சிக்மா – விமர்சனம்!

கோலிவுட்டில் வாரிசு நடிகர்கள் உண்டு. தயாரிப்பாளர் வாரிசுகளும் இருக்கிறார்கள்; ஆனால் நேரடியாகத் தந்தை அல்லது குடும்பப் பின்னணியிலிருந்து இயக்குநர்களாகக் களமிறங்கி முதல் படத்திலேயே கவனம் ஈர்த்தவர்கள் மிகக் குறைவு என்று சொல்வதை விட்ட இல்லாமலே இருந்தது. அக்குறையை போக்கிய பெருமை சிக்மா டைரக்டர் ஜேசன் சஞ்சய்க்கு கிடைத்து விட்டது. நேற்றைய கோடம்பாக்க ரியல் சூப்பர் வசூல் ஸ்டாரும் , இன்றைய முதல்வருமான ஜோசப் விஜய் மகனான ஜேசன் சஞ்சய் தனது பள்ளிப் படிப்பைச் சென்னையில் உள்ள அமெரிக்கன் இன்டர்நேஷனல் பள்ளியில் (American International School, Chennai) முடித்தார். இதன் பிறகு திரைப்படத் துறையின் மீது கொண்ட ஆர்வம் காரணமாக கனடாவில் உள்ள டொராண்டோ பிலிம் ஸ்கூலில் (Toronto Film School) திரைப்படத் தயாரிப்பில் (Film Production) டிப்ளமோ பட்டம் பெற்றார்.. பின்னர் லண்டனில் உள்ள சென்ட்ரல் பிலிம் ஸ்கூலில் (Central Film School) திரைக்கதை எழுதுதல் பிரிவில் (Screenwriting) இளங்கலைப் பட்டமும் (BA Honours) பெற்று வந்தவரை லைகா கமிட் செய்து இயக்குநராக அறிமுகம் செய்துள்ளதுதான் இன்றைய ஹாட் டாபிக். தன் முதல் படத்திலேயே ஒரு ஸ்டைலிஷான ஆக்‌ஷன் படத்தை கொடுக்க முயற்சி செய்திருக்கிறார். அதிலும் மூன்று மாறுபட்ட பின்னணிக் கதைகளை ஒரு குறிப்பிட்ட புள்ளியில் இணைக்கும் திரைக்கதை புன்னகையை வரவழைக்கவே செய்கிறது.

கதைக் களம்

சென்னை மாநகரத்தின் மையப்பகுதியில் உள்ள ஒரு பழமையான வீடு. வீட்டின் வரவேற்பறை முதல் படுக்கையறை வரை எங்கு பார்த்தாலும் புத்தகங்களின் மலை. நாயகனின் அம்மா ஒரு தீவிர புத்தகப் பிரியர்; வீடு முழுக்க ஒரு சிறிய நூலகத்தையே நடத்தி வருபவர். மறுபுறம், அவனது அப்பா ஊருக்குச் செய்த உதவிகள் போக, சொந்த வாழ்க்கையில் பலரிடமும் கைமாற்றித் திருப்பித் தர முடியாத அளவுக்குக் கடன்களை வாங்கிக் குவித்துவிட்டுச் சென்ற ஒரு ஊதாரி. பெற்றோர் மறைவுக்குப் பிறகு, அந்த வீட்டின் அஸ்திவாரத்தோடு சேர்ந்து ஒரு கோடியே இருபத்தி ஐந்த லட்சம் ரூபாய் கடன் பாக்கியும் நாயகனின் தலை மீது வந்து விழுகிறது. கடன் கொடுத்தவர்களின் மிரட்டல்கள் ஒருபுறம் இருக்க, கையில் இருக்கும் ஒரே சொத்து அந்தப் புத்தகங்கள் நிறைந்த வீடு மட்டுமே. கௌரவமான வாழ்க்கையை வாழ நினைக்கும் நாயகன், சொந்தமாக ஒரு சிறிய யூடியூப் சேனலை நடத்தி வருகிறான். ஆனால், இன்றைய டிஜிட்டல் உலகில் சில்லறை வருமானத்தைத் தாண்டி அந்தச் சேனலால் அவனது பெரும் கடனை அடைக்க முடியவில்லை. உடனடி பணத்தேவை கழுத்தை நெரிக்கிறது.

இத்தகைய இக்கட்டான சூழலில், நகரத்தின் நிழல் உலகத்தை மிரட்டும் இரு மாஃபியாக்களின் சாம்ராஜ்யம் குறுக்கிடுகிறது. முதல் வில்லன், தன் பெயரளவுக்கு ஒரு பிரம்மாண்ட திரையரங்கை முகமூதியாக வைத்துக் கொண்டு, அதன் அடித்தளத்தில் கோடிக்கணக்கில் சட்டவிரோத சூதாட்டக் கிளப்புகளை நடத்தி வருபவன். இரண்டாவது வில்லன், சர்வதேச அளவில் போதைப்பொருள் கடத்தலில் கொடிகட்டிப் பறப்பவன். இந்த இருவரின் கருப்புப் பணமும் சேர்ந்து சுமார் ஆயிரம் கோடி ரூபாய் மதிப்புடையது. அந்தப் பணத்தை ரகசியமாகப் பதுக்கி வைத்துள்ள லாக்கரின் சாவி தற்செயலாக, ஒரு பழைய புத்தகம் வழியாக நாயகனின் கைகளுக்கு வந்து சேர்கிறது. சாவியுடன் ஒரு பென் டிரைவும் அவனுக்குக் கிடைக்கிறது. அதில் அந்த இரு வில்லன்களும் சர்வதேச பயங்கரவாதிகள் மற்றும் அரசியல் புள்ளிகளுடன் இணைந்து செய்த பணப்பரிமாற்றங்கள், போதைப்பொருள் கடத்தல் ஆவணங்கள் மற்றும் அவர்களின் சூதாட்டக் கிளப்பின் ரகசிய பாஸ்வேர்டுகள் முழுமையாகப் பதிவாகியுள்ளன. இது வில்லன்களின் மொத்த சாம்ராஜ்யத்தையும் ஒரே நொடியில் சிதைக்கக்கூடிய சக்தி வாய்ந்த ஆவணம்.

கடன் தொல்லை உச்சகட்டத்தை எட்டும்போதுதான் அந்தப் பென் டிரைவின் வீரியம் நாயகனுக்குப் புரியவருகிறது. போலீசிடம் சென்றால் முறையான ஆதாரங்கள் கிடைக்க காலம் தாழ்த்தலாம்; அல்லது வில்லன்களின் செல்வாக்கு முன்னால் தன் உயிர் பறிபோகலாம். எனவே, அவன் தன் யூடியூப் சேனலையே ஒரு ஆயுதமாக மாற்றுகிறான். பென் டிரைவில் உள்ள ஒரு சிறு துண்டு ஆதாரத்தை மட்டும் இணையத்தில் கசியவிட்டு, இந்தக் கோடீஸ்வரக் கும்பலின் உண்மையான முகம் என்ன என்று ஒரு புதிரான நேரலையை வெளியிடுகிறான். மொத்த நகரமும் அந்தச் செய்தியைக் கண்டு அதிர்ந்துபோகிறது. அடுத்த சில மணி நேரங்களில், அந்த வில்லன்கள் இருவரும் நேரடியாக நாயகனைத் தேடி வரத் தொடங்குகிறார்கள்.ஆயிரம் கோடி ரூபாய் பணத்தைத் தொலைத்துவிடக் கூடாது என்ற வெறியில் போதைப்பொருள் கடத்துபவனும், தன் கிரிமினல் சாம்ராஜ்யம் வெளியே தெரிந்துவிடக் கூடாது என்ற ஆவேசத்தில் திரையரங்கு வில்லனும் மோதிக்கொள்ளத் தொடங்குகிறார்கள்.

இதற்கிடையில், இந்த இரண்டிற்கும் நடுவில் சிக்கிக்கொள்ளும் நாயகன், வில்லன்களின் ஆட்களிடமிருந்து தப்பி ஓடும் சென்னை வீதிகள் பரபரப்பான துரத்தல் காட்சிகளாக மாறுகின்றன. தனது புத்திசாலித்தனத்தால் இரு வில்லன்களையும் ஒருவருக்கொருவர் எதிரிகளாக மாற்றி, அவர்களின் கவனத்தைத் திசைதிருப்புகிறான் நாயகன். இறுதியில், அந்த ஆயிரம் கோடி கருப்புப் பணக் கூட்டத்தை சட்டத்தின் முன் நிறுத்துவதுடன், தனக்குள்ள ஒரு கோடியே இருபத்தி ஐந்த லட்சம் கடனையும் அந்த வில்லன்களின் பணத்திலிருந்தே சாமர்த்தியமாகச் சரிசெய்துவிட்டு எப்படி வெளியே வருகிறான் என்பதுதான் சிக்மா படக் கதை.

நடிப்பு

நாயகனாகக் களமிறங்கியிருக்கும் சந்தீப் கிஷன், படத்தின் மிகப்பெரிய பலமாக நிமிர்ந்து நிற்கிறார். சாதாரண நடுத்தரக் குடும்பத்து இளைஞனின் எதார்த்தமான தவிப்புகளையும், அதே நேரம் இக்கட்டான சூழலில் சாணக்கியத்தனமாக யோசிக்கும் கூர்மையான மூளையையும் தனது சிறப்பான நடிப்பால் மிகச் சரியாக வெளிப்படுத்தியுள்ளார். ஆக்‌ஷன், காமெடி, மாஸ் மற்றும் சென்டிமென்ட் என இயக்குநர் கேட்ட அத்தனை பரிமாணங்களையும் தனக்குக் கொடுக்கப்பட்ட களத்தில் கச்சிதமாகச் செய்திருக்கிறார். குறிப்பாக, சண்டைக் காட்சிகளில் அவர் காட்டும் வேகம் மற்றும் உடல்மொழி படத்திற்குத் தேவையான அபாரமான எடையையும் எனர்ஜியையும் கொடுக்கிறது.

நாயகியாக வலம்வரும் பரியா அப்துல்லாவுக்கு, படத்தின் பிரதான கதைக் களத்தில் வழக்கமான நீளமான காட்சிகள் இல்லாவிட்டாலும், கிடைத்த அந்தக் குறைவான நேரத்திலேயேயும் தனது கச்சிதமான நடிப்பால் திரையில் தன் இருப்பை ஆழமாகப் பதிவு செய்துவிட்டுச் செல்கிறார்.

படத்தின் முதுகெலும்பாக விளங்கும் எதிர்மறை கதாபாத்திரங்களில் சம்பத், ஷிவ்பண்டிட் மற்றும் ஜேக்பி மூவரும் மிரட்டலான நடிப்பை வெளிப்படுத்தியுள்ளனர். கோடிக் கணக்கான கருப்புப் பணத்துக்காகவும் அதிகாரத்துக்காகவும் மோதும் வில்லன்களாக இவர்கள் காட்டும் வெறியும், தேர்ந்த நடிப்பும் திரைக்கதைக்கு அசுர பலம் சேர்த்திருக்கிறது. இவர்களுடன் இணைந்திருக்கும் நடன இயக்குநர் ராஜுசுந்தரம் மற்றும் ஷீலா ராஜ்குமார் ஆகியோரின் பங்களிப்பும் படத்திற்கு மேலும் மெருகூட்டுகிறது.

கதையின் சீரியஸான மற்றும் டென்ஷனான ஓட்டத்திற்கு நடுவே, அன்புதாசனின் நகைச்சுவைக் காட்சிகள் ரசிகர்களுக்குப் புத்துணர்ச்சியான ஒரு சிறிய இடைவெளியைக் கொடுக்கின்றன. குறிப்பாக, ஆபத்தான தருணங்களில் அவர் வெளிப்படுத்தும் டைமிங் காமெடி தியேட்டரில் சிரிப்பலையை வரவழைக்கும் விதமாக ஒர்க்காகி உள்ளது.

டெக்னிக்கல் டீம்

இசை (S. Thaman): படத்தின் மிகப்பெரிய பலமாக இருக்க வேண்டிய இசையமைப்பாளர் தமனின் பின்னணி இசை இந்த முறை சற்று ஏமாற்றத்தையே அளிக்கிறது. மாஸ் காட்சிகளைத் தூக்கிப் பிடிக்க வேண்டிய இடங்களிலும், கதையின் வீரியத்தை உணர்த்த வேண்டிய தருணங்களிலும் இன்னும் கூடுதல் உத்வேகமும் (Elevation) சிறப்பான இசை கோர்ப்புகளும் இருந்திருக்கலாம்; பாடல்களிலும் அந்த மந்திரம் சற்றுத் தவறிப்போயுள்ளது.

ஒளிப்பதிவு (Krishnan Vasanth): கேமராமேன் கிருஷ்ணன் வசந்தின் கேமரா கோணங்கள் படத்திற்குப் பக்கபலமாக அமைந்துள்ளன. சென்னை வீதிகளின் துரத்தல் காட்சிகளிலும், படத்தின் இருண்ட மற்றும் பரபரப்பான களம் முழுவதிலும் காட்சிகளைப் பதிவு செய்துள்ள விதம் படத்திற்குத் தரமான தோற்றத்தைக் கொடுக்கிறது.

படத்தொகுப்பு (K. L. Praveen):  எடிட்டர் கே.எல். பிரவீன் தனது வழக்கமான நேர்த்தியைக் காட்ட முயன்றாலும், படத்தை மிக வேகமாக நகர்த்திச் செல்ல வேண்டும் என்ற அவசரத்தில் சில இடங்களில் காட்சிக் கோர்ப்புகளில் தடுமாற்றம் தெரிகிறது. இதனால் திரைக்கதையின் சில கட்டங்களில் பார்வையாளர்களுக்குக் குழப்பம் ஏற்படுவதைத் தவிர்க்க முடியவில்லை.

சண்டைக்காட்சிகள் (Stunt Choreography – Anbariv / Silva): சண்டைக்காட்சிகளை வடிவமைத்துள்ள வெங்கட் மற்றும் சில்வாவின் உழைப்பு திரையில் பளிச்சிடுகிறது. நாயகனின் ஆக்‌ஷன் பரிமாணத்தை ரசிகர்களுக்குக் கடத்தும் விதமாகவும், படத்தின் விறுவிறுப்பைக் குறையாமல் தக்கவைக்கவும் இந்த ஸ்டண்ட் காட்சிகள் பெரிதும் கைகொடுத்துள்ளன.

மொத்தத்தில் இயக்கம் & திரைக்கதை பொறுப்பேற்ற ஜேசன் சஞ்சய் நியூ டைரக்டர் என்பதற்கான எந்தவிதச் சுவடும் படத்தின் மேக்கிங்கில் ஒரு இடத்திலும் தெரியவில்லை; ஏகப்பட்ட ஹாலிவுட் ஹெய்ஸ்ட் திரில்லர் படங்களில் கண்டு களித்த காட்சிகளை தன் பார்வையில் மிகவும் பிரம்மாண்டமாகவும் நேர்த்தியாகவும் செதுக்கியுள்ளார். இருப்பினும், திரைக்கதையின் ஓட்டத்தில் கதாபாத்திரங்களின் மீதான உணர்வுபூர்வமான ஈர்ப்பு (Emotional Connection) முழுமையாகக் கைகூடாதது படத்திற்குச் சற்று பலவீனமாக அமைந்துள்ளது.

என்றாலும் சிக்மா – ஸ்டைலிஷான படம் என்பதில் சந்தேகமில்லை

ரேட்டிங் – 3.5/5