இந்திய ஆசிரியைக்கு உலக அங்கீகாரம்: 9 கோடி ரூபாய் வென்ற ரூபிள் நாகி!

துபாயில் நடைபெற்ற சர்வதேச உச்சி மாநாட்டில் (World Government Summit), கலை மற்றும் கல்வித் துறையில் ஆற்றிய அசாத்தியப் பங்களிப்பிற்காக இந்தியாவைச் சேர்ந்த ரூபிள் நாகி (Rouble Nagi) அவர்களுக்கு ‘உலகளாவிய ஆசிரியர் விருது’ (Global Teacher Prize) வழங்கிக் கௌரவிக்கப்பட்டுள்ளது. இதனுடன் ஒரு மில்லியன் டாலர் (இந்திய மதிப்பில் சுமார் ரூ. 9.18 கோடி) பரிசுத் தொகையும் அவருக்கு வழங்கப்பட்டது.

யார் இந்த ரூபிள் நாகி?

• மாநிலம்: ரூபிள் நாகி ஜம்மு காஷ்மீரில் பிறந்தவர் என்றாலும், தற்போது மும்பையை (மகாராஷ்டிரா) மையமாகக் கொண்டு தனது பணிகளைச் செய்து வருகிறார்.

• பின்னணி: இவர் ஒரு புகழ்பெற்ற கலைஞர் (Artist), சமூக ஆர்வலர் மற்றும் கல்வியாளர்.

• அமைப்பு: ‘ரூபிள் நாகி ஆர்ட் பவுண்டேஷன்’ (Rouble Nagi Art Foundation) என்ற அமைப்பின் மூலம்   இந்தியா முழுவதும் 800-க்கும் மேற்பட்ட பயிற்சி கல்வி மையங்கள் அமைக்கப்பட்டுள்ளன. கல்வி கற்க பள்ளிக்குச் செல்லாத சிறாா்களுக்கு இந்த மையங்கள் வழியே கல்வி கற்றுத் தரப்படுகிறது. இதேபோல், குடிசைப் பகுதிகளில் உள்ள சுவா்களில் கல்வியறிவு, அறிவியல், கணிதம், வரலாறு உள்ளிட்டவை குறித்து ரூபிள் நாகி சித்திரம் வரைந்துள்ளாா்.பல்லாயிரக்கணக்கான ஏழை எளிய குழந்தைகளின் கல்வி மற்றும் வாழ்க்கை மேம்பாட்டிற்காக உழைத்து வருகிறார்.

விருது பெற்றுத் தந்த அசாத்தியச் சாதனை: ‘மிசால் மும்பை’ (Misaal Mumbai)

ரூபிள் நாகிக்கு இந்த உயரிய விருதைப் பெற்றுத் தந்ததில் மிக முக்கியமானது அவர் முன்னெடுத்த ‘மிசால் மும்பை’ என்ற திட்டமாகும்.

1. சேரிகளில் மாற்றத்தின் வண்ணம்: மும்பையின் தாராவி உள்ளிட்ட பல சேரிப் பகுதிகளில் உள்ள ஆயிரக்கணக்கான வீடுகளுக்கு வண்ணங்கள் தீட்டி, அந்த இடத்தையே ஒரு கலைக்கூடமாக மாற்றினார். இது வெறும் அழகுக்காக மட்டுமல்ல, அங்கிருந்த மக்களின் மனநிலையில் நேர்மறையான மாற்றத்தை ஏற்படுத்தியது.

2. கல்வி மற்றும் கலை: கலை மூலம் கல்வியைப் புகட்டும் முறையை இவர் கையாண்டார். வறுமை மற்றும் போதைப்பொருள் பழக்கத்திற்கு அடிமையான குழந்தைகளை மீட்டு, அவர்களுக்குக் கலை மற்றும் திறன் மேம்பாட்டுப் பயிற்சிகளை வழங்கினார்.

3. சுவர் ஓவியங்கள் மூலம் விழிப்புணர்வு: சுகாதாரம், கல்வி மற்றும் பெண் உரிமை குறித்துச் சுவர் ஓவியங்கள் வழியாக மக்களிடையே விழிப்புணர்வை ஏற்படுத்தினார்.

4. இந்தியாவெங்கும் விரிவாக்கம்: மும்பையில் தொடங்கிய இந்தத் திட்டம், தற்போது இந்தியா முழுவதும் உள்ள 150-க்கும் மேற்பட்ட கிராமங்கள் மற்றும் நகரங்களுக்கு விரிவடைந்துள்ளது. இதன் மூலம் 1,50,000-க்கும் மேற்பட்ட மக்கள் பலனடைந்துள்ளனர்.

வரலாற்றுப் பின்னணி

இந்தியாவிற்கு இந்த விருது கிடைப்பது இது இரண்டாவது முறையாகும். இதற்கு முன்பு 2020-ஆம் ஆண்டு மகாராஷ்டிராவைச் சேர்ந்த ரஞ்சித்சிங் திசாலே என்ற ஆசிரியர் இந்த விருதினைப் பெற்றிருந்தார். தற்போது 2026-இல் ரூபிள் நாகி தனது கலை வழிக் கல்வியால் இந்தச் சாதனையைப் படைத்துள்ளார்.

பரிசுத் தொகை எதற்குப் பயன்படும்?

விருதுடன் வழங்கப்பட்ட ஒரு மில்லியன் டாலர் பரிசுத் தொகையை, இந்தியாவில் இன்னும் பின்தங்கிய பகுதிகளில் உள்ள அரசுப் பள்ளிகளைத் தரம் உயர்த்தவும், கிராமப்புறக் குழந்தைகளின் கலை வழி கல்விக்காகவும் பயன்படுத்தப் போவதாக ரூபிள் நாகி நெகிழ்ச்சியுடன் தெரிவித்துள்ளார்.

ஆசிரியப் பணி என்பது வெறும் வகுப்பறையோடு முடிந்துவிடுவதல்ல என்பதை ரூபிள் நாகி உலகிற்கு நிரூபித்துள்ளார். கலை மூலம் சமூக மாற்றத்தை ஏற்படுத்த முடியும் என்ற அவரது தொலைநோக்குப் பார்வை, இன்று இந்தியாவை சர்வதேச அரங்கில் நிமிர்ந்து பார்க்க வைத்துள்ளது.

தனுஜா