வங்கி வாடிக்கையாளர்களுக்கு நற்செய்தி: இனி 4 நாமினிகளைச் சேர்க்கலாம்!

மத்திய நிதி அமைச்சகம் வங்கிக் கணக்கு மற்றும் சேமிப்பு தொடர்பான விதிகளில் முக்கிய மாற்றத்தை அறிவித்துள்ளது. அதன்படி, இனி ஒரு வாடிக்கையாளர் தனது வங்கிக் கணக்கு, லாக்கர்கள் அல்லது பாதுகாப்புக் காப்புப் பொருட்களுக்கு அதிகபட்சம் நான்கு நாமினிகளைச் (வாரிசுதாரர்கள்) சேர்க்கலாம் எனத் தெரிவித்துள்ளது. இந்த புதிய விதிமுறை நவம்பர் 1, 2025 முதல் நடைமுறைக்கு வர இருக்கிறது.

இந்த மாற்றம், வங்கித் துறையில் வாடிக்கையாளர் இறப்பிற்குப் பிறகு ஏற்படும் உரிமை கோரல் (Claim Settlement) செயல்முறைகளைச் சீரமைக்கவும், வெளிப்படைத்தன்மையை அதிகரிக்கவும், சிக்கல்களைத் தவிர்க்கவும் கொண்டு வரப்பட்டுள்ளது.

முக்கிய மாற்றத்தின் விவரங்கள்:

‘வங்கிச் சட்டங்கள் (திருத்தம்) சட்டம், 2025’ (Banking Laws (Amendment) Act, 2025) இன் கீழ், நாமினிகள் தொடர்பான முக்கிய விதிகள் நவம்பர் 1 முதல் நடைமுறைக்கு வரும் என மத்திய நிதி அமைச்சகம் அறிவித்துள்ளது.

1. பல நாமினிகளைச் சேர்க்கும் வசதி (Multiple Nominations): வாடிக்கையாளர்கள் இனி தங்கள் வைப்பு நிதி (Deposit Accounts) கணக்குகளுக்கு அதிகபட்சம் நான்கு நபர்களை நாமினிகளாக நியமிக்கலாம்.

2. நாமினிகள் நியமனத்தில் இரண்டு வழிகள்: வாடிக்கையாளர்கள் தங்கள் விருப்பத்திற்கேற்ப இரண்டு வழிகளில் நாமினிகளை நியமிக்கலாம்:

3. லாக்கர்களுக்கான விதிமுறை: பாதுகாப்புக் காப்பு (Safe Custody) மற்றும் பாதுகாப்பு லாக்கர்களுக்கு (Safety Lockers) வாடிக்கையாளர்கள் ஒன்றுக்குப்பின் ஒன்றாக நியமிக்கும் (Successive Nomination) முறையை மட்டுமே பின்பற்ற முடியும்.

இம்மாற்றத்தின் நோக்கம் என்ன?

• உரிமை கோரலை எளிதாக்குதல்: வாடிக்கையாளர் மரணத்திற்குப் பிறகு, அவரது குடும்ப உறுப்பினர்களுக்கும், நாமினிகளுக்கும் நிதி கிடைப்பதில் உள்ள காலதாமதம் மற்றும் சட்டச் சிக்கல்களைக் குறைப்பதே இதன் முதன்மை நோக்கம் ஆகும்.
• வெளிப்படைத்தன்மை: ஒரே நாமினிக்குப் பதிலாகப் பல நாமினிகளை நியமித்து, சதவிகிதத்தைப் பிரித்துக் கொடுப்பதால், குடும்ப உறுப்பினர்களுக்கு இடையே ஏற்படக்கூடிய சண்டைகள் மற்றும் வாரிசு உரிமை மோதல்கள் தவிர்க்கப்படும்.
• பொதுவான நடைமுறை: இந்த விதி, வங்கித் துறை முழுவதும் ஒரே மாதிரியான நடைமுறையையும், வெளிப்படைத்தன்மையையும் உறுதி செய்யும்.

இந்த அறிவிப்பைச் செயல்படுத்துவதற்காக, வங்கிகள் பின்பற்ற வேண்டிய செயல்முறைகள் மற்றும் அதற்கான படிவங்கள் ஆகியவற்றை விளக்கும் ‘வங்கி நிறுவனங்கள் (நாமினேஷன்) விதிகள், 2025’ (Banking Companies (Nomination) Rules, 2025) விரைவில் வெளியிடப்படும் எனவும் மத்திய நிதி அமைச்சகம் தெரிவித்துள்ளது.

மொத்தத்தில், இந்த அறிவிப்பு வங்கி வாடிக்கையாளர்களுக்கு அதிகபட்ச நெகிழ்வுத்தன்மையையும், பாதுகாப்பையும் வழங்கியுள்ளது.

தமிழ் செல்வி