ஹேப்பி நியூ இயர்: உலகப் புத்தாண்டுக் கொண்டாட்ட ரவுண்ட்ஸ்!

நாம் அனைவரும் புது வருடத்தை ஆவலோடு எதிர் நோக்கி காத்து கொண்டிருக்கிறோம்.. இல்லையா? இந்த புதுவருடத்தின் முதல் நாளில் வழக்கம் போல் புத்தாடை அணிந்து நண்பர்கள்,உறவினர்களுடன் கேக் வெட்டி கொண்டாடி மகிழ்ச்சியை பகிர்ந்துகொள்வது வாடிக்கை.ஆனால் சில நாடுகளில் விநோதமாகவும், நகைச்சுவையாகவும்,புதுமையாகவும், வியக்கதகு வகையிலும் புத்தாண்டை கொண்டாடுடாடுகிறார்கள். அவை என்னென்ன என்று பார்ப்போமா?:

1. டென்மார்க் (Denmark) – தட்டு உடைக்கும் திருவிழா

இங்கே பழைய தட்டு, கண்ணாடிப் பொருட்கள் எதையும் தூக்கி எறியாமல் டிசம்பர் 31 வரை சேமித்து வைப்பார்கள். புத்தாண்டு அன்று அவற்றை நண்பர்கள் மற்றும் உறவினர்களின் வீட்டின் சுவரில் வீசி உடைப்பார்கள். ‘பழையன கழிதலும் புதியன புகுதலும்’ என்பதே இவர்களின் நோக்கம்.

2. ஸ்பெயின் (Spain) – 12 திராட்சைகள்

ஸ்பெயின் மக்கள் புத்தாண்டு நள்ளிரவில் 12 திராட்சை பழங்களைச் சாப்பிட வேண்டும். நள்ளிரவு 12 மணிக்கு கடிகாரம் ஒவ்வொரு முறை ஒலிக்கும் போதும் ஒரு திராட்சை என 12 முறை சரியாகச் சாப்பிட்டு முடித்தால், அந்த ஆண்டு முழுவதும் அதிர்ஷ்டம் கிட்டும் என நம்புகிறார்கள்.

3. ஜப்பான் (Japan) – 108 மணி ஓசைகள்

ஜப்பானியர்கள் புத்தாண்டு அன்று கோயில்களில் உள்ள பெரிய மணிகளை 108 முறை ஒலிப்பார்கள். இதன் மூலம் மனிதர்களின் 108 வகையான உலகியல் ஆசைகள் மற்றும் கவலைகள் நீங்கி, மனம் தூய்மையாவதாக இவர்கள் நம்புகின்றனர்.

4. சுவிட்சர்லாந்து (Switzerland) – ஐஸ்கிரீம் குளியல்

குழந்தைகள் விரும்பும் ஐஸ்கிரீமை சுவிட்சர்லாந்து மக்கள் வேண்டும் என்றே தரையில் போடுவார்கள். ஐஸ்கிரீம் கீழே விழுந்தால் வாழ்க்கையில் செழிப்பு உண்டாகும் என்பது இவர்களின் வினோதமான நம்பிக்கை.

5. பிரான்ஸ் (France) – பெருவிருந்து

பிரான்ஸ் நாட்டினர் ’உண்டு மகிழ்வதே உண்மையான மகிழ்வு’ எனக் கருதுகின்றனர். புத்தாண்டு அன்று நண்பர்கள் மற்றும் உறவினர்களுடன் இணைந்து வகை வகையான உணவுகளை உண்டு மகிழ்வதைத் தங்களின் வாழ்நாள் செழிப்பிற்கான வழியாகக் கருதுகின்றனர்.

6. ஸ்காட்லாந்து (Scotland) – அதிர்ஷ்டப் பாதம்

நள்ளிரவு 12 மணிக்கு மேல் உங்கள் வீட்டிற்குள் நுழையும் முதல் நபர் கையில் நிலக்கரி, ரொட்டி மற்றும் பானத்துடன் வரும் கருப்பு நிற முடி கொண்ட ஆணாக இருந்தால், அந்த வருடம் முழுவதும் உங்கள் வீட்டிற்குப் பெரும் அதிர்ஷ்டம் சேரும் என்பது இவர்களின் நம்பிக்கை.

7. கொலம்பியா (Colombia) – சூட்கேஸ் பயணம்

புத்தாண்டு அன்று நிறைய பயணம் செய்ய விரும்பும் மக்கள், நள்ளிரவில் ஒரு வெற்று சூட்கேஸை எடுத்துக் கொண்டு வீட்டைச் சுற்றி ஓடுவார்கள். இப்படிச் செய்தால் அந்த வருடம் முழுவதும் பல பயண வாய்ப்புகள் கிட்டும் என்பது இவர்களின் எண்ணம்.

8. பிரேசில் (Brazil) – ஏழு அலைகள்

கடற்கரைக்குச் சென்று நள்ளிரவில் கடலில் எழும் ஏழு அலைகளைத் தாண்டி குதிப்பதை பிரேசில் மக்கள் வழக்கமாகக் கொண்டுள்ளனர். ஒவ்வொரு குதிக்கும் போதும் ஒரு கோரிக்கையை முன்வைப்பார்கள். வெள்ளை உடை அணிந்து இதைச் செய்வது அமைதியைத் தரும் என நம்புகின்றனர்.

9. ஈக்வடார் (Ecuador) – கசப்புகளை எரித்தல்

கடந்த ஆண்டின் கெட்ட நினைவுகளை மறக்க, வைக்கோலால் செய்யப்பட்ட உருவ பொம்மைகளை நள்ளிரவில் தெருக்களில் வைத்து எரிப்பார்கள். பழைய துன்பங்கள் எரிந்து புதிய மகிழ்ச்சி பிறக்கும் என்பது இவர்களின் தாரக மந்திரம்.

10. பிலிப்பைன்ஸ் (Philippines) – வட்ட வடிவ மர்மம்

வட்டம் என்பது நாணயத்தின் அடையாளம். எனவே, புத்தாண்டு அன்று வட்ட வடிவப் புள்ளிகள் கொண்ட ஆடைகளை அணிவது, மேசை மீது 12 வகையான வட்ட வடிவப் பழங்களை அடுக்கி வைப்பது எனச் செல்வத்தைச் சேர்க்கும் நோக்கில் இக்கொண்டாட்டம் அமைகிறது.

11. இத்தாலி (Italy) – ஜன்னல் வழி வெளியே!

பழைய பொருட்கள் மற்றும் தேவையற்ற துணிகளை ஜன்னல் வழியாக வெளியே வீசுவதை இத்தாலியர்கள் ஒரு சடங்காகச் செய்கிறார்கள். பழைய பாரங்களைத் தூக்கி எறிந்தால்தான் புதிய சந்தோஷங்கள் உள்ளே வரும் என்பது இவர்களின் நம்பிக்கை.

மொத்தத்தில், கடல் கடந்து தேசங்கள் மாறினாலும், கலாச்சாரங்கள் வேறுபட்டாலும், அந்த நள்ளிரவு 12 மணிக்குப் பின் பிறக்கப்போகும் காலம் தங்களின் வாழ்வை ஒளிரச் செய்ய வேண்டும் என்ற எதிர்பார்ப்பே ஒட்டுமொத்த உலகின் பொதுவான மொழியாக இருக்கிறது. தட்டு உடைப்பதும், திராட்சை உண்பதும், மணிகளை ஒலிப்பதும் வெறும் சடங்குகள் மட்டுமல்ல; அவை கடந்த காலத்தின் வலிகளையும் சோர்வுகளையும் உதறிவிட்டு, ஒரு புதிய தொடக்கத்தை நம்பிக்கையோடு தழுவிக்கொள்ளும் மனித மனத்தின் தீராத ஆர்வம். மண்ணின் நிறம் மாறினாலும், மனிதர்களின் கொண்டாட்ட முறைகள் மாறுபட்டாலும், இறுதியில் அனைவரின் வேண்டுதலும் ஒன்றே—வரப்போகும் புத்தாண்டு சாமானிய மனிதனின் இல்லத்திலும் உள்ளத்திலும் தீராத மகிழ்ச்சியையும், அமைதியையும், செழிப்பையும் அள்ளித் தரவேண்டும் என்பதே அந்த அழகான உலகளாவிய பிரார்த்தனை.

தனுஜா