தனிநபர் பிராண்டிங் நோக்கில் எகிறிய ஏஐ பதிவுகளுக்கு செக்-மேட்!லிங்க்டுஇன் அதிரடி!

வேலைவாய்ப்புச் சந்தையில் நிலவும் கடுமையான போட்டி காரணமாக, லிங்க்டுஇன் தளத்தில் தங்களை வெளிப்படுத்திக் கொள்ளும் ‘தனிநபர் பிராண்டிங்’ நடவடிக்கை அண்மைக்காலமாகப் பெரும் போராக உருவெடுத்துள்ளது. தினமும் ஏதேனும் ஒரு கருத்தையோ அல்லது பணி தொடர்பான விவரத்தையோ பதிவிட வேண்டும் என்ற கட்டாயத்தில், ஆயிரக்கணக்கான பயனர்கள் சாட்கேபிடி போன்ற செயற்கை நுண்ணறிவு (AI) கருவிகளைப் பயன்படுத்தி பெருமளவில் பதிவுகளை உருவாக்கத் தொடங்கினர். இதன் விளைவாக, மனிதர்களின் உண்மையான அனுபவப் பகிர்வுகளுக்குப் பதிலாக, ஒரே மாதிரியான சொற்றொடர்களைக் கொண்ட ‘ஏஐ உள்ளடக்கங்கள்’ (AI Slop) லிங்க்டுஇன் தளத்தை ஆக்கிரமித்து, அதன் பயன்பாட்டுத் தரத்தைக் கடுமையாகக் குறைத்தன.

360பிரூ அல்காரிதமும் கட்டுப்பாடு நடவடிக்கைகளும்

இப்பிரச்சனைக்கு முற்றுப்புள்ளி வைக்கும் விதமாக, லிங்க்டுஇன் நிறுவனம் 360பிரூ (360Brew) என்ற அதிநவீன புதிய அல்காரிதம் அமைப்பைக் களம் இறக்கியுள்ளது. செயற்கை நுண்ணறிவால் உருவாக்கப்பட்ட, ஆழமற்ற, பொதுவான பதிவுகளைக் கண்டறிந்து அவற்றின் பார்வைகளைக் (Reach) கணிசமாகக் குறைப்பதே இதன் பிரதான வேலையாகும். ஏஐ கருவிகளைப் பயன்படுத்தி எழுதப்பட்ட பதிவுகள் மற்ற பயனர்களின் முகப்பிற்குச் செல்லாதவாறு லிங்க்டுஇன் இந்த நடைமுறையைக் கடுமையாக்கியுள்ளது.

ஏஐ பதிவு என்பதை எப்படிக் கண்டுபிடிக்கிறது

இயந்திரத்தனமான வார்த்தை அமைப்புகள், மீண்டும் மீண்டும் பயன்படுத்தப்படும் ஒரே மாதிரியான டெம்ப்ளேட் நடைகள் மற்றும் ஆழமான தொழில்முறை அனுபவம் இல்லாத பொதுவான கருத்துகளை இந்த புதிய அல்காரிதம் மிகத் துல்லியமாக அடையாளம் காண்கிறது. இதுமட்டுமன்றி, பயனர்களின் வசதிக்காகப் பதிவுகளின் மேல் உள்ள மூன்று புள்ளிகள் கொண்ட மெனுவில், ‘இது ஏஐ மூலம் உருவாக்கப்பட்ட போலி பதிவு’ (AI Slop) என்று பயனர்களே சுட்டிக்காட்டி புகாரளிக்கும் புதிய வசதியையும் அறிமுகப்படுத்தியுள்ளது.

தடை விதிக்கப்படவில்லை; ஆனால் பார்வை கட்டுப்பாடு

லிங்க்டுஇன் நிறுவனம் ஏஐ பயன்பாட்டை முற்றிலுமாகத் தடை செய்யவில்லை. ஒரு பதிவை எழுத ஏஐ உதவியைப் பெறுவதில் தவறில்லை; ஆனால் அந்தப் பதிவின் மையக்கருத்து, தனிநபர் அனுபவம் மற்றும் சொந்தக் கருத்துகள் அனைத்தும் மனிதர்களுடையதாகவே இருக்க வேண்டும் என்பதைத் தெளிவுபடுத்தியுள்ளது. எந்தவிதமான சொந்த அனுபவமும் இன்றி முழுமையாக ஏஐ மூலம் உருவாக்கப்படும் பதிவுகளின் ‘ரீச்’ தோராயமாக 50 சதவீதம் வரை குறைக்கப்பட்டுள்ளது.

மாறிவரும் உத்திகளும் மனிதக் குரலுக்கான மரியாதையும்

வெறும் பதிவுகளின் எண்ணிக்கையை விட, அந்தப் பதிவை ஒருவர் எவ்வளவு நேரம் படிக்கிறார் (Dwell Time) மற்றும் அதில் நடைபெறும் பயனுள்ள விவாதங்களே இனி ஒருவரின் கணக்கை பிரபலமாக்கும். தானியங்கி முறையில் கமெண்ட் செய்வது, ஏஐ மூலம் உருவாக்கப்பட்ட கருத்துகளைப் பகிர்வது போன்றவற்றிற்கும் கட்டுப்பாடுகள் தீவிரமாக்கப்பட்டுள்ளன. இதன் மூலம், போலியான ஏஐ விளம்பரங்களை விட, ஒரு மனிதரின் உண்மையான தொழில்முறை அனுபவத்திற்கும், சொந்தப் படைப்புகளுக்கும் மீண்டும் லிங்க்டுஇன் தளத்தில் முன்னுரிமை கிடைக்கத் தொடங்கியுள்ளது.

ரமாபிரபா