சன் டிவி பங்குகளில் கோல்மால்- கலாநிதி மாறனுக்கு தயாநிதி மாறன் நோட்டீஸ்!

இந்தியாவின் மிகப்பெரிய ஊடக சாம்ராஜ்யங்களில் ஒன்றான சன் டிவி நெட்வொர்க்கின் தலைமை மற்றும் உரிமையாளர் விவகாரத்தில், நிறுவனத் தலைவர் கலாநிதி மாறன் மீது அவரது சகோதரரும் திமுக எம்.பி.யுமான தயாநிதி மாறன் சட்டப்பூர்வ நோட்டீஸ் அனுப்பியுள்ளார். இந்த நோட்டீஸ், ஜூன் 10, 2025 அன்று அனுப்பப்பட்டுள்ளது. முன்னதாக 2024 அக்டோபர் 7 ஆம் தேதி அனுப்பப்பட்ட நோட்டீஸ்க்கு தெளிவற்ற பதில் மட்டுமே கிடைத்தது என்றும், அதன் பின்னர் கலாநிதி மாறன் தனது மற்றொரு சகோதரியான திருமதி. அன்புகரசிக்கு ஒரு தீர்வுத் தொகையாக ₹500 கோடியை செலுத்தியதாகவும் தயாநிதி மாறன் குற்றம் சாட்டினார்.

தயாநிதி மாறனின் குற்றச்சாட்டுகள்:

தயாநிதி மாறன் தனது சகோதரர் கலாநிதி மாறன் மீது கடுமையான நிதி முறைகேடுகள், மோசடி மற்றும் பணமோசடி போன்ற குற்றச்சாட்டுகளை இந்த நோட்டீஸில் சுமத்தியுள்ளார். மேலும், 2003 ஆம் ஆண்டில் இருந்த நிறுவனத்தின் பங்குதாரர் கட்டமைப்பை மீண்டும் நிலைநிறுத்த வேண்டும் என்றும் கோரியுள்ளார். மேலும், “இந்த குற்றச் செயல்களின் மூலம் கிடைத்த வருமானம், சன் டைரக்ட் டிவி பிரைவேட் லிமிடெட், கல் ரேடியோஸ் பிரைவேட் லிமிடெட், கல் ஏர்வேஸ் பிரைவேட் லிமிடெட், கல் பப்ளிகேஷன்ஸ் பிரைவேட் லிமிடெட், சன்ரைசர்ஸ் ஹைதராபாத், சவுத் ஏசியன் எஃப்.எம்., சன் பிக்சர்ஸ், தென்னாப்பிரிக்காவில் ஒரு கிரிக்கெட் அணி, யுனைடெட் கிங்டமில் ஒரு கிரிக்கெட் அணி மற்றும் ஸ்பைஸ்ஜெட் போன்ற மதிப்புமிக்க சொத்துகள்/நிறுவனங்களை வாங்குவதன் மூலம் தன்னை மேலும் வளப்படுத்திக் கொள்ள பயன்படுத்தப்பட்டுள்ளன,” என்றும் நோட்டீஸில் குற்றம் சாட்டப்பட்டுள்ளது.

குறிப்பிடப்பட்டுள்ள முக்கிய அம்சங்கள்:

தந்தையின் மறைவுக்குப் பிந்தைய பங்கு மாற்றம்: 2003 ஆம் ஆண்டில் தந்தை முரசொலி மாறன் காலமான பிறகு, சன் டிவி நெட்வொர்க்கின் பங்கு உரிமையை கலாநிதி மாறன் கையாண்ட விதத்தில் முறைகேடுகள் நடந்ததாக தயாநிதி மாறன் குற்றம் சாட்டியுள்ளார்.
அம்மாவுக்கு பங்கு மாற்றம்: தயாநிதி மாறனின் கூற்றுப்படி, முரசொலி மாறன் மறைந்த பிறகு, அவரது மரணச் சான்றிதழ் அல்லது சட்டபூர்வ வாரிசு சான்றிதழ் போன்ற தேவையான சட்ட ஆவணங்கள் இல்லாமல், பங்குகள் அவர்களின் தாயார் மல்லிகா மாறனுக்கு மாற்றப்பட்டுள்ளன. இந்த ஆவணங்கள் அனைத்தும் பின்னரே வழங்கப்பட்டன என்றும் நோட்டீஸில் குறிப்பிடப்பட்டுள்ளது.
சந்தைப் விலைக்குக் குறைவான பங்கு ஒதுக்கீடு: 2003 செப்டம்பர் 15 அன்று, கலாநிதி மாறன் தனக்கு 12 லட்சம் ஈக்விட்டி பங்குகளை, ஒரு பங்கின் nominal விலையாக ₹10 வீதம் ஒதுக்கியுள்ளார். ஆனால், அந்த நேரத்தில் ஒரு பங்கின் சந்தை மதிப்பு ₹2,500 முதல் ₹3,000 வரை இருந்ததாக மதிப்பிடப்பட்டுள்ளது. இது “குற்றவியல் நம்பிக்கை மீறல் மற்றும் மோசடி” என்று தயாநிதி மாறன் குறிப்பிட்டுள்ளார்.
பெரும்பான்மை பங்குதாரர்களுக்குத் தெரியாமல் உரிமையைப் பெறல்: கலாநிதி மாறன், நிறுவனத்தின் அசல் பெரும்பான்மை பங்குதாரர்களுக்கு தெரிவிக்காமலோ அல்லது அவர்களின் ஒப்புதலைப் பெறாமலோ சன் டிவி பிரைவேட் லிமிடெட்டில் 60% உரிமையைப் பெற்றார் என்றும் நோட்டீஸில் கூறப்பட்டுள்ளது.
நிதி ஸ்திரத்தன்மை: இந்த பரிவர்த்தனை நடந்த நேரத்தில் சன் டிவி நிறுவனம் நிதி ரீதியாக ஸ்திரமாக இருந்ததாகவும், புதிய மூலதனம் தேவையில்லை என்றும் நோட்டீஸில் தெரிவிக்கப்பட்டுள்ளது. இதனால், இந்த பங்கு ஒதுக்கீடு நியாயமற்றது என்றும் தயாநிதி மாறன் வாதிடுகிறார். இந்த பரிவர்த்தனைக்கு முன்பு கலாநிதி மாறன் நிறுவனத்தில் எந்தப் பங்குகளையும் வைத்திருக்கவில்லை என்றும் குறிப்பிடப்பட்டுள்ளது.

முந்தைய சர்ச்சைகள்:

மாறன் சகோதரர்களுக்கு இடையே இது போன்ற பங்கு மற்றும் நிதி தொடர்பான சர்ச்சைகள் இதற்கு முன்பும் நிலவி வந்துள்ளன. குறிப்பாக, ஏர்செல்-மேக்சிஸ் வழக்கு மற்றும் தயாநிதி மாறன் மத்திய அமைச்சராக இருந்தபோது சன் டிவி குழுமத்திற்கு பி.எஸ்.என்.எல். இணைப்புகளை சட்டவிரோதமாகப் பயன்படுத்தியதாகக் கூறப்படும் தொலைபேசி பரிமாற்றம் தொடர்பான வழக்குகளிலும் இவர்கள் இருவரும் சிக்கினர். அந்த சமயங்களிலும் சன் டிவி பங்குகள் சரிவை சந்தித்தன.

இந்த நோட்டீஸின் முக்கியத்துவம்:

இந்த சமீபத்திய சட்ட நோட்டீஸ், கலாநிதி மற்றும் தயாநிதி மாறன் குடும்பத்தினரிடையே நீண்டகாலமாக இருந்து வந்த உள் குடும்பப் பிணக்குகள் தற்போது வெளிப்படையாக வெடித்துள்ளதைக் காட்டுகிறது. தற்போது அனுப்பப்பட்டுள்ள நோட்டீஸில் இந்தக் கோரிக்கைகள் இணங்கப்படாவிட்டால், அவருக்கும் அவரது கூட்டாளிகளுக்கும் எதிராக அனைத்து உரிய சிவில், கிரிமினல், ஒழுங்குமுறை மற்றும் அமலாக்க நடவடிக்கைகளைத் தொடங்கப்படலாம் என்றும் எச்சரிக்கப்பட்டுள்ளது. ‘இது சன் டிவி நெட்வொர்க்கின் எதிர்காலம் மற்றும் தலைமை குறித்து முக்கிய கேள்விகளை எழுப்பியுள்ளது. கலாநிதி மாறனின் எதிர்வினை மற்றும் இந்த சட்டப் போராட்டத்தின் அடுத்தகட்ட நகர்வுகள் ஊடகத் துறையிலும், பங்குச் சந்தையிலும் உன்னிப்பாகக் கவனிக்கப்படும்.

கட்டிங் கண்ணையா!