செய்தியைக் கேட்க / Listen to News
துயரத்தில் வாடும் சக மனிதனின் கண்ணீரைத் துடைக்கத் துடிக்கும் ஆழமான இரக்க உணர்வும், எல்லைகளற்ற அன்பும்தான் மானுடச் சமூகத்தை அறவழியில் இயக்கும் முதன்மை விசையாகத் திகழ்கிறது என்றபோதிலும், இன்றைய அதிவேக டிஜிட்டல் யுகத்தின் இயந்திரத்தனமான ஓட்டத்திலும், மனிதர்களைச் சாதி, மதம், இனம், மொழி மற்றும் அரசியல் எல்லைகளாகப் பிரித்துப் பார்க்கும் குறுகிய சுயநல மனப்பான்மை மேலோங்கி வரும் சூழலிலும், அந்தப் பரந்த மனிதநேயப் பண்பு கொஞ்சம் கொஞ்சமாகச் சுருங்கிப் போய்விடுமோ என்ற பெரும் அச்சம் உலகளவில் மேலோங்கியுள்ளது; இத்தகைய காலக்கட்டத்தில், பழம்பெரும் தமிழ் இலக்கியங்கள் பறைசாற்றிய உயிரிரக்க நெறிகளையும், வரலாற்றுச் சிறப்புமிக்கத் தியாகங்களையும் மீள நினைவுகூர்ந்து, போர்க்களங்கள் மற்றும் இயற்கைச் சீற்றங்களுக்கு இடையே தங்கள் உயிரைப் பணயம் வைத்து அரும்பணியாற்றும் மனிதாபிமானப் பணியாளர்களின் தியாகத்தைப் போற்றுவதோடு, வெறும் அனுதாபங்களைத் தாண்டி அவர்களுக்கு எதிரான வன்முறைகளுக்குக் கடுமையான சட்ட விளைவுகளைக் கோரும் 2026-ஆம் ஆண்டின் “கவலைப்படும் நேரம் முடிந்துவிட்டது, விளைவுகள் ஏற்படுத்தும் நேரம் இப்போது” என்ற அதிரடிப் பிரச்சாரச் செய்தியுடன், மனிதநேயத்தின் உன்னத மேன்மையை உலகிற்கு உரக்கச் சொல்லவே ஒவ்வொரு ஆண்டும் ஆகஸ்ட் 19 ஆம் தேதி உலக மனிதாபிமான நாளாகக் கடைப்பிடிக்கப்படுகிறது.
2026 ஆண்டின் அதிரடிப் பிரச்சாரச் செய்தி
இந்த 2026 ஆம் ஆண்டிற்கான உலக மனிதாபிமான நாள், உலக நாடுகளுக்கும் சர்வதேச அமைப்புகளுக்கும் ஒரு வலிமையான எச்சரிக்கை மணியை அடித்துள்ளது. இந்த ஆண்டின் அதிகாரப்பூர்வ தீம் அல்லது பிரச்சார செய்தி:
“கவலைப்படும் நேரம் முடிந்துவிட்டது. விளைவுகள் ஏற்படுத்தும் நேரம் இப்போது.” (The time for concern is over. The time for consequence is now.)
கடந்த காலங்களில் போர்க் களங்களிலோ அல்லது அசம்பாவிதங்கள் நடக்கும் இடங்களிலோ மனிதாபிமானப் பணியாளர்கள் தாக்கப்படும்போது, உலகத் தலைவர்கள் வெறும் கவலையையும் அனுதாபத்தையும் மட்டுமே அறிக்கைகளாக வெளியிட்டு வந்தனர். ஆனால், வெறுமனே கவலைப்படுவதால் போர்க்களத்தில் உயிரைக் காப்பாற்றப் போராடும் தன்னார்வலர்களையோ, அப்பாவி பொதுமக்களையோ பாதுகாக்க முடிவதில்லை. எனவே, பன்னாட்டு விதிகளை மீறி நிவாரணப் பணியாளர்கள் மீது தாக்குதல் நடத்துபவர்கள் மீது உடனடி சட்டப்பூர்வ விளைவுகளையும், கடுமையான நடவடிக்கைகளையும் எடுக்க வேண்டிய தருணம் இதுவென்பதை இந்த 2026 ஆம் ஆண்டின் கருப்பொருள் உரக்க வலியுறுத்துகிறது.
துயரச் சம்பவத்தில் உதித்த வரலாற்று நாள்
உலக மனிதாபிமான நாள் உருவானதற்குப் பின்னால் ஒரு சோகமான தியாக வரலாறு உள்ளது. பிரேசில் நாட்டைச் சேர்ந்த செர்ஜியோ வியரா டி மெல்லோ என்ற ஐக்கிய நாடுகள் சபைப் பணியாளர், சுமார் 37 ஆண்டுகள் உலகளாவிய போர்க் களங்களில் சிக்கிய அப்பாவி மக்களின் உரிமைக்காகவும் நிவாரணத்திற்காகவும் பாடுபட்டவர். கடந்த 2003 ஆம் ஆண்டு ஆகஸ்ட் 19 அன்று, ஈராக்கின் பாக்தாத் நகரில் உள்ள கேனல் ஹோட்டலில் இயங்கி வந்த ஐநா அலுவலகத்தின் மீது அல்கொய்தா அமைப்பு நடத்திய கொடூரமான வெடிகுண்டுத் தாக்குதலில் செர்ஜியோ உட்பட 22 மனிதாபிமானப் பணியாளர்கள் பரிதாபமாக உயிரிழந்தனர்.
இந்த தியாகச் சம்பவத்தை நினைவுகூரும் வகையிலும், ஆபத்தான சூழல்களில் பிறர் உயிரைக் காக்கப் போராடும் தன்னார்வலர்களைக் கௌரவிக்கும் விதமாகவும், ஸ்வீடன் நாட்டின் முன்மொழிதலை ஏற்று 2008 ஆம் ஆண்டு ஐநா பொதுச் சபை ஆகஸ்ட் 19 ஆம் தேதியை உலக மனிதாபிமான நாளாக அதிகாரப்பூர்வமாக அறிவித்தது.
இலக்கியங்களும் வரலாறும் புகட்டிய ஈகை நெறி
தமிழ் சமுதாயமும் இலக்கியங்களும் தொன்றுதொட்டே மனிதநேயத்திற்கு உச்சகட்ட முன்னுரிமை அளித்து வந்துள்ளன. குளிரில் நடுங்கிய மயிலுக்குத் தன் போர்வையைக் கொடுத்த பேகன், முல்லைக்கொடி படரத் தன் தேரையே ஈந்த பாரி, தமிழ் நிலைக்கத் தன் உயிரைக் காக்கும் நெல்லிக்கனியை அவ்வைக்கு அளித்த அதியமான் எனச் சங்க காலக் கடையெழு வள்ளல்களின் செயல்கள் அனைத்தும் உயிரிரக்கத்தின் உன்னத சான்றுகளாகும்.
யாதும் ஊரே யாவரும் கேளீர் என்ற கணியன் பூங்குன்றனாரின் உலகளாவிய பார்வையையும், வாடிய பயிரைக் கண்டபோதெல்லாம் வாடினேன் என்ற வள்ளலாரின் ஆன்ம நேய ஒருமைப்பாட்டையும் நாம் மறந்துவிட முடியாது. அதேபோல, போர்க்களத்தில்கூட எதிரி நிராயுதபாணியாக நிற்கும்போது இன்று போய் நாளை வா என்று கூறிய காப்பிய நெறிகளும், பகைவருக்கும் அருளும் அண்ணல் காந்தியின் அகிம்சை வழியும், அன்னை தெரசாவின் அளப்பரிய சேவையும் நமக்கு உணர்த்துவது ஒன்றே ஒன்றுதான்: சக மனிதனை நேசிப்பதே உயரிய அறம்.
சவால்களும் தற்போதைய அவசியமும்
இன்றைய நவீன சூழலில், மனிதன் இயற்கையின் சீற்றங்களில் இருந்தும் கொடிய விலங்குகளில் இருந்தும் தப்பித்துவிட்டான். ஆனால், மனிதனாலேயே மனிதனுக்கு ஆபத்து ஏற்படும் அவலநிலைதான் நீடிக்கிறது. போர் மண்டலங்கள், தீவிரவாதத் தாக்குதல்கள் மற்றும் இயற்கைச் சீற்றங்களின் போது, தங்கள் சொந்த உயிரைப் பொருட்படுத்தாமல் களத்தில் இறங்கி நிவாரணம் வழங்கும் தன்னார்வலர்களும் மருத்துவப் பணியாளர்களும் இன்றைக்கும் பூமியின் நிஜமான கதாநாயகர்களாகத் திகழ்கிறார்கள்.
பண்புடையார் பட்டுண்டு உலகம் என்ற வள்ளுவனின் வாக்கிற்கேற்ப, சுயநலமற்ற இதுபோன்ற நல்ல மனிதர்கள் இன்றும் வாழ்வதால்தான் இந்த உலகம் இன்னும் அழியாமல் இயங்கிக் கொண்டிருக்கிறது. வெறும் அனுதாபங்களைத் தாண்டி, ஆபத்தில் உதவுபவர்களுக்குப் பாதுகாப்பு அரணாக நிற்கும் கடுமையான சட்ட விளைவுகளை உருவாக்குவதே இந்த 2026 உலக மனிதாபிமான நாளில் நாம் ஏற்கும் உண்மையான உறுதிமொழியாகும்.
வாத்தீ அகஸ்தீஸ்வரன்
