களைக் கண்காணித்து வருகின்றன.
• தணிப்பு உத்திகள்: ஒரு சிறுகோள் பூமியை நோக்கி வரும் பட்சத்தில், அதன் பாதையை மாற்ற அல்லது அதை அழிக்க தேவையான தொழில்நுட்பங்களை உருவாக்குதல். உதாரணமாக, நாசாவின் டார்ட் (DART) திட்டம் ஒரு சிறுகோளின் மீது விண்கலத்தை மோதி அதன் சுற்றுப்பாதையை மாற்றும் முயற்சியில் வெற்றி பெற்றது. இது கிரக பாதுகாப்புக்கான ஒரு முக்கிய படியாகும்.
• சர்வதேச ஒத்துழைப்பு: சிறுகோள்களின் ஆபத்து உலகளாவியது என்பதால், நாடுகளுக்கிடையே ஒத்துழைப்பை மேம்படுத்துதல். சிறுகோள் தாக்க எச்சரிக்கை வலையமைப்புகள் (IAWN) மற்றும் விண்வெளிப் பணி திட்டமிடல் ஆலோசனைக் குழு (SMPAG) ஆகியவை சர்வதேச அளவில் தகவல்களைப் பகிர்ந்து கொண்டு, கூட்டு நடவடிக்கைகளை மேற்கொள்கின்றன.

சிறுகோள்களின் அபாயங்கள்

சிறிய சிறுகோள்கள் வளிமண்டலத்திற்குள் நுழையும்போது எரிந்துபோகலாம் அல்லது பெரிய சேதத்தை ஏற்படுத்தாமல் சிதைந்துவிடலாம். ஆனால், பெரிய சிறுகோள்கள் பூமியில் மோதினால் பெரும் அழிவை ஏற்படுத்தக்கூடும். 100 மீட்டர் விட்டமுள்ள ஒரு சிறுகோள் ஒரு நாட்டையே அழிக்கக்கூடும் என்றும், 2 கிமீ விட்டம் கொண்ட சிறுகோள் பூமியை மொத்தமாக அழிக்கும் ஆபத்து இருப்பதாகவும் விஞ்ஞானிகள் எச்சரித்துள்ளனர். டைனோசர்கள் அழிந்ததற்கு ஒரு பெரிய சிறுகோள் தாக்கம் ஒரு முக்கிய காரணம் என்று நம்பப்படுகிறது.

சர்வதேச சிறுகோள் நாள், நமது கிரகத்தின் பாதுகாப்பை உறுதி செய்வதற்கான கூட்டு முயற்சிகளின் முக்கியத்துவத்தை நினைவூட்டுகிறது. விண்வெளியில் உள்ள இந்த பாறைப் பொருட்களைப் பற்றிய நமது புரிதலை மேம்படுத்துவதன் மூலமும், தொழில்நுட்ப வளர்ச்சியை ஊக்குவிப்பதன் மூலமும், எதிர்கால தாக்கங்களில் இருந்து பூமியைப் பாதுகாக்க முடியும்.